Ata Eti N̄kpọ Akpa Christian

NTE BLOSSOM BRANDT OBỤKDE

Snow ama edep ke San Antonio, Texas, ke January 17, 1923, kpa usen oro n̄kamanade. An̄wa ekebebịt, edi ami n̄kamana ndụk ufiop ufiop ubọk ima ima ete ye eka Christian, Judge ye Helen Norris. Nte n̄kemede nditi ke ata ntọn̄ọ, kpukpru n̄kpọ oro ete ye eka mi ẹkanamde okowụhọ ke utuakibuot mmọ nnọ Jehovah Abasi.

KE 1910 ke ini eka mi ekedide isua itiaita, ete ye eka esie ẹma ẹwọrọ ke ebiet oro ekekperede Pittsburgh, Pennsylvania, ẹkedụn̄ ke obio-in̄wan̄ ke ikpehe ọwọrọde ọkpọn̄ Alvin, Texas. Do mmọ ẹma ẹdara ndikpep akpanikọ Bible nto mbọhọidụn̄ kiet. Mama ama esịn ini uwem esie oro okosụhọde ndinam mme owo ẹnyene udọn̄ ke idotenyịn Obio Ubọn̄. Enye akana baptism ke 1912 ke ubon ama ọkọwọrọ aka Houston, Texas.

Eka mi ye ete ye eka esie ẹkesobo ye Charles T. Russell, akpa etieibuot Watch Tower Bible and Tract Society, akpa ini ke ini enye akakade ekese esop mmọ ke Houston. Ubon emi ama esiwak ndise mban̄a mme andida ke ibuot N̄ka oro ẹsan̄ade-san̄a, emi ke ini oro ẹkesikotde mbonisan̄. Isua ifan̄ ke ukperedem, Mama ye ete ye eka esie ẹma ẹwọrọ ẹka Chicago, Illinois, ndien Brọda Russel ama aka ekese esop do n̄ko.

Ke 1918, udọn̄ọ efiomnsa ama omụm Ekaeka, ndien ke ntak emi okosụk anamde enye okop mmemidem, mme dọkta ẹma ẹnọ ekikere ẹte enye odụn̄ ke ebiet emi eyo ofiopde. Sia Eteeka akanamde utom ke ufọkutom tren Pullman, ke 1919 enye ama esịn eben̄e afiak ọnyọn̄ Texas. Do, ke San Antonio, Mama ama osobo enyene-ifịk akparawa andibuana ke esop emi ẹkotde Judge Norris. Mmọ ẹma ẹma kiet eken inikiet inikiet, ndien nte ini akakade mmọ ẹma ẹdụk ke ndọ, ndien Judge ama akabade edi ete mi.

Ete Mi Ekpep Akpanikọ Bible

Ẹkenọ Judge (ebiereikpe) esen esen enyịn̄ esie emi toto ke emana. Ke ini ete esie ke akpa okokụtde enye, enye ama ọdọhọ ete: “Nsekeyen oro etịn̄ enyịn nte ebiereikpe,” ndien oro ama akabade edi enyịn̄ esie. Ke 1917, ke ini Papa ekedide isua 16, ẹma ẹnọ enye tract oro, Where Are the Dead? ye What Is the Soul? emi Watch Tower Bible and Tract Society ekemịn̄de. Ete Papa akakpa isua iba ke edem, ndien mme tract ẹmi ẹma ẹnọ enye ibọrọ oro enye okosụk oyomde kaban̄a idaha mme akpan̄kpa. Esisịt ini ke oro ebede enye ama ọtọn̄ọ ndidụk mme mbonoesop Nditọ Ukpepn̄kpọ Bible, nte ẹkesidiọn̄ọde Mme Ntiense Jehovah adan̄aoro.

Papa ama ọsọsọp oyom ndibuana ke mme edinam esop. Enye ama ọbọ efakutom emi enye edikemede ndikwọrọ ikọ, ndien ke n̄wed asuanade enye eyewat ke enan̄ukwak esie aka ndikasuan mme tract. Enye ama esịn idem ofụri ofụri ke ndibuana idotenyịn Obio Ubọn̄, ndien ke March 24, 1918, enye ama ayarade uyakidem esie nnọ Jehovah ke mmọn̄ baptism.

Ke isua oro eketienede ke ini Mama ọkọwọrọde okodụn̄ ke San Antonio, Papa ama ọsọsọp ama se enye ọkọdọhọde nte edide “inem inem inua imam ye blu blu enyịn” oro enye akanam mîkwe. Ikebịghike mmọ ẹma ẹnam ẹfiọk nte ke mmimọ imọn̄ idọ ndọ, edi ikedịghe mmemmem n̄kpọ ndinam ete ye eka Mama ẹnyịme. Edi, ke April 15, 1921, udianndọ ama ada itie. Mmọ mbiba ẹkenyene utom ukwọrọikọ uyọhọ-ini nte utịtmbuba mmọ.

Akpa Ntọn̄ọ ke Utom Ukwọrọikọ

Ke ini Papa ye Mama ẹkesịnde idem ẹnam ndutịm man ẹdụk mbono ke Cedar Point Ohio, ke 1922, mmọ ẹma ẹdifiọk ete ke Mama ama oyomo mi. Esisịt ini ke mma n̄kamana, ke ini Papa ekedide isua 22 kpọt, ẹma ẹmek enye esenyịn utom esop. Emi ọkọwọrọ nte ke enye ekenyene ndinam kpukpru ndutịm an̄wautom. Urua ifan̄ kpọt ke mma n̄kamana, Mama ama emen mi aka utom ukwọrọikọ eke to ke enyịnusụn̄ sịm enyịnusụn̄. Ke akpanikọ, eteeka ye ekaeka mi n̄ko ẹma ẹsima ndida mi nsan̄a ye mmọ ke an̄wautom.

Ke ini n̄kedide isua iba kpọt, ete ye eka mi ẹma ẹwọrọ ẹka Dallas, Texas, ndien mmọ ẹma ẹtọn̄ọ utom ukwọrọikọ uyọhọ-ini nte mme asiakusụn̄ isua ita ke ukperedem. Ke okoneyo mmọ ẹyena ke ekpri n̄kpana mbonisan̄ ke mbenusụn̄ ẹde ẹnyụn̄ ẹnịm mi ke n̄kpọitie edem moto. Nte ededi, ami n̄kekere ke emi edi n̄kpọ mbubru, edi ikebịghike ama ana in̄wan̄în̄wan̄ nte ke mmọ iketịmke idem inọ uwem usiakusụn̄ kan̄a. Ntre Papa ama ọtọn̄ọ mbubehe. Nte ini akade, enye ama ọbọp ekpri ufọkisan̄ ke ntịmidem ndifiak ntọn̄ọ usiakusụn̄.

Mbemiso n̄kọtọn̄ọde ufọkn̄wed, Mama ama ekpep mi nte ẹkotde ẹnyụn̄ ẹwetde n̄kpọ, mma nnyụn̄ ndiọn̄ọ nte ẹdade mme nọmba efen ẹnam awak ke itie inan̄. Ntịn̄enyịn esie kpukpru ini ekedi ndin̄wam mi n̄kpep n̄kpọ. Enye ama esidịbede mi odori ke n̄kpọitie ekpere idemesie man n̄kpọkwọhọde mme usan oro enye okosụk eyetde, ndien enye ama esikpep mi ndikot mme itien̄wed ke ibuot nnyụn̄ n̄kwọ mme ikwọ Obio Ubọn̄, m̀mê mme ikwọ Abasi, nte nnyịn ikesikotde mmọ ini oro.

Ndinam N̄kpọ Abasi ye Ete ye Eka Mi

Ke 1931 kpukpru nnyịn ima idụk aduai-owo idem mbono ke Columbus, Ohio, ke ebiet emi nnyịn ikọbọde enyịn̄ oro Mme Ntiense Jehovah. Okposụkedi n̄kedide isua itiaita kpọt, mma n̄kere ke enye ekedi enyịn̄ oro enemde akan emi akanam ami n̄kopde. Esisịt ini ke ima ikọnyọn̄ ufọk, ikan̄ ama ata itie mbubehe Papa, ndien Papa ye Mama ẹkeda emi nte ke edi “uduak Ọbọn̄” nte yak mmọ ẹfiak ẹtọn̄ọ usiakusụn̄. Ntem, ọtọn̄ọde ke ndaeyo eke 1932, nnyịn ima idara ediwak isua ke utom ukwọrọikọ uyọhọ-ini.

Ete ye eka mi ẹkesiak usụn̄ ke ufọt ufọt Texas man ẹdu ẹkpere ete ye eka Mama, ẹmi ẹkesụk ẹdude ke San Antonio. Ndikpọn̄ efakutom kiet n̄ka eken ọkọwọrọ ami ndikpụhọ ufọkn̄wed ndien ndien. Ndusụk ini mme ufan oro mîtịmke ikere n̄kpọ ẹma ẹsidọhọ ete, “Ntak emi mbufo mîsụhọkede itetie nde kiet inyụn̄ ibọp ufọk isịn eyen oro,” nte n̄kpọ eke edide owo ikesehe mi enyịn mfọn mfọn. Edi ami n̄kekere ke nnyịn ima ikop inem uwem ye nte ke ami ke n̄kan̄wam Papa ye Mama ke utom ukwọrọikọ. Ke akpanikọ, ke ẹkenọ mi ukpep ẹnyụn̄ ẹtịm mi idem ẹnọ se idikabarede idi usụn̄uwem mi ke ukperedem.

Ke ediwak ọfiọn̄ mma nsikaiso ndisian Papa ye Mama nte ke mmọn̄ nna baptism, ndien mmọ ẹma ẹsiwak ndineme nneme ye ami mban̄a oro. Mmọ ẹkeyom ndikụt nte ke ami mmọfiọk adan̄a nte ubiere mi oro edide akpan n̄kpọ. Ke December 31, 1934, usen ama edikem ọnọ akpan n̄kpọntịbe emi ke uwem mi. Nte ededi, ke okoneyo mbemiso usen oro, Papa ama okụt ete ke mmaka mbịne Jehovah ke akam. Ndien enye ama anam ediye n̄kpọ kiet. Enye ama anam kpukpru nnyịn itọn̄ọ edọn̄, ndien enye ama ọbọn̄ akam. Enye ama asian Jehovah ete ke imọ imenem esịt etieti iban̄a ubiere ekpri eyenan̄wan esie emi ndiyak uwem esie nnọ Enye. Afo emekeme ndinịm ke akpanikọ ete, ke ami ndifreke okoneyo oro tutu amama ke ofụri ini uwem mi!

Ukpep Otode Eteeka ye Ekaeka Mi

Ke ufọt 1928 ye 1938, mma mbiat ekese ini ke ndisika n̄kese eteeka ye ekaeka mi ke San Antonio. Ndutịm unam n̄kpọ mmọ ekedi ukem ye eke ete ye eka mi. Ekaeka ekedi asuan n̄wed ido ukpono, nte ẹkesikotde mme asiakusụn̄, ndien ekem enye ama akabade edi asiakusụn̄ ibio ini. Ẹkemek Eteeka asiakusụn̄ ke December 1929, ntre ndiwọrọ an̄wautom kpukpru ini ekesidi edinam ofụri usen.

Eteeka ama esimụm mi ke ubọk esie ke okoneyo onyụn̄ ekpep mi mme enyịn̄ ntantaọfiọn̄. Enye ama esitịn̄ uto ọnọ mi ke ibuot. Mma nsinam ekese isan̄ ye enye ke tren Pullman ke ini enye akanamde utom ọnọ ufọkutom tren. Enye kpukpru ini ekedi owo oro n̄kesikade mbịne ke ini n̄kesinyenede mfịna; enye ama esinọ mi ndọn̄esịt onyụn̄ ọkwọhọde mi mmọn̄eyet efep. Edi, ke ini ẹkesimiade mi ke ntak idiọkido ndien ami n̄kade mbịne enye ndiyom ndọn̄esịt, enye n̄kukụre ẹkesidọhọ (mme ikọ oro mîkesin̄wan̄ake mi ini oro, edi mme uyo ikọ oro ẹma ẹtịm ẹn̄wan̄a): “Edima, ke owo anamde idiọkn̄kpọ, ana ọbọ ufen.”

Mme Isua Ukọbọ

Ke 1939, Ekọn̄ Ererimbot II ama ọtọn̄ọ, ndien ikọt Jehovah ẹma ẹsobo ukọbọ ye afai otode otu mbon ntịme. Ke utịt utịt 1939, Mama ama ọdọn̄ọ n̄kpa n̄kpa ndien ke akpatre ama oyom usiakidem, ntre nnyịn ima ifiak inyọn̄ San Antonio.

Nte nnyịn inamde utom magazine ke mme efak San Antonio otu mbon ntịme ẹma ẹsisop idem ọtọkiet. Edi kpukpru urua, nte ubon, nnyịn owo kiet kiet ima isidu do, ke ebiet oro anade nnyịn inam utom. Mma nsiwak ndida nse nte mmọ ẹdụride Papa ẹka itieutom bodisi.

Papa ama an̄wana ndikaiso nnam utom usiakusụn̄ kpa ye oro Mama ama eketre ndinam. Nte ededi, enye ikekemeke ndinyene okụk oro ekemde ke ndinam utom ibio ini, ke ntre enye n̄ko ekenyene nditre. Mma n̄kụre ufọkn̄wed ke 1939, ndien ami n̄ko mma nnyene utom.

Enyịn̄ Papa oro, Judge (ebiereikpe) ekedi n̄kpọ un̄wam ke mme isua oro. Ke uwụtn̄kpọ, otu mme ufan ẹma ẹka ndinọ ikọ ntiense ke obio oro okodude ke edem edere San Antonio, ndien akwa owo ufọkesop ama ọtọn̄ọ ndimụm kpukpru mmọ ndọn̄ ke ufọk-n̄kpọkọbi. Enye ama omụm n̄kpọ nte owo 35, esịnede eteeka ye ekaeka mi. Mmọ ẹma ẹnọ etop ẹsọk Papa, ndien enye ama awat aka do. Enye ama asan̄a odụk ọfis akwa owo ufọkesop oro onyụn̄ ọdọhọ ete: “Ami ndi Judge Norris otode San Antonio.”

Akwa owo ufọkesop oro ama obụp ete, “Ih Ete, Ebiereikpe, nso ke n̄keme ndinam nnọ fi?”

Papa ama ọbọrọ ete, “N̄kedi ndinam ẹsion̄o mbon ẹmi ke ufọk-n̄kpọkọbi.” Ye oro akwa owo ufọkesop oro ama asana mmọ ayak ye unana edibọ ubiọn̄—ndien mbụme efen efen ikodụhe!

Papa ama esima ndinọ ikọ ntiense ke mme ufọkutom oro ẹkedude ke esịt obio, ndien enye akpan akpan ama esima ndisobo ye mme ebiereikpe ye mme lọya. Enye ama esidọhọ owo oro esede aban̄a isenowo ete: “Ami ndi Judge Norris, ndien n̄kedi ndikụt Ebiereikpe Ntem-ye-Ntem.”

Ndien, ke ini enye osobode ye ebiereikpe oro, enye kpukpru ini ama esibem iso etịn̄ ete: “Idahaemi, mbemiso ntịn̄de mban̄a uduak ediwaha mi, nyom ndinam an̄wan̄a nte ke ami mma ndedi Ebiereikpe ebịghi akan nte afo edide. Ami ndi oro ke ofụri uwem mi.” Ndien ekem enye eyenam an̄wan̄a nte enye akasan̄ade enyene enyịn̄ oro. Emi eyenam mmọ ẹtọn̄ọ nneme oro ke ido ufan, ndien enye ama ọkọri ediwak eti itie ebuana ye mme ebiereikpe ke ini oro.

Esịtekọm Kaban̄a Ndausụn̄ Otode Ete ye Eka

Ami n̄kodu uwem ke isua uyen oro eketiede ntịme ntịme, ndien mmọfiọk ke idem ama esinyek Papa ye Mama ediwak ini nte mmọ ẹkesụk ẹsede mi ẹnyụn̄ ẹkerede ẹban̄a n̄kpọ efen oro ndinamde. Nte kpukpru nditọwọn̄ ẹsinamde, mma nsidomo Papa ye Mama nse ediwak ini, mma nsiyom mmọ ẹnam n̄kpọ mîdịghe ẹyak n̄ka mme ebiet oro mma n̄kọfọfiọk ke mbemiso nte ke ibọrọ mmọ edidi ih-ih. Ndusụk ini mma nsitua. Ke akpanikọ, akpakabiak mi etieti edieke ekpedide mmọ ẹma ẹsidọhọ: “Kaiso, nam se afo amade. Nnyịn ifịnake.”

Ndidiọn̄ọ nte ke n̄kekemeke ndinyịk mmọ ẹkpụhọde mme idaha mmọ ama anam mi nnyene ekikere edidu ke ifụre. Ke akpanikọ, emi ama anam edi mmemmem n̄kpọ ọnọ mi ke ini n̄kparawa owo eken ẹkenọde ekikere ẹban̄a unọ idem inemesịt oro mîfọnke, koro ami mma n̄keme ndidọhọ: “Ete mi idinyịmeke n̄ka.” Ke ini n̄kedide isua 16, Papa ama anam mi n̄kpep nte ẹwatde moto onyụn̄ okụt ete ke mma mbọ n̄wed unyịme uwat moto mi. N̄ko, ke ukem ini oro enye ama ọnọ mi ukpọhọde ufọk n̄kama. Ama enem mi esịt etieti nte ke enye ama enyene mbuọtidem ke idemmi. N̄ketie nte akamba owo, ndien oro ama anam ami nnyene edu ubiom mbiomo ye udọn̄ nditre ndibiat mbuọtidem oro mmọ ẹkenyenede.

Ke ini oro item kaban̄a ndọ ikawakke, edi Papa ama ọfiọk Bible ye se enye etịn̄de aban̄a edidọ “owo Abasi ikpọn̄îkpọn̄.” (1 Corinth 7:39) Enye ama etịn̄ ọnọ mi in̄wan̄în̄wan̄ nte ke edieke ndimende akparawa ererimbot ndi ufọk, m̀mê idem ndiwọrọ an̄wa ye akparawa ererimbot, ke emi ediwọrọ enyene-ndịk edikpu ọnọ imọ. Mma mfiọk nte ke enye ama enen, koro mma n̄kụt inemesịt ye edidianakiet oro okodude ke ndọ mmọ sia mmọ ẹkedọde “owo Abasi.”

Ke 1941, ke ini n̄kedide isua 18, n̄kekere ke mma mma akparawa kiet ke esop. Enye ekedi asiakusụn̄ ndien ke ekekpep n̄wed ndikabade ndi lọya. Mma n̄kop nduaidem etieti. Ke ini iketịn̄de inọ ete ye eka mi ite ke imọn̄ idọ ndọ, utu ke mmọ ndiwụt unana edinyịme m̀mê ndikpan nnyịn, mmọ n̄kukụre ẹkedọhọ ete: “Nnyịn iyema ndiben̄e fi n̄kpọ kiet, Blossom. Nnyịn ikere ke afo emekpri akaha, ndien nnyịn ikpama ndiben̄e afo ebet ke isua kiet. Edieke ata ima odude, isua kiet ibịghike ikaha.”

Ami mmokop inemesịt etieti koro n̄kakpan̄de utọn̄ nnọ ọniọn̄ ọniọn̄ item oro. Ke ufan̄ isua kiet oro, mma mfiak n̄kọri nnyụn̄ ntọn̄ọ ndikụt nte ke akparawa emi ikenyeneke mme edu oro edinamde enye edi eti nsan̄andọ. Enye ke akpatre ama ọkpọn̄ esop, ndien ami mma mbọhọ se ikpakadade afanikọn̄ isọk mi ke uwem. Nso utịben̄kpọ ke edi ntem ndinyene ọniọn̄ ọniọn̄ ete ye eka oro ẹkemede ndiberi edem ke ubiere mmọ!

Ndọ ye Utom Oro Ẹsan̄ade-San̄a

Ke ini etuep eke 1946, ke mma n̄kanam utom usiakusụn̄ ye utom idịbi udia ubak ini ke isua itiokiet, nye n̄kan akparawa oro akanam ami nsobode ama asan̄a odụk Ufọkmbono Obio Ubọn̄ nnyịn. Ẹkenọ Gene Brandt ndinam utom nte nsan̄a asan̄autom nditọete oro asan̄ade-san̄a, nte ẹkesikotde esenyịn circuit ini oro. Emi ekedi udọn̄ edem mbiba, ndien ke August 5, 1947, nnyịn ima idọ ndọ.

Ikebịghike, Papa ye Gene ẹma ẹsiak ọfis esede n̄kpọ aban̄a ubatokụk. Edi Papa ama ọdọhọ Gene ete: “Usen eke ọfis emi editrede nnyịn mbonoesop m̀mê utom ukara Abasi, ami nyekọbi ọfis emi nnyụn̄ ntop eyen ukpọhọde nduọk.” Jehovah ama ọdiọn̄ ekikere eke spirit emi, ndien ọfis oro ama anam ekese ke ndinọ mme n̄kpọ obụkidem oro ẹyomde ke udomo oro ekemde onyụn̄ ọnọ nnyịn ini ndinam utom usiakusụn̄. Papa ye Gene ẹkedi nti mme anam mbubehe, ndien nnyịn ikpokoforo ata mmemmem mmemmem, edi akananam oro ikedịghe utịtmbuba mmọ.

Ke 1954, ẹma ẹnọ Gene ikot ndinam utom circuit, emi ọkọwọrọde akamba ukpụhọde ke uwem nnyịn. Didie ke ete ye eka mi ẹdinam n̄kpọ? Inikiet efen, mmọ ikekereke iban̄a idemmọ edi ẹkekere ẹban̄a mme udọn̄ n̄kpọ Obio Ubọn̄ Abasi ye mfọnọn̄kpọ eke spirit nditọ mmọ. Mmọ akananam idọhọke nnyịn ite: “Ntak emi mbufo mînọhọ nnyịn nditọ nditọ?” Utu ke oro, ẹkesidọhọ kpukpru ini ẹte: “Nso ke nnyịn ikeme ndinam man in̄wam mbufo ke utom uyọhọ-ini?”

Ntre ke ini usen ekedide edikem ọnọ nnyịn ndidaha, edi mme ikọ nsịnudọn̄ ye idatesịt kaban̄a akwa ifetutom nnyịn kpọt ẹkedu. Mmọ akananam inamke nnyịn ikere ke nnyịn imotop mmọ iduọk edi ẹma ẹsinọ nnyịn ọyọhọ ibetedem. Ke nnyịn ima ikadaha, mmọ ẹma ẹkaiso ndinam utom usiakusụn̄ ifịk ifịk ke isua duop efen. Ẹma ẹmek Papa nte esenyịn obio San Antonio, kpa itieutom emi enye akakamade ke isua 30. Enye ama adat esịt ndikụt n̄kọri ọtọn̄ọde ke esop kiet oro okodude ke obio oro ke mme iduọk isua 1920 osịm esop 71 mbemiso enye akakpade ke 1991.

Kaban̄a ami ye Gene, uwem ọkọyọhọ ye nduaidem. Nnyịn ima inyene akwa idatesịt ndinam n̄kpọ nnọ ndima nditọete nnyịn iren ye iban ke se iwakde ikan stet 31 ndien, eyedi se idide n̄kponn̄kan ke otu kpukpru mmọ, ekedi ifet edidụk ọyọhọ otu 29 eke Watchtower Bible School of Gilead ke 1957. Ke oro ama ekebe nnyịn ima ifiak ika utom oro ẹsan̄ade-san̄a. Ke 1984, ke ima ikanam utom circuit ye district ke isua 30, N̄ka ke mfọnido ama ọnọ Gene utom circuit ke San Antonio, sia ete ye eka mi ẹkedude ke iduọk isua 80 mmọ ye ke unana nsọn̄idem.

