Nte Afo Emeti?

Nte afo ama ama ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ me mbụme ẹtienede mi:

▫ Nso un̄wam ke ẹkeme ndinọ mbonudọn̄ọ ye mbonusọn̄ ke esịt esop mfịn?

Ke akpa esop Christian, ẹma ẹsịn enyịn̄ mme ebeakpa oro ẹkeyomde un̄wam n̄kpọ eke obụk ke n̄wed. (1 Timothy 5:9, 10) Kpasụk ntre mfịn, mbiowo ẹkeme ndiwet enyịn̄ mbonudọn̄ọ ye mbonusọn̄ oro ẹyomde san̄asan̄a ntịn̄enyịn. Nte ededi, owo ikpenyeneke ndikpọn̄ nnọ mbiowo ikpọn̄ ndida iso ke afan̄ emi. Ana kpukpru owo ke esop ẹdiọn̄ọ ẹban̄a mme utọ udọn̄ oro. (1 Timothy 5:4-8)—8/15, page 28-29.

▫ Nte mbụk Bible aban̄ade unam mmọn̄ ndimen Jonah edi se owo mîkemeke ndinịm ke akpanikọ?

Baba, edide isọnsi, akamba afia enịm, m̀mê enịm emi ebietde isọnsi ekeme ndimen owo. N̄ko-n̄ko, Jesus ke idemesie ama ọsọn̄ọ ete ke mbụk Jonah edi akpanikọ. (Matthew 12:39, 40)—8/15, page 32.

▫ Nso idiọk osụn̄ọ oto edida mme n̄kpọ n̄kpemeidem ye mme ibọk mfọniso nnam n̄kpọ ke nsunsu ekikere?

Edikama mmọ ke akpanikọ isịnke udọn̄ inọ mme owo ndikan mme mfịna mmọ ọniọn̄ oniọn̄ onyụn̄ esịn udọn̄ ọnọ mmọ ndiyom mfọniso nte n̄kukụre usọbọ. Mmọ n̄ko ẹnọ mme andikama mmọ abian̄a abian̄a ekikere ifụre. Ke edide akpan n̄kpọ akan, owo emi ọkọn̄de mbuọtidem ke utịbe utịbe odudu n̄kpọ n̄kpemeidem ye mme ibọk mfọniso ekeme ndiyak edikara uwem esie esịn ke ubọk odudu mme demon ẹmi enyịn mîkwe.—9/1, page 4.

▫ Nso idi n̄kpọ inan̄ oro ẹkemede ndin̄wam ndinam ndọ ebịghi?

Mmọemi ẹdi ndinyịme ndikpan̄ utọn̄, ukeme ndikpe ubọk, ukeme ndinọ ibetedem oro odotde ke n̄kan̄ eke ntụk, ye udọn̄ nditụk owo ke ima ima usụn̄. (1 Corinth 13:4-8; Ephesus 5:33; James 1:19)—9/1, page 20.

▫ Nso idi usụn̄ kiet oro Jehovah ọnọde mbon oro ẹsobode idomo ime?

Jehovah anam emi ebe ke mme uwụtn̄kpọ ime oro ẹwetde ke Ikọ esie, kpa Bible. (Rome 15:4) Nte nnyịn ikerede iban̄a mmọemi, ẹsịn udọn̄ ẹnọ nnyịn ndime ime, ndien nnyịn n̄ko imekpep ekese iban̄a nte ikemede ndime ime.—9/15, page 11-12.

▫ Nso idi uten̄e Abasi?

Uten̄e Abasi etịn̄ aban̄a uten̄e Jehovah oro onụkde nnyịn ndinam se inemde enye esịt, idem ke ini isobode n̄kpọsọn̄ idomo, koro nnyịn imade Abasi ke ata isọn̄ esịt.—9/15, page 15.

▫ Didie ke nnyịn ikpese mbọm Abasi?

Nnyịn ikpedehede ida akwa mbọm Abasi mfefere mfefere. Nnyịn ikpenyene nditie nte Paul inyụn̄ iwụt esịtekọm ebe ke ndin̄wana mbiọn̄ọ unana mfọnmma nnyịn. (1 Corinth 9:27) Ke usụn̄ emi, idem ke idude ke nsọn̄ọn̄kpọ, nnyịn iyewụt ite ke nnyịn imenyene ata udọn̄ ndinam se inende.—10/1, page 23.

▫ Ntak emi odotde Paul ndibat anyanime nte akpa ikpehe ima?

Ẹsidọhọ ẹte ke n̄kpọ nte ebuana Christian ikpodụhe ke anyanime mîkpodụhe, m̀mê edime ime ye kiet eken. Emi edi koro kpukpru nnyịn idi mme anana mfọnmma, ndien unana mfọnmma ye mme ndudue nnyịn ẹsisịn mbon efen ke udomo. Ke ntre, anyanime edi akpan n̄kpọ edieke anade ima odu ke ufọt nditọete.—10/15, page 21.

▫ Nte mme akpa Christian ẹma ẹsida enyịn̄ Abasi?

Uyarade onyịme ih. Jesus ama ekpep mme anditiene enye ndibọn̄ akam nnọ Abasi nte: “Yak ikpono enyịn̄ fo.” (Matthew 6:9) Ndien ke utịt utom esie, enye ama ọbọn̄ akam ete: “Mma nyarade enyịn̄ Fo nnọ mme owo ẹmi okosiode ke ererimbot ọnọ Mi.” (John 17:6) Adianade do, mme akpa nsiondi Septuagint ẹma ẹdọn̄ọ enyịn̄ Abasi ke uduot Tetragrammaton eke Hebrew.—11/1, page 30.

▫ Mme uwụtn̄kpọ Bible ewe ẹwụt ke nte nnyịn isede iban̄a mme ndudue nnyịn ekeme nditụk uwem nnyịn?

Edidem Saul ke nsọn̄ibuot ama esịn item, ndien mme ndudue esie ẹma ẹtọt, ke akpatre adade okosụn̄ọ ke enye ndikpa ke iyatesịt Abasi. (1 Samuel 15:17-29) Ke n̄kan̄ eken, kpa ye mme ndudue ye idiọkn̄kpọ esie, Edidem David ke editua n̄kpọfiọk ama onyịme edinen̄ede onyụn̄ akaiso anam akpanikọ ọnọ Jehovah. Mme uwụtn̄kpọ Bible ẹmi ẹwụt ẹte ke ndinyịme mme ndudue nnyịn an̄wam nnyịn ndisọn̄ọ mmụm eti itie ebuana ye Abasi n̄kama ndien ke ntre inyenede idotenyịn nsinsi uwem. (Psalm 32:1-5)—11/15, page 29-30.

▫ Didie ke Jehovah esinọ ikọt esie un̄wam ke ini mmọ ẹdude ke ukụt ke ntak mme oto-obot afanikọn̄ m̀mê mme n̄kpọ eken?

Jehovah an̄wam, idịghe ke nditre mme oto-obot odudu oro ke utịbe utịbe usụn̄ m̀mê ke ndusụk edinam oro ebede ukeme owo, edi ebe ke odudu efen emi ata ediwak owo mîtịmke inyene ifiọk iban̄a—ima. Ih, Jehovah enen̄ede ama ikọt esie, ndien enye emekpep mmọ ima oro ọsọn̄ọde mbọbọ ye kiet eken tutu enye ekeme ndinam se itiede nte utịben̄kpọ nnọ mmọ. (1 John 4:10-12, 21)—12/1, page 10.