Ete Ye Eka Nnyịn Ẹma Ẹkpep Nnyịn Ndima Abasi

NTE ELIZABETH TRACY OBỤKDE

Iren ẹmi ẹkamade n̄kpọ ekọn̄, ẹmi ẹkebakde ẹda otu mbon ntịme ẹbiọn̄ọ nnyịn ke usen oro, ẹma ẹnyịk Papa ye Mama ẹsio ke moto. Ami ye adiaha eka mi ikodu ikpọn̄ ke n̄kpọitie edem, iyịkde m̀mê iyafiak ikụt ete ye eka nnyịn tutu amama. Nso ikada ikesịm utọ enyene-ndịk ifiọk n̄kpọntịbe emi ikpere Selma, Alabama, U.S.A., ke 1941? Ndien nso ebuana ke mme ukpepn̄kpọ oro ikọbọde ito ete ye eka nnyịn ẹkenyene ye enye?

IMAN kiet ọkọbọk ete mi, Dewey Fountain, ke obio-in̄wan̄ kiet ke Texas ke ete ye eka esie ẹma ẹkekpan̄a ke ini enye okosụk edide nsek. Ke ukperedem enye ama akanam utom ke itieutom usio aran. Ke 1922, ke ini ekedide isua 23, enye ama ọdọ Winnie, ediye n̄kaiferi otode Texas, onyụn̄ ọtọn̄ọ ndinam ndutịm ndisụhọde ntie nnyụn̄ ntọn̄ọ ubon.

Enye ama ọbọp ufọk ke ikọt eto edem usiahautịn Texas ekperede ekpri obio Gerrison. Enye ama ọtọ nsio nsio mfri do, esịnede mfriukịm ye ibokpot. Enye ama ọbọk kpukpru orụk ufene n̄ko. Nte ini akade, nnyịn ima imana—ekpri Dewey ke May 1924, Edwena ke December 1925, ndien ke June 1929, ami mma mmana.

Ndikpep Akpanikọ Bible

Papa ye Mama ẹkekere ke imọdiọn̄ọ Bible, sia mmọ ẹkedide mbon Church of Christ. Edi ke 1932, G. W. Cook ama ọkpọn̄ n̄wed Deliverance ye Government, ẹmi Watch Tower Society okosiode, ọnọ eyeneka Papa, Monroe Fountain. Ye ọkpọsọn̄ udọn̄ ndibuana se enye ekekpepde ye ete ye eka mi, Monroe ama esiwak ndidi ke ini udia usenubọk, okot ibuotikọ kiet ke Enyọn̄-Ukpeme, ndien “ke ndudue” ayak magazine oro enịm. Ke oro ebede, Papa ye Mama ẹyekot magazine oro.

Ke usenubọk Sunday kiet Monroe ama ọnọ Papa ikot ndidụk ukpepn̄kpọ Bible ke ufọk mbọhọidụn̄ kiet. Enye ama ọsọn̄ọ etịn̄ ete ke Ete Cook ekeme ndida Bible mbọrọ kpukpru mbụme esie. Ke Papa ama ọkọnyọn̄ ukpepn̄kpọ oro edi, enye ama asian ubon ye nduaidem ete: “Ẹma ẹbọrọ kpukpru mbụme mi mma nnyụn̄ mbọ mme ntọt efen efen! N̄kekere nte ke mma mfọfiọk kpukpru oro, edi ke ini Ete Cook ọkọtọn̄ọde ndinam n̄kpọ aban̄ade hell, ukpọn̄, uduak Abasi kaban̄a isọn̄, ye nte Obio Ubọn̄ Abasi edidade enye edi an̄wan̄a, mma ntọn̄ọ ndikere ke n̄kọdiọn̄ọke n̄kpọ ndomokiet mban̄a Bible!”

