Ndituak Ibuot Nnọ Abasi Ke Akpanikọ
Man Abasi enyịme utuakibuot, ana enye ọkọn̄ọ ke akpanikọ. (John 4:23) Bible owụt ke mme ata andituak ibuot ẹdu ke “ufọk odu-uwem Abasi, adaha ye isọn̄ eke akpanikọ Abasi odorode ke esịt.” (1 Timothy 3:15) Ikụreke ke mbon oro ẹnamde esop Abasi ndinịm akpanikọ Ikọ Abasi ke akpanikọ edi n̄ko ẹdu uwem ke n̄kemuyo ye enye ẹnyụn̄ ẹda ẹnọ enye, ẹnamde ẹfiọk enye ke ofụri isọn̄.—Matthew 24:14; Rome 10:9-15.
ẸTỊM ẹfiọk Mme Ntiense Jehovah kaban̄a utom unọ ukpep mmọ eke Bible, emi ẹnamde idahaemi ke se ibede idụt 200. Mmọ ẹkpep Bible ẹnyụn̄ ẹda enye ẹkpep mme owo nte akpanikọ, ye unana edibuak odudu ukpepn̄kpọ akwaifiọk oro ẹsiakde mmọn̄. Nte afo ememehe ye mme ukpepn̄kpọ mmọ oro ẹkọn̄ọde ke Bible? Ediwak owo ẹsimen̄e ndikpan̄ utọn̄ nnọ Mme Ntiense Jehovah ke ntak idiọk etop oro ẹsuande ẹban̄a mmọ. Edi ẹdọhọ mbon esịt akpanikọ ẹte ẹbiere ke idemmọ m̀mê se Mme Ntiense ẹkwọrọde edi akpanikọ mîdịghe. Utọ akpan ubiere oro ikpọkọn̄ọke ke n̄kop-nte. Ediwak owo ẹmi ẹkenamde ọkpọkpọ ndụn̄ọde idemmọ ẹban̄a ukpepn̄kpọ Mme Ntiense Jehovah ẹmebọ ufọn akamba akamba.
Ifiọk Akpanikọ Ebịn Ndịk Efep
Ke uwụtn̄kpọ, kere ban̄a Eugenia. Ẹkebọk enye ke ubon emi enen̄erede ọsọn̄ọ eyịre ke Catholic. Ete esie ekedi kiet ke otu mbon oro ẹkenamde ndutịm ke ini pope okoyomde ndika n̄kese Mexico ke 1979. Ke adan̄aemi akakade ekese mme ufan, Eugenia ama osobo ye Mme Ntiense Jehovah. Ye un̄wam mmọ enye ama ọtọn̄ọ ndinen̄ede ndụn̄ọde se Bible etịn̄de. Enye eti ete: “Ke akpa, mma ntọn̄ọ ndikop ndịk. Mma n̄kụt akpanikọ! Edi emi ọkọwọrọ ete ke ata ediwak ke otu se n̄kenịmde ke akpanikọ mbemiso ẹma ẹkwan̄a. Ubon mi, mme ufan mi, mme owo oro n̄kamade—se kpukpru mmọ ẹkenịmde ẹma ẹkwan̄a. Idem ama enyek mi. Mma n̄ka iso ndibụp idemmi nte ubon mi ẹdinamde n̄kpọ ẹban̄a se ami n̄kọfiọkde obufa obufa do. Nte ini akakade ndien ye un̄wam Jehovah, mma ntọn̄ọ ndikpụhọ nda ekekem ye akwa n̄kpọntịbe emi. Usen kiet mma mbiere ndiyarade nnọ ufan ubon nnyịn, prọfesọ ukpepn̄kpọ ido ukpono. Mma nsian enye kpukpru n̄kpọ mban̄a udọn̄ mi ndiyom akpanikọ. Ekem enye ama ọdọhọ ete, ‘Edieke afo oyomde ndifiọk akpanikọ, yom Mme Ntiense Jehovah.’”
Nte Eugenia okokopde ndịk aban̄a, ubon esie ẹma ẹbịn enye ẹfep ke ufọk. Nte ededi, Mme Ntiense ẹma ẹka iso ndinọ enye un̄wam eke spirit. Enye ọdọhọ ete: “Ẹma ẹsọn̄ọ mi idem ndida nnọ akpanikọ. Mma ndifiọk nte ke enye ekedi n̄kpọ oro odotde ẹn̄wana ẹban̄a. Edidara oro Mme Ntiense Jehovah ẹkedarade mi ekedi ata akpan n̄kpọ. Ẹma ẹma mi ke esịt esop Christian. Ndisịk n̄kpere esop Abasi ama an̄wam mi n̄kan ndịk n̄kokopde mban̄a edida ikpọn̄.”
Kere ban̄a uwụtn̄kpọ en̄wen. Sabrina ọkọkọri ọwọrọ owo ye edu edinyene nneme ubon ofụri ini mban̄a Bible. Ke akpanikọ, mmọ ẹma ẹtọn̄ọ orụk ‘ido ukpono ubon.’ Ekedi ido esie ndisibuana ye mme andibuana ke nsio nsio ido ukpono man ayarade mme ndudue mmọ. Ke ini kiet ke otu Mme Ntiense Jehovah okoyomde ndikpep Bible ye enye, enye ama enyịme ye unana ubiatini ye ekikere ediwụt ke mme ukpepn̄kpọ mmọ inenke. Enye eti ete: “Ke mma n̄kekpep n̄kpọ ke se ibede isua kiet, mma n̄kop ndịk nditaba ‘akpanikọ mi.’ Ekedi mmemmem n̄kpọ ọnọ mi ndiyarade nsu ediwak ido ukpono oro n̄kabuanade, edi ikedịghe mmemmem n̄kpọ isan̄ enye emi.”
