Ẹdat Esịt Ke Edisana Isọn̄ Oro Edide Ke Iso!
NNYỊN ikpokop inemesịt didie ntem nte ke Jehovah, Abasi ndutịm ye edisana idaha eyesu akpa un̄wọn̄ọ esie ndinam isọn̄ akabade edi paradise ofụri ererimbot! (Isaiah 11:6-9) Enye ọn̄wọn̄ọ ete: “Ikọ mi emi ọwọrọde mi ke inua . . . idifiakke itiene mi ubọk ubọk, tutu enye anam se mmade.” ‘Abasi ikemeke ndisu nsu,’ ntre ẹmi idịghe ikpîkpu ikọ.—Isaiah 55:11; Mme Hebrew 6:18.
Ekeme ndidi n̄kpọ nsụkesịt nnọ nnyịn nte ke Jehovah ke ima eyesịbe odụk mbemiso mme owo ẹkade anyan ẹkosịm idaha oro owo mîkemeke ndinyan̄a, ẹkosịm udomo oro owo mîdikemeke nditre edisabade n̄kann̄kụk ofụri ofụri!—Ediyarade 11:18.
Jehovah eyesio mbon oro mîkabakede esịt, oro ẹkoide-koi ẹsabade n̄kpọ ye mme owo oro ke nsọn̄ibuot ẹfụmide edumbet esie ẹban̄ade ndutịm ye edisana idaha. Owo idiyakke baba owo kiet esịn Paradise oro ẹfiakde ẹwụk do ke itiendịk.—Mme N̄ke 2:20-22.
Ke ini ukara Obio Ubọn̄ Abasi, ke idak ndausụn̄ Christ Jesus, ẹyekpep mme owo nte ẹsiode nyọhọ nsụhọ n̄kpọ ekededi oro ẹnamde owo asabade ke ikpọkidem ẹfep. Adan̄aoro—idịghe idahaemi—edidi ini oro edide se ẹyomde ẹte kpukpru mme asan̄autom Abasi ẹbuana ifịk ifịk nte owo kiet kiet ye nte otu ke mme edinam oro ẹditịpde n̄kpọ ẹsịn ke edinam ofụri ererimbot asana ke akakan udomo.—Men Ezekiel 39:8-16 domo.
Mme andibọhọ utịt idiọk editịm n̄kpọ emi eyebere ye ndutịm edinam asana eke ikpọkidem emi ke ukem nsịnifịk ye ifiopesịt oro mmọ ẹdade ẹbuana ke ubịnikọt edinam asana eke n̄kan̄ spirit mfịn.—Psalm 110:3.
Isọn̄ oro ẹnamde asana eyedu ke akpanikọ, emi akakan ubịnikọt edinam ebiet asana oro akanam adade itie edibemde iso, emi Obio Ubọn̄ Abasi edinamde. Ẹyesio kpukpru mben̄e usabaden̄kpọ ẹfep. Ediwet n̄kpọ ndian ke mme efak ididụhe ke baba ebiet kiet. Mbai ekpeme, tian, mme ekpatọkpọ, efọk chewing gum ye sweet, mme n̄wedmbụk n̄kpọntịbe, ye mme magazine oro ẹduọn̄ọde ididụhe aba ndidehe esụkmbehe ekededi m̀mê mme itie ẹbietde paradise.
Ẹdat esịt ke edisana isọn̄ oro edide ke iso!
[Ndise ke page 7]
Nte afo eyebuana ke edinam asana eke ofụri ererimbot oro edide?