Mme Mbụme Ẹtode Mme Andikot
Edieke Christian ọdọn̄ọde m̀mê akade isan̄ ndien ke ntem mîkemeke ndidụk usọrọ Editi, nte enye ekpenyene ndinam usọrọ emi ke ọfiọn̄ kiet ebede?
Ke Israel eset ẹkesinịm Passover ini kiet ke isua ke ọyọhọ usen 14 ke akpa ọfiọn̄, ẹkotde Nisan (m̀mê, Abib). Edi nnyịn imokụt san̄asan̄a ndutịm ke Numbers 9:10, 11: “Dọhọ nditọ Israel, ete, Edieke okpo edisabarede owo ekededi ke otu mbufo, ye ke otu emana mbufo, m̀mê owo edikade anyanusụn̄, enye okûtre ndinịm passover nnọ Jehovah. Yak ẹnịm enye ke udiana akpa ọfiọn̄ [emi ẹkotde Iyyar, m̀mê Ziv], ke ọyọhọ usen duopenan̄, ke mbubịteyo, yak mmọ ẹta enye ye uyo eke leaven mîdụhe, ye ndotndot ikọn̄.”
Fiọk ete ke emi ikonịmke usenọfiọn̄ iba oro ẹkemede ndimek nnọ Passover (Nisan 14 m̀mê Ziv 14), emi eyen Israel m̀mê mbonufọk esie ẹnyenede ifụre ndimek, ọkọn̄ọde ke nte eferede owo ke idem. Ndutịm udia Passover ke ọyọhọ ọfiọn̄ iba ama enyene adan̄a. San̄asan̄a idaha emi ekenyene eyen Israel oro mîkasanake ke ikpọkidem ke Nisan 14 m̀mê oro okodude ke ata anyanusụn̄ isan̄ ọkpọn̄ ebiet emi ẹkenịmde usọrọ ofụri ini emi.
N̄kukụre idaha oro ẹkewetde ẹnịm emi aban̄ade nte ẹkenamde emi ntatara ntatara ekedi ke ini emi anam-akpanikọ Edidem Hezekiah akafiakde edemede edinịm Usọrọ Uyo eke Leaven Mîdụhe. Ini ikodụhe nditịm idem ke akpa ọfiọn̄ (mme oku ikeben̄eke idem mme owo ikonyụn̄ isopke idem), ntre ẹkenịm enye ke ọyọhọ usen 14 ke udiana akpa ọfiọn̄.—2 Chronicles 29:17; 30:1-5.
Ke ẹsiode mme utọ san̄asan̄a idaha ẹmi ẹfep, mme Jew ẹkesinịm Passover ke usenọfiọn̄ oro Abasi okonịmde. (Exodus 12:17-20, 41, 42; Leviticus 23:5) Jesus ye mme mbet esie ẹkenịm nte Ibet okoyomde, ikanamke n̄kpọ ye usen emi nte emama. Luke obụk ete: “Ekem osịm usen uyo eke leaven mîdụhe, eke ẹnyenede ndiwot passover ke esịt. Ndien Jesus osio Peter ye John ọdọn̄, ete, Ẹka ẹkenam passover ẹben̄e ẹnịm ẹnọ nnyịn, man nnyịn idia.”—Luke 22:7, 8.
Ke ini edinam oro Jesus ama ọtọn̄ọ usọrọ eke isua ke isua oro mme Christian ẹdiọn̄ọde nte Udia Mbubịteyo Ọbọn̄. Ufọn oro odude ke mme Christian ndidụk idịghe se ẹkpetịn̄de-tịn̄. Emi edi edinam oro edide akpan n̄kpọ akan ke isua ọnọ Mme Ntiense Jehovah. Mme ikọ Jesus ẹwụt ntak; enye ọkọdọhọ ete: “Ẹnam emi nditi Mi.” (Luke 22:19) Ntem, owo kiet kiet ke otu Mme Ntiense Jehovah kiet kiet ekpenyene ndidiomi ediwak ọfiọn̄ ke mbemiso ndinam usenọfiọn̄ oro okûnyene edinam efen ekededi. Ẹdinịm Udia Mbubịteyo Ọbọn̄ ke Tuesday, April 6, 1993, ke utịn ama okosụhọde ke n̄kann̄kụk.
Ke ibat ibat idaha ndusụk n̄kpọ oro owo mîkodorike enyịn, utọ nte udọn̄ọ m̀mê mme mfịna ukaisan̄, ẹkeme ndibiọn̄ọ Christian ndidụk nte enye okodiomide. Nso ke ẹkpenyene ndinam ke utọ idaha oro?
Ke ini usọrọ emi ẹsimen uyo eke leaven mîdụhe ye ndatndat wine ẹsan̄a ẹkanade, ndien mbon oro ẹkeyetde aran ke edisana spirit Abasi ẹnyụn̄ ẹmekde ẹnọ uwem eke heaven ẹsidia. (Matthew 26:26-29; Luke 22:28-30) Edieke owo emi esidiade kpukpru isua ọdọn̄ọde isua emi ana ke ufọk m̀mê ke ufọkibọk, mbiowo esop n̄kann̄kụk ẹyediomi owo mmọ kiet ndida ndusụk bred ye wine nsọk owo udọn̄ọ oro, eneme mme itien̄wed Bible oro ẹdotde ke ibuotikọ oro, onyụn̄ ọnọ mme n̄kpọ idiọn̄ọ oro. Edieke Christian oro ẹyetde aran mîdụhe ke esop oro enye esibuanade, enye ekpenyene ndidiomi ndika esop emi odude ke ebiet oro enye edidude ke usenọfiọn̄ oro.
Ye emi ke ekikere, edidi sụk ke ata san̄asan̄a idaha ke Christian oro ẹyetde aran edinịm Udia Mbubịteyo Ọbọn̄ usen 30 ke oro ebede (ọfiọn̄ enyọn̄ kiet), ke n̄kemuyo ye ewụhọ oro ke Numbers 9:10, 11 ye uwụtn̄kpọ oro odude ke 2 Chronicles 30:1-3, 15.
Mbon oro ẹbuanade ke otu “mme erọn̄ en̄wen” eke Jesus, emi ẹnyenede idotenyịn nsinsi uwem ke paradise isọn̄, idụhe ke idak ewụhọ ndita uyo nnyụn̄ n̄n̄wọn̄ wine emi. (John 10:16) Edi akpan n̄kpọ ndidụk usọrọ eke isua ke isua emi, edi mmọ idiaha mme n̄kpọ idiọn̄ọ emi. Ntre edieke owo mmọ kiet ọdọn̄ọde m̀mê akade isan̄ ndien ke ntem idụhe ke esop ndomokiet ke mbubịteyo oro, enye ke idemesie ekeme ndikot mme itien̄wed Abasi oro ẹdotde (ẹsịnede mbụk aban̄ade nte Jesus ọkọtọn̄ọde usọrọ emi) onyụn̄ ọbọn̄ akam eben̄e edidiọn̄ Jehovah kaban̄a edinam emi ke ofụri ererimbot. Edi ke idaha enyeemi ufọn idụhe ndinam udiana ndutịm ekededi nnọ mbono m̀mê san̄asan̄a utịn̄ikọ Bible ke ọfiọn̄ kiet ebede.