Ufọk nnyịn eketie nte iwụk ebiet ebuana otuowo. Iman ye mme ufan ẹma ẹsidi ẹdidu ye nnyịn, ẹnam inịn̄e inịn̄e uyo ye edisan̄ ibokpot, ẹnyụn̄ ẹkwọ ikwọ nte Mama ebrede piano. Sụn̄sụn̄ mme nneme Bible ẹma ẹkabade ẹda itie mme n̄kpọ ẹmi. Okposụkedi nnyịn nditọwọn̄ mîkekemeke ndifiọk kpukpru se ẹketịn̄de, ọkpọsọn̄ ima oro ete ye eka nnyịn ẹkenyenede ẹnọ Abasi ye Bible ama etịm owụt idem tutu nnyịn nditọwọn̄ kiet kiet ima ikọri ukem ima oro inọ Abasi ye Ikọ Esie.

Mme ubon efen n̄ko ẹma ẹneme mme nneme Bible eke urua ke urua ke ufọk mmọ, ẹmi nte ido edide ẹkesikọn̄ọde ke ibuotikọ kiet ke obufa magazine Enyọn̄-Ukpeme. Ke ini mme ubon ke mbọhọ obio Appleby ye Nacogdoches ẹkesinọde ufọk mmọ ẹda ẹnịm mme mbono esop oro, nnyịn ima isifaha idụk ubomisọn̄ nnyịn ẹkotde Model A Ford iwat ika do, ekpedi edịm edep m̀mê eyo ada.

Ndinam Se Mmọ Ẹkekpepde

Ikebịghike ete ye eka nnyịn ẹma ẹtọn̄ọ ndikụt ke oyom inam n̄kpọ. Ndima Abasi oyom ete ẹbuana se ẹkekpepde ye mbon efen. (Utom 20:35) Edi owo nditan̄a mbuọtidem esie an̄wan̄wa ekedi n̄kpọ-ata, akpan akpan sia ete ye eka nnyịn ke ndammana usụn̄ ẹkedide mbon o-bụt, mme usụhọde owo. Kpa ye oro, ima emi mmọ ẹkenyenede ẹnọ Abasi ama onụk mmọ, ndien nte utịp emi ama an̄wam mmọ ndikpep nnyịn ndinyene ọkpọsọn̄ mbuọtidem ke Jehovah. Papa ekesịn enye ke usụn̄ emi: “Jehovah anam mme ọtọin̄wan̄ ẹdi mme ọkwọrọikọ!” Ke 1933, Papa ye Mama ẹma ẹyarade uyakidem mmọ nnọ Jehovah ebe ke baptism mmọn̄ ke n̄kpọdiọhọ mmọn̄ ubọkiyak emi ekperede Henderson, Texas.

Ke ntọn̄ọ ntọn̄ọ 1935, Papa ama ewet Watch Tower Society obụp ediwak mbụme kaban̄a idotenyịn nsinsi uwem Christian. (John 14:2; 2 Timothy 2:11, 12; Ediyarade 14:1, 3; 20:6) Enye ama ọbọ ibọrọ nnennen nnennen oto Joseph F. Rutherford, etieibuot N̄ka ini oro. Utu ke ndibọrọ mme mbụme esie, Brọda Rutherford ama ọnọ Papa ikot ndidụk akamba mbono eke Mme Ntiense Jehovah ke Washington, D.C., ke May.

Papa ama ekere ete: ‘Ndikemeke ndidụk! Nnyịn idi mme ọtọin̄wan̄ ẹmi inyenede isọn̄ okponde ke hectare 26 emi itọde mme ikọn̄ udia. Ini oro ke ẹnyene ndikpen̄e enye kpukpru nnyụn̄ mmen n̄ka urua.’ Nte ededi, ikebịghike ke oro ebede, ukwọ ama edi onyụn̄ edibiat se enye ọkọnọde nte ntak—mfri, mme ọkọ, ye mme ebọp. Ntre nnyịn ima isan̄a ye Mme Ntiense eken ke bọs oro ẹkebọde ke ukpeokụk emi akadade nnyịn kilomita 1,600 ebe ufọt edem edere ye edem usiahautịn ekesịm mbono oro.

Ke mbono oro Papa ye Mama ẹma ẹkop idatesịt ndikpan̄ utọn̄ nnọ in̄wan̄în̄wan̄ edinam mbon ẹmi ẹdide “akwa udịmowo” ẹmi ẹdibọhọde “akwa ukụt” an̄wan̄a. (Ediyarade 7:9, 14, King James Version) Ke ofụri ini uwem mmọ, idotenyịn nsinsi uwem ke paradise isọn̄ ama edemede udọn̄ Papa ye Mama, ndien mmọ ẹma ẹsịn udọn̄ ẹnọ nnyịn nditọ ‘ndimụm uwem eke edide ata uwem n̄kama,’ emi akan̄wan̄ade nnyịn nte ke ọwọrọ nsinsi uwem ke isọn̄ emi Jehovah ọnọde. (1 Timothy 6:19; Psalm 37:29; Ediyarade 21:3, 4) Idem okposụkedi n̄kedide isua ition kpọt, ndidu ye ubon nnyịn ke inem inem edinam emi ama enen̄ede enem mi.

Ke ima ikọnyọn̄ mbono oro idi, ubon nnyịn ama afiak ọtọ mme mfri, ndien ima idọk ata ekese ikan nte akananam idọkde. Emi ke akpanikọ ama an̄wam ndinam Papa ye Mama ẹnịm ke akpanikọ nte ke ndinyene ọyọhọ ibetedem ke Jehovah iditreke ndida mme utịp ndi. Mmọ ẹma ẹtọn̄ọ akpan orụk ukwọrọikọ emi mmọ kiet kiet ẹkenyịmede ndibiat hour 52 kpukpru ọfiọn̄ ke utom ukwọrọikọ. Ndien ekem, ke ini utọ efen ama ekedi, mmọ ẹma ẹnyam kpukpru se mmọ ẹkenyenede! Papa ama anam ẹbọp ufọkisan̄ emi ekedide mita itiokiet ke uniọn̄ ye mita 2.4 ke ubom ẹnọ nnyịn mbition ndidụn̄, ndien enye ama edep ata obufa Ford emi enyenede usụn̄ iba man ẹsida ẹdụri enye. Monroe ama anam ukem oro, ndien enye n̄ko ama ọwọrọ okodụn̄ ke ufọkisan̄ ye ubon esie.

Ndikpep Nnyịn Akpanikọ

Papa ye Mama ẹketọn̄ọ usiakusụn̄, nte ẹkotde utom ukwọrọikọ uyọhọ ini, ke October 1936. Nnyịn ima itọn̄ọ ndikwọrọ ikọ nte ubon ke edem usiahautịn Texas oro owo mîkesiwakke ndida etop Obio Ubọn̄ nsịm. Ke se ikperede ndisịm isua kiet, nnyịn ima isisan̄a to ke ebiet kiet sịm eken, edi ke ofụri ofụri, usụn̄uwem emi ama enen̄ede enem nnyịn. Papa ye Mama ẹma ẹkpep nnyịn ebe ke ikọ ye edinam mmọ nditie nte mme akpa Christian ẹmi ẹkesịnde idem ke ndinam akpanikọ Bible ebe esịm mbon efen.

Nnyịn nditọ ima ima eka nnyịn akpan akpan kaban̄a n̄waidem oro enye akanamde ebe ke ndikpọn̄ ufọk esie. Nte ededi, odu n̄kpọ kiet oro enye mîkenyịmeke ndikpọn̄, ndien oro ekedi masịn ukịm ọfọn̄ esie. Oro ekedi eti ubiere n̄ko. Ye ukeme esie nte ekịmọfọn̄, kpukpru ini enye ama esinam nnyịn isịne nti ọfọn̄. Ke mbono kiet kiet, nnyịn ima isinyene ndiye mbufa ọfọn̄ ndisịne.