Ndịk ama anam Sabrina etre ndikpep Bible ye Mme Ntiense Jehovah. Edi enye ikokopke uyụhọ ke n̄kan̄ eke spirit. Enye ama ebiere ndifiak ntọn̄ọ ukpepn̄kpọ ndien ke akpatre ama edinyịme obufa akpanikọ emi. Sabrina ama anam n̄kọri ekesịm idaha emi enye okoyomde ndibuana se enye ekekpepde ye mbon en̄wen. Enye ama akam eben̄e ndisan̄a ye Mme Ntiense ke utom ukwọrọikọ mmọ eke ufọk ke ufọk. Sabrina anam an̄wan̄a ete: “Mbemiso n̄kọbọde unyịme ndikwọrọ ikọ ye Mme Ntiense Jehovah, ẹma ẹbụp mi ẹte: ‘Nte afo emenen̄ede oyom ndidi kiet ke otu Mme Ntiense Jehovah?’ Mma mbọrọ nte, ‘Baba!’ Mma mfiak n̄kop ndịk.” Ke akpatre, ke ama akaka iso ndidụk kpukpru mbono esop onyụn̄ ese ikọt Abasi ye nte mmọ ẹdade mme edumbet Bible ẹsịn ke edinam, Sabrina ama edisịm ubiere nte ke oro ekenen̄ede edi akpanikọ. Enye ama ana baptism onyụn̄ edi ọkwọrọikọ uyọhọ ini idahaemi.
Ntak Ẹdide Ata Isio Isio?
Owo ekeme ndibụp ete, ‘Ntak emi ukpepn̄kpọ Mme Ntiense Jehovah ẹdide ata isio isio ye eke mme ido ukpono eken?’ Ibio ibio edidụn̄ọde se Mme Ntiense ẹnịmde ke akpanikọ ayan̄wam fi ndikụt nte ke mmọ ẹdi mme ata Christian, ifịk ifịk nditọ ukpepn̄kpọ Bible. Nnyịn imesịn udọn̄ inọ fi ndise mme itien̄wed ẹdude ke ibio ibio ediwụt mme akpan ukpepn̄kpọ mmọ oro ẹwụtde ke enyọn̄ emi ke Bible fo.
Ebede ke nditịm ndụn̄ọde se Mme Ntiense Jehovah ẹnịmde ke akpanikọ ye nte mmọ ẹsọn̄ọde ẹyịre ke se Bible ekpepde, afo emekeme ndinyene uwọrọ ufụn oro akpanikọ ọnọde. (John 17:17) Ntak idụhe ndikop ndịk mban̄a akpanikọ. Ti un̄wọn̄ọ Jesus oro: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.”—John 8:32.
[Ekebe ke page 6]
NDUSỤK AKPAN N̄KPỌ MME NTIENSE JEHOVAH ẸNỊMDE KE AKPANIKỌ
◯ Jehovah edi Ata Ọkpọsọn̄ Abasi. Ọkpọkpọ enyịn̄ esie odu awak ebe utịm ike 7,000 ke mme ata akpa uwetn̄kpọ Bible.—Psalm 83:18.
◯ Jesus Christ edi Eyen Abasi, emi ekedide isọn̄ ndinọ uwem esie kaban̄a ubonowo. (John 3:16, 17) Mme Ntiense Jehovah ẹtiene mme ukpepn̄kpọ Jesus Christ nte ẹkụtde ke mme Gospel.
◯ Enyịn̄ oro Mme Ntiense Jehovah ọkọn̄ọ ke Isaiah 43:10, emi ọdọhọde ete: “Jehovah ọdọhọ, ete, Mbufo ẹdi ntiense mi.”
◯ Obio Ubọn̄ oro mme owo ẹsibọn̄de akam ẹben̄e ke akam “Ete Nnyịn” edi ukara eke heaven oro edisiode kpukpru ndutụhọ ye ubiak efep ke ererimbot ke mîbịghike man ọdiọn̄ usụn̄ ọnọ Paradise oro Bible ọn̄wọn̄ọde.—Isaiah 9:6, 7; Daniel 2:44; Matthew 6:9, 10; Ediyarade 21:3, 4.
◯ Kpukpru owo oro ẹnamde uduak Abasi ẹnyene ifet ndidara mme edidiọn̄ Obio Ubọn̄ ke nsinsi.—John 17:3; 1 John 2:17.
◯ Ana mme Christian ẹda se Bible etịn̄de ẹbọp edu uwem mmọ. Ana mmọ ẹdomo ndinam akpanikọ, ndidu edisana, eti uwem, nnyụn̄ nnyene ima nnọ mme mbọhọidụn̄ mmọ.—Matthew 22:39; John 13:35; 1 Corinth 6:9, 10.
[Ndise ke page 5]
Mme Ntiense Jehovah ẹnam mme owo ẹfiọk akpanikọ Bible ke se ibede idụt 200