N̄kparawa Owo Ẹmi ‘Ẹbuọtde Idem ye Jehovah’
MME uyen idịghe n̄kukụre mmọemi ẹyede uyai, m̀mê mbonusọn̄ ndidi n̄kukụre mmọemi ẹnyenede ọniọn̄. (Men Mme N̄ke 11:22; Ecclesiastes 10:1 domo.) Utu ke oro, mbon oro ẹnyenede uyai oro ekemede ndibịghi ke nsinsi ye ata ọniọn̄ ẹdi mbon oro ẹbuọtde idem ye Jehovah ẹnyụn̄ ẹdọhọde ke ofụri esịt ẹte: “Afo edi Abasi mi.”—Psalm 31:14; Mme N̄ke 9:10; 16:31.
Ke ofụri ererimbot odu uwak ndiye owo oro ibat oro ọkọride-kọri, n̄kpri ye ikpọ, ẹmi ẹwụtde ọniọn̄ oro mmọ ẹnyenede ebe ke ndinam n̄kpọ Abasi nnyụn̄ n̄kwọrọ eti mbụk Obio Ubọn̄ Abasi. Da Sabrina, emi ekedide isua itiaita ke emana, ke uwụtn̄kpọ.
Sabrina odụn̄ ke Germany onyụn̄ odu ke n̄wed iba. Eyenan̄wan emi edi akpa ke otu Mme Ntiense Jehovah emi odude ke ufọkn̄wed esie. Ke mfụhọ, enye ekedi enyeemi nditọ ubet ukpepn̄kpọ esie ẹkewụkde ntịn̄enyịn ndisuene tutu osịm usen emi andikpep ọkọdọhọde nditọ ufọkn̄wed ẹda n̄wed emi mmọ ẹmade ẹkan ẹdi ubet ukpepn̄kpọ. Sabrina ama emek ndida N̄wed Mi eke Mme Mbụk Bible n̄ka. Ke okoneyo oro ekebemde iso, okposụkedi okokopde ndịk, enye ama otịm idem mfọn mfọn ọnọ ubet ukpepn̄kpọ esie. Sia nditọ ufọkn̄wed 26 ẹkedude ke ubet ukpepn̄kpọ esie, enye ama ọfiọk ete ke ekeme ndidi imọ idinyeneke ekese ini. Edi enye ama ebiere nditre ndiyak owo ekededi esịbe odụk nneme esie ama onyụn̄ onịm ke akpanikọ ete ke Jehovah eyen̄wam imọ. Ke usen oro ẹkenịmde, andikpep ama obụp m̀mê anie akada n̄wed edi okponyụn̄ ama ndidi akpa owo ndiwụt enye. Ke n̄kpaidem, Sabrina ikpọn̄ akada kiet edi. Enye ama adaha ada ke iso ubet ukpepn̄kpọ onyụn̄ ọtọn̄ọ nditịn̄ ikọ, okot onyụn̄ owụt mme ndise ke n̄wed oro ndien anam an̄wan̄a nte ke kpukpru n̄kpọ ọkọn̄ọ ke Bible. Ke utịt enye ama obụp ete: “Anie akpama ndinyene n̄wed emi?” Enye ama ọnọ andikpep oro kiet, ndien ke usen ifan̄ efen, enye ama ọnọ nditọ ubet ukpepn̄kpọ esie n̄wed oro duop efen efen. N̄kukụre se andikpep eketịn̄de aban̄a nneme esie ekedi: “Akananam n̄kwe se itiede ntem.” Enye ama ọnọ Sabrina A (kpa idiọn̄ọ oro ọfọnde akan) ke utom esie.
Ke akpanikọ, ediwak n̄kparawa Ntiense ẹdi mme asuanetop eti mbụk oro ẹkopde inemesịt ke ufọkn̄wed. Uwụtn̄kpọ efen edi Erika, asuanetop emi edide isua 11 ke emana ke Mexico. Ẹma ẹkpep eyenan̄wan emi ndima Jehovah toto ke uyen. Utom esie ke ufọkn̄wed edi n̄wọrọnda. Kiet ke otu utomufọk esie ẹkedi ndiwet n̄kpọ mban̄a AIDS ye edinyene mbumehe uda un̄wọn̄ ye n̄kpọsọn̄ mmịn. Eyenan̄wan emi ama otịm idem mfọn mfọn, adade magazine Awake!, onyụn̄ enyene ibat emi okponde akan. Andikpep esie ama obụp enye ebiet enye akadade ntọt oro ndien eyenan̄wan emi ama ọnọ enye mme magazine oro ẹkekamade mme ibuotikọ nneme oro. Ekem, andikpep oro ama ada mme magazine ẹmi ndineme mme ibuotikọ oro ye ofụri ubet ukpepn̄kpọ. Ke ntak eduuwem Erika, ukpono emi enye ekenyenede ọnọ mme andikpep esie, ye n̄kokon̄ ibat emi enye ekenyenede, enye ama odot ndibọ mme enọ, n̄wed itoro, ye edika ufọkn̄wed mfọn ke ibio ini. Edi, enye ekere ete ke n̄kponn̄kan uforo oro imọ ikokụtde ekedi ke ndinam ẹdiọn̄ọ enye nte kiet ke otu Mme Ntiense Jehovah, ndikeme ndinịm mme n̄wed ukpep Bible, nnyụn̄ mmenede enyịn̄ Abasi ke enyọn̄.
Ndien owo efen edi Shannon, eyeneren isua duop emi odụn̄de ke New Zealand. Enye okụt n̄kpọ ke enyịn kiet kpọt; cancer ama abiat enye enyịn enye eken ke ini ekedide eyen nsek. Ke ini Shannon ekedide isua itiaba, eka esie ama ọtọn̄ọ ndikpep Bible ye Mme Ntiense Jehovah. Nte ededi, ikebịghike ke enye ama ọkọtọn̄ọ ukpepn̄kpọ Bible, enye ama okodụn̄ ye erenowo oro mîkekpehe n̄kpọ ndọ esie onyụn̄ ebierede nditre ukpepn̄kpọ esie. Shannon ama eben̄e ete yak ẹkaiso ke ukpepn̄kpọ Bible imọ. Ẹma ẹnyịme eben̄e esie. Mme Ntiense oro ẹma ẹkaiso ndisika do, ndien ke akpatre kpukpru owo ita ke ubon oro ẹma ẹkpep Bible ẹnyụn̄ ẹnam n̄kọri eke spirit. Ke ẹma ẹkedian ndọ nte ekemde ye ibet, eka ye ebe eka Shannon ẹma ẹna baptism.
Usen kiet Shannon ye n̄wan esenyịn circuit ẹma ẹnam utom ọtọkiet ke an̄wautom. Enyeneufọk ama obụp Shannon ete: “Nso ikanam fi enyịn?” Enye ama ọbọrọ ete: “Cancer akanam mi enyịn, ndien ẹkenyene ndisio enye mfep. Ke mîbịghike Jehovah eyenọ mi obufa enyịn ke Paradise, ndien oro edi se nnyịn idide mi nditịn̄ nnọ fi.”