Mmetịm nti ini emi Herman G. Henschel ekedide n̄kann̄kụk nnyịn ye ubon esie ke ubomisọn̄ usuanetop Watch Tower Society. Mmọ ẹyenịm ubomisọn̄ oro ke ebiet oro ẹdụn̄de ẹwak, ẹbre ibio ibio utịn̄ikọ oro ẹkemụmde-mụm ẹnịm, ndien ekem ẹnam ọkpọkpọ edika n̄kese mme owo man ẹnọ mmọ ntọt efen efen. Ekpri Dewey ama adara itie ufan ye Milton, eyen Herman, emi mîkesịmke isua 20 ini oro. Idahaemi Milton edi etieibuot Watch Tower Society.

Ke akamba mbono eke 1937 ke Columbus, Ohio, Edwena ama ana baptism, ndien ẹma ẹnọ Papa ye Mama ifet ndinam utom nte mme akpan asiakusụn̄. Ke ini oro, utom oro ama abuana edibiat ke nsụhọde n̄kaha hour 200 ke ọfiọn̄ ke utom ukwọrọikọ. Nte mfiakde nse edem, mmokụt udomo nte eti uwụtn̄kpọ Mama an̄wamde mi ndinọ ebe mi ibetedem ke mme utom Christian esie.

Ke ini Papa ama ọkọtọn̄ọ ukpepn̄kpọ Bible ye ubon kiet, enye ama asan̄a ye nnyịn nditọ aka man idi in̄wan̄în̄wan̄ uwụtn̄kpọ inọ nditọ mmọ. Enye ama anam nnyịn ikụbọde inyụn̄ ikot mme itien̄wed Bible inyụn̄ ibọrọ ndusụk ke otu mme akpan mbụme. Nte utịp, ediwak ke otu n̄kpri owo oro nnyịn ikekpepde n̄kpọ ke ẹnam n̄kpọ Jehovah ke edinam akpanikọ tutu esịm mfịn emi. Ke akpanikọ, ẹma ẹsịn eti itiat idakisọn̄ n̄ko ẹnọ nnyịn ndika iso mma Abasi.

Nte ekpri Dewey ọkọkọride okpon, ekedi ọkpọsọn̄ n̄kpọ ọnọ enye ndidụn̄ ke utọ mfafaha ufọkidụn̄ oro ye n̄kpri nditọeka iban iba. Ntre ke 1940 enye ama emek ndikpọn̄ onyụn̄ ọtọn̄ọ utom usiakusụn̄ ye Ntiense efen. Nte ini akade, enye ama ọdọ Audrey Barron. Ntem ete ye eka mi ẹma ẹkpep Audrey ediwak n̄kpọ n̄ko, ndien enye ama edima Papa ye Mama etieti. Ke ekpri Dewey ama akaka n̄kpọkọbi ke 1944 kaban̄a edida san̄asan̄a Christian esie, enye ama edidụn̄ ye nnyịn ke ekpri ini ke mfafaha ufọkisan̄ nnyịn.

Ke akamba mbono ke St. Louis, Missouri, ke 1941, Brọda Rutherford ama etịn̄ ikọ nnennen nnennen ọnọ nditọwọn̄ ẹmi ẹdide isua 5 esịm 18 ke emana, ẹmi ẹketiede ke san̄asan̄a ikpehe ke iso iso. Ami ye Edwena ima ikpan̄ utọn̄ inọ sụn̄sụn̄, in̄wan̄în̄wan̄ uyoikọ esie; enye eketie ukem nte ima ima ete oro ọnọde nditọ esie ukpep ke ufọk. Enye ama esịn udọn̄ ọnọ mme ete ye eka ete: “Mfịn Christ Jesus amatan̄ ikọt ediomi esie obon ke iso esie, ndien ke ata okopodudu usụn̄ enye ọdọhọ mmọ ẹkpep nditọ mmọ usụn̄ edinen ido.” Enye ama adian do ete: “Ẹnam mmọ ẹsụhọde ẹtie ke ufọk ẹnyụn̄ ẹkpep mmọ akpanikọ!” Ke inemesịt, ete ye eka nnyịn ẹma ẹnam oro!

