Nte Afo Emeti?

Nte afo ama adara ndikot mme nsiondi Enyọn̄-Ukpeme ndondo emi? Ke edide ntre, afo eyekụt nte edide inem n̄kpọ nditi se itienede mi:

▫ Ntak emi mbon uyep nditọ Israel ẹkemekde ndidan̄ ke ufọk Rahab akpara oro?

Mbon uyep nditọ Israel ẹkeda Ibet Abasi ẹdu uwem, ntre mmọ ikadan̄ke ke ufọk Rahab kaban̄a oburobụt ntak. Ẹkeme ndidi mmọ ẹkekere ke owo idinyeneke eyịghe iban̄a mmimọ ke obio oro edieke idude ke ufọk akpara. Ufọk esie oro ẹkebọpde ke ibibene obio ekeme ndinam edi mmemmem n̄kpọ ndiwọrọ mfehe. Edi ke akande kpukpru n̄kpọ, Jehovah akada mmọ usụn̄ aka ebịne anamidiọk emi usụn̄ oro Abasi akanamde n̄kpọ ye Israel okotụkde esịt esie nte ọfọnde tutu enye akabade esịt onyụn̄ okpụhọde mme usụn̄ esie.​—⁠12/15, page 24-⁠25.

▫ Didie ke iyatesịt otụk nsọn̄idem nnyịn?

Ndụn̄ọde ẹwụt ẹte ke iyatesịt esision̄o mmọn̄ibọk ẹkotde hormone emi esinamde owo okop mfụhọ. Ndiyat esịt ndien ndien ekeme ndinam unana edida ukem ukem odu ke ufