Nte Afo Emeti?
Nte afo ama ọnọ akpan ntịn̄enyịn ke mme nsiondi Enyọn̄-Ukpeme eke ndondo emi? Ke edide ntre, afo eyekụt nte enemde ndifiak nti mme n̄kpọ ẹtienede mi:
▫ Nso idi “idiọn̄ọ eti ido” oro Jehovah anamde ọnọ mme anditiene nde-ikpat Jesus? (Psalm 86:17) Enye ekedi “idatesịt edisana spirit” oro ọkọsọn̄ọde mme akpa Christian idem ndiyọ nsio nsio orụk ukọbọ oro okosịmde mmọ. (1 Thessalonica 1:6) Edi ukem ntre mfịn, ndien Jehovah, Andinọ “kpukpru eti edinọ ye kpukpru enọ eke ẹfọnde ẹma,” okop inemesịt ‘ndinọ mmọ eke ẹben̄ede enye edisana spirit.’ (James 1:17; Luke 11:13) Ntre edi idatesịt edisana spirit anam “idiọn̄ọ eti ido” odu ọnọ mme anditiene Jesus.—12/15, page 18-19.
▫ Ntak edide akpan n̄kpọ ọnọ nnyịn ndinyene ekikere Abasi kaban̄a usu nsu? Psalm 5:6 ọdọhọ ete ke Abasi “eyesobo mme osu nsu.” Ediyarade 21:8 akaiso ọdọhọ ete ke udeme kpukpru mme osu nsu edi “udiana n̄kpa.” Ntre, ndinyene ekikere Abasi kaban̄a usu nsu ọnọ nnyịn ọkpọsọn̄ ntak nditịn̄ akpanikọ ndien ke ntre ibọde enọ esie eke nsinsi uwem.—12/15, page 23.
▫ Nso ikanam uduot utuakibuot mbon Samaria? (John 4:20) Mbon Samaria, ke mbuaha utuakibuot mmọ, ẹkenyịme sụk akpa n̄wed ition oro Moses ekewetde, kpa Pentateuch, nte N̄wed Abasi. Ke n̄kpọ nte ọyọhọ isua ikie inan̄ M.E.N., mmọ ẹma ẹbọp temple ke Obot Gerizim, ke ndidomo idem ye temple Abasi ke Jerusalem. Kpa ye oro ẹkesobode temple mbon Samaria, tutu osịm mfịn emi mmọ ke ẹnịm usọrọ Passover eke isua ke isua ke Gerizim.—1/1, page 25.
▫ Nte oyom mme Christian ẹsịn udọn̄ ẹnọ ndutịm ubiọn̄ọ usabaden̄kpọ m̀mê mme ndutịm unam ebiet asana? Ke ini enye okodude ke isọn̄, Jesus ikodomoke ndikọk kpukpru mfịna n̄kaowo eke eyo esie. Ke ini Jehovah ebede ke Obio Ubọn̄ Messiah esie edinamde ẹda ndinen edumbet esie ẹsịn ke edinam ke udomo eke ofụri ererimbot, ẹyekọk mme mfịna ererimbot ofụri ofụri. Ntem, Mme Ntiense Jehovah ẹnyene ekikere oro adade ukem ukem. Ima mbọhọidụn̄ onụk mmọ ndiwụt ukpono nnọ inyene mbon en̄wen, edi nte enende mmọ ẹnịm edikwọrọ etop Obio Ubọn̄ Abasi akpa. (Matthew 6:33)—1/1, page 31.
▫ Ke mme usụn̄ ewe ke Jesus akanam n̄kpọ nte ọnọ un̄wana? (John 8:12) Jesus ama ayak idemesie esịn ke ndikwọrọ eti mbụk Obio Ubọn̄ Abasi. (Luke 4:43; John 18:37) Enye n̄ko ama ayarade mme nsu ido ukpono ndien ke ntre adade ubọhọ-ufụn eke spirit ọsọk mbon oro ẹkedude ke ufụn ido ukpono. (Matthew 15:3-9) Ke n̄wọrọnda usụn̄, enye ama owụt ke idi un̄wana ererimbot ke ndinọ mfọnmma uwem esie eke owo nte ufak. (Matthew 20:28; John 3:16)—1/15, page 10-11.
▫ Nso idi ndusụk ntak oro nnyịn ikamade Jehovah Abasi isọn nsụkibuot? Jehovah edi Andikara Ekondo, ndien ke ntak emi nnyịn imakama enye isọn nsụkibuot nnyịn. N̄ko, sia Jehovah edide ata ọkpọsọn̄, owo ndomokiet ikemeke ndikụt unen ke ndibiọn̄ọ enye, ntre nnyịn ikemeke ndifụmi nsụkibuot nnyịn nnọ enye. Ẹkebot kpukpru enyene-ifiọk edibotn̄kpọ ndinam uduak Andinam mmọ, ndien emi odori kpukpru mmọ mbiomo edisụk ibuot nnọ Abasi ke kpukpru usụn̄.—2/1, page 10, 11.
▫ Nso ikan̄wam Joseph ndibiọn̄ọ edinam use ye n̄wan Potiphar? Joseph ama enyene ọkpọsọn̄ odudu oro anamde utom ke esịt esie. Enye ama enen̄ede ekere aban̄a itie ebuana esie ye Jehovah onyụn̄ ọfiọk ete ke ndinam use ididịghe edinam idiọkn̄kpọ ndian ebe esie kpọt, edi, se idide akpan n̄kpọ ikan, ndinam ndian Abasi.—2/15, page 21.
▫ Nso ke ikọ Jesus ọkọwọrọ ke ini enye ọkọdọhọde ete: “Ami ndi . . . akpanikọ”? (John 14:6) Jesus iketịn̄ke-tịn̄ inyụn̄ ikpep akpanikọ ikpọn̄îkpọn̄; enye ama odu uwem ke enye onyụn̄ ada enye odu uwem nte owo. Ntem, Ido Ukpono Christ idịghe sụk ekikere; enye edi usụn̄ uwem.—3/1, page 15.
▫ Nso ukpepn̄kpọ oro ọnọde ndọn̄esịt ke ẹkụt ke Psalm 51? Psalm emi an̄wam nnyịn ndifiọk nte ke edieke nnyịn inamde idiọkn̄kpọ edi ikabarede esịt ke akpanikọ, ima ima Ete nnyịn eke heaven eyekop eseme nnyịn ke mbọm onyụn̄ anyan̄a nnyịn osio ke unana idotenyịn. Nte ededi, nnyịn akpan akpan ikpenyene ndikere mban̄a esuene ekededi oro ẹdoride ke enyịn̄ Jehovah.—3/15, page 18.
▫ Nso ke baptism mmọn̄ ada aban̄a? Baptism edi enyọn̄ enyọn̄ idiọn̄ọ ediyak idem nnọ Jehovah Abasi. Ndidi se ẹbụkde ke mmọn̄ owụt nte ke mbon oro ẹnade baptism mi ẹmekpa ẹwọrọ ke usụn̄ uwem eke idemmọ. Ndimenede mmọ nsio ke mmọn̄ ọwọrọ nte ke mmọ idahaemi ẹdidu uwem ẹnọ edinam uduak Abasi, ẹnịmde enye akpa ke uwem mmọ. (Matthew 16:24)—4/1, page 5-6.