Ke mbono oro, nnyịn ima ibọ obufa ekpri n̄wed oro Jehovah’s Servants Defended, emi akafiakde odụn̄ọde mme ikpe oro Mme Ntiense Jehovah ẹkekande, esịnede mme ikpe ke N̄kponn̄kan Esopikpe United States. Papa ama ada enye ekpep n̄kpọ ye nnyịn nte ubon. Nnyịn ikakam idiọn̄ọke ite ke ẹketịm nnyịn idem ẹnọ se iditịbede urua ifan̄ ke oro ebede ke Selma, Alabama.

Edinam Mbon Ntịme ke Selma

Ke usenubọk etienede enyene-ndịk n̄kpọntịbe oro, Papa ama ọnọ idem leta kiet kiet oro eketịn̄de aban̄a unen oro nnyịn inyenede nte ekemde ye n̄wed ibet ndika iso ke utom nnyịn ke idak ukpeme eke ibet ẹsọk akwa etubom ekpeibet, ọbọn̄ obio, ye etubom mme bodisi ke Selma. Kpa ye oro mmọ ẹma ẹbiere ndinyịk nnyịn ikpọn̄ obio.

Ke utịt utịt uwemeyo, irenowo ition ẹmi ẹkamade n̄kpọekọn̄ ẹma ẹdi ufọkisan̄ nnyịn ẹdinyụn̄ ẹmụm mi, Mama, ye adiahaeka mi ke ubiọn̄. Mmọ ẹma ẹtọn̄ọ ndidụn̄ọde kpukpru n̄kpọ ke esịt ufọkisan̄, ẹyomde n̄kpọ oro edide n̄kpọ ubiat ukara. Papa okodu ke an̄wa, ndien mmọ ẹma ẹwụk enye ẹte eyịri ufọkisan̄ oro ke ubomisọn̄, ẹnyande enye ikan̄ nte enye anamde emi. Ke ini emi, ami n̄kokopke ndịk. Eketie nte ata n̄kpọ imam iren ẹmi ndikekere ẹte ke nnyịn ikedi n̄kpọndịk anam ami ye eyeneka mi ima isak esisịt. Nte ededi, ikebịghike ima itre ndisak ke ini Papa ọkọwọn̄ọrede iso inikiet ese nnyịn.

Ke ini nnyịn ikoyomde ndidaha, iren oro ẹma ẹyom ami ye Edwena isan̄a ye mmọ ke ubomisọn̄ mmọ. Papa ama etịn̄ ikọ ye iwụk. Enye ama ọdọhọ ete: “Tutu n̄kpa ada mi!” Ke ẹma ẹkefan̄a ke ndusụk ini ẹma ẹyak ubon nnyịn asan̄a ọtọkiet, ndien irenowo oro ẹkamade n̄kpọekọn̄ ẹtienede nnyịn ke ubomisọn̄ mmọ. Ke ima ikọwọrọ ikpọn̄ obio ke n̄kpọ nte kilomita 25, mmọ ẹma ẹnọ nnyịn idiọn̄ọ ẹte ituak ida ke mben ọkpọusụn̄ ẹnyụn̄ ẹda Papa ye Mama ẹdaha. Ke adiana ke adiana iren oro ẹma ẹdomo ndikpek mmọ ẹte: “Ẹkpọn̄ ido ukpono oro. Ẹfiak ẹnyọn̄ọ obio-in̄wan̄, ẹnyụn̄ ẹkebọk nditọ mbufo ke eti usụn̄!” Papa ama odomo ndikọk ibuot ye mmọ edi ufọn ikodụhe.

Ke akpatre, eren kiet ama ọdọhọ ete: “Ẹka, ndien mbufo ẹkpedede ẹfiak ẹdi Obio Dallas, nnyịn iyowot kpukpru mbufo!”

Ke ikopde nsụkesịt inyụn̄ ifiakde idu ọtọkiet, nnyịn ima inam isan̄ ke ediwak hour ndien ekem ima ituak ida man ide ke okoneyo. Nnyịn ima itịm ise nọmba ubomisọn̄ mmọ. Papa ama ọsọsọp eketịn̄ kpukpru se iketịbede ọnọ Watch Tower Society, ndien ke ndusụk ọfiọn̄ ẹma ẹkebe ẹma ẹdiọn̄ọ ẹnyụn̄ ẹmụm iren ẹmi.

Ndika Ufọkn̄wed Isụn̄utom Gilead

Edwena ama ọbọ ikot ndidụk ọyọhọ otu 7 eke Ufọkn̄wed Enyọn̄-Ukpeme Ukpep Bible eke Gilead ke South Lansing, New York, ke 1946. Albert Schroeder, kiet ke otu mme andikpep, ama etịn̄ nti edu esie ọnọ akani nsan̄a usiakusụn̄ esie Bill Elrod, emi akanamde utom ini oro ke Bethel, ibuot itieutom ofụri ererimbot eke Mme Ntiense Jehovah ke Brooklyn, New York.a Ẹma ẹmen Edwena ye Bill ẹwụt kiet eken, ndien ke n̄kpọ nte isua kiet ke enye ama okokụre ukpep ke Gilead, mmọ ẹma ẹdọ ndọ. Mmọ ẹma ẹsọn̄ọ ẹdu ke utom ukwọrọikọ uyọhọ ini ke ediwak isua, esịnede edinam utom ọtọkiet ke Bethel ke isua ition. Ekem usen kiet ke 1959, Brọda Schroeder ama ọtọt ọyọhọ otu Gilead 34 ete ke edima ufan imọ obon amanaiba, eyeneren ye eyenan̄wan.

Ke utịt utịt 1947, ke adan̄aemi n̄kanamde utom ye ete ye eka mi ke Meridian, Mississippi, nnyịn mbita ima ibọ ikot ndidụk ọyọhọ otu Gilead 11. Idem ama akpa nnyịn koro nte ekemde ye se ẹyomde ami mma n̄kpri n̄kaha, ndien Papa ye Mama ẹma ẹsọn̄ ẹkaha. Edi ẹma ẹnam ukpụhọde, ndien nnyịn ima inyene ifet ndibọ ntatara ukpep Bible oro nnyịn mîdotke.

Utom Isụn̄utom ye Ete ye Eka Mi

Itieutom isụn̄utom nnyịn ekedi Colombia, South America. Nte ededi, ekedi ke December 1949, se ibede isua kiet ke ima ikokụre ukpep, ke nnyịn ikedisịm Bogotá ke ufọkidụn̄ isụn̄utom emi owo ita efen ẹma ẹkedodụn̄. Ke ntọn̄ọ, Papa ama ekpere ndisịm ubiere nte ke eyedi mmemmem ndikpep mme owo oro Ikọmbakara akan enye ndikpep ndisem Spanish! Ih, mme idomo ẹma ẹdu, edi oh, mme edidiọn̄ ẹkewak didie ntem! Mme Ntiense ikawakke isịm ikie ke Colombia ke 1949, edi idahaemi se inen̄erede iwak ibe 100,000 ẹdu!

Ke ẹma ẹkenam utom ke Bogotá ke isua ition, ẹma ẹnọ Papa ye Mama ẹka akwa obio Cali. Kan̄a ke emi, ke 1952, mma ndọ Robert Tracy, ekemmọ isụn̄utom ke Colombia.b Nnyịn ima idu ke Colombia tutu 1982, kpa ini oro ẹkenọde nnyịn ika Mexico, emi nnyịn inamde utom toto ke ini oro. Nte ini akade, ke 1968, ete ye eka mi ẹkenyene ndifiak nnyọn̄ United States man ẹkebọ ntịn̄enyịn ke n̄kan̄ ibọkusọbọ. Ke ẹma ẹkefiak ẹkop nsọn̄idem, mmọ ẹma ẹka iso nte mme akpan asiakusụn̄ ekpere Mobile, Alabama.