Ndise Mban̄a Ete ye Eka

Ekedi isua kiet ye ubak kpọt ke ima ikafiak inyọn̄ San Antonio Mama ama ọduọ idiọk udọn̄ọ onyụn̄ akpa. Emi okotịbe ata usọp usọp tutu ami n̄kekemeke nditịn̄ ndusụk n̄kpọ oro n̄koyomde nditịn̄ nnọ enye. Emi ama ekpep mi ndineme ekese nneme ye Papa. Ke ẹma ẹkedọ ndọ ke isua 65, enye ama ataba Mama idiọk idiọk, edi nnyịn ima idu ndinọ enye ima ye ibetedem.

Uwụtn̄kpọ ofụri eyouwem Papa kaban̄a edidụk mme mbonoesop Christian, ukpepn̄kpọ, ye an̄wautom ama akaiso tutu ke n̄kpa esie. Enye ama esima ndikot n̄wed. Sia enye ekenyenede ndidu ikpọn̄ ke adan̄aemi nnyịn idude ke utom, ami mma nsidi ufọk nnyụn̄ mbụp enye nte, “Nte ama okop ndobo?” Enye ke ekesịn idem ọkpọsọn̄ ọkpọsọn̄ ke ndikot n̄wed nnyụn̄ n̄kpep n̄kpọ, utọ ekikere oro ikodụkke-dụk enye ekikere.

Ama odu edu ofụri eyouwem efen oro nnyịn ikakade iso ndinyene. Papa ama esisọn̄ọ eyịre ete ubon ẹdia udia ọtọkiet kpukpru ini, akpan akpan ke ini udia usenubọk, emi ẹkesinemede Itien̄wed Abasi eke usen ke usen. Akananam owo ikayakke mi n̄kpọn̄ ufọk ke owo mînamke oro. Ndusụk ini mma nsidọhọ: “Edi Papa, ini n̄wed (m̀mê utom) ọmọn̄ ebe mi.”

Enye ama esidọhọ ete, “Idịghe edineme itien̄wed anam ini ebe fi; afo ukudemekede ke eti ini.” Ndien n̄kesinyene nditie nnyụn̄ nnọ n̄kpan̄utọn̄. Enye ama okụt ete ke eti uwụtn̄kpọ emi ama odu tutu osịm akpatre usen uwem esie. Emi edi n̄kpọ akpa efen oro enye ọkọkpọn̄de ọnọ mi.

Papa ama odu ke edidemede ke n̄kan̄ ekikere tutu osịm akpatre. Se ikanamde edise mban̄a enye edi mmemmem ekedi nte ke akanam enye ifịnake idem inyụn̄ isemeke eseme. Oh, ndusụk ini enye ama esitịn̄ aban̄a udọn̄ọ ọkpọ esie, edi mma nsiti enye nte ke se inen̄erede ibiak enye edi unana mfọnmma oro enye ọkọbọde oto Adam,” ndien enye eyesak. Nte ami ye Gene iketiede ke n̄kan̄ esie, Papa ama ede ifụre ifụre ke n̄kpa ke usenubọk November 30, 1991.

Ami mmebe isua 70 idahaemi ke emana ndien ke nsụk nnyenyene ufọn nto uwụtn̄kpọ ima ima ete ye eka Christian mi. Ndien edi akam ofụri esịt mi nte ami n̄kpakam n̄wụt ọyọhọ esịtekọm nnọ n̄kpọ akpa emi ebe ke ndida enye nnam n̄kpọ nte odotde ke ofụri ini uwem mi.—Psalm 71:17, 18.

[Ndise ke page 5]

Ami ye Mama

[Mme ndise ke page 7]

1. Akpa akamba mbono oro n̄kodụkde: San Marcos, Texas, September 1923

2. Akpatre akamba mbono oro Papa okodụkde: Fort Worth, Texas, June 1991 (Papa etetie)

[Ndise ke page 9]

Gene ye Blossom Brandt