Ndise Mban̄a Ete ye Eka Nnyịn

Nte mme isua ẹkebede, Papa ye Mama ẹma ẹtọn̄ọ ndikop mmemidem ndien ẹma ẹyom un̄wam ye ntịn̄enyịn efen efen. Ke ẹsịnde eben̄e, ẹma ẹnọ mmọ ẹkenam utom ẹkpere Edwena ye Bill ke Athens, Alabama. Ke ukperedem eyeneka nnyịn, ekpri Dewey, ama ekere ke ọkpọfọn ndinam ubon oro odụn̄ ọtọkiet ke South Carolina. Ntre Bill ama ada ubon esie ọwọrọ aka Greenwood, ọkọrọ ye Papa ye Mama. Ima ima obufa ndutịm emi ama anam edi mmemmem ami ye Robert ndika iso ke utom isụn̄utom nnyịn ke Colombia, mfiọkde nte ke ẹtịm ẹse ẹban̄a ete ye eka mi.

Ekem, ke 1985, Papa ama ọdọn̄ọ akpauben̄ ekpo emi ọkọbọde enye ukeme utịn̄ ikọ onyụn̄ enịmde enye ke nna udọn̄ọ. Nnyịn ima isop idem ọtọkiet inyene nneme ubon ndikere mban̄a mfọnn̄kan usụn̄ oro ẹkpesede ẹban̄a ete ye eka nnyịn. Ẹma ẹbiere ẹte ke Audrey ayakabade edi akpan owo emi edinọde Papa un̄wam ye nte ke ami ye Robert idikeme ndin̄wam etịm ọfọn ebe ke ndisinọ mme leta kpukpru urua ye mme ifiọkutom oro ẹnọde nsịnudọn̄ ye ke edika n̄kese ediwak ini nte ikekeme.

Nsụk nteti akpatre ini oro n̄kodude ye Papa ata in̄wan̄în̄wan̄. Enye ikekemeke nditịn̄ ikọ, edi ke ini ikọdọhọde enye ite ke imọn̄ ifiak inyọn̄ Mexico, enye ama odomo ye ọkpọsọn̄ ukeme ye ntụk etịn̄ ikọ emi, “Ẹtịm ẹsan̄a!” Ebede ke emi nnyịn ima ifiọk ite, ke esịt esie, enye ama ebere ye ubiere nnyịn ndika iso ke utom isụn̄utom nnyịn. Enye ama akpa ke July 1987, ndien Mama ama akpa ọfiọn̄ usụkkiet ke ukperedem.

Leta oro n̄kọbọde nto adiahaeka mi oro ebe esie ama akakpa etịm etịn̄ esịtekọm oro nnyịn kiet kiet inyenede inọ ete ye eka nnyịn ke ibio ibio. “Mbat n̄kpọ-akpa Christian mi ke ọsọn̄urua n̄kpọ ndien akananam n̄kereke nte ke n̄kpokokop inemesịt n̄kan edieke ete ye eka mi ẹkpekemekde ndibọk nnyịn ke usụn̄ en̄wen. Uwụtn̄kpọ ọkpọsọn̄ mbuọtidem, n̄waidem, ye ọyọhọ mbuọtidem mmọ ke Jehovah aman̄wam mi ndiyọ ke mme ini mfịghe ke uwem mi.” Edwena ama eberi ete: “Mmọkọm Jehovah kaban̄a ete ye eka ẹmi ke ikọ ye edinam ẹkewụtde nnyịn inemesịt oro nnyịn ikemede ndinyene edieke iyakde uwem nnyịn isịn ke ndinam n̄kpọ ima ima Abasi nnyịn, Jehovah.”

[Mme Ikọ idakisọn̄]

[Mme ndise ke page 22, 23]

Ubon Fountain: (ọtọn̄ọde ke ufien aka nnasia) Dewey, Edwena, Winnie, Elizabeth, ekpri Dewey; nnasia: Elizabeth ye ekpri Dewey ke ukwak iso ubomisọn̄ usuanetop Henschel (1937); isọn̄ isọn̄ nnasia: Elizabeth asuande etop n̄wed idiọn̄ọ ke edide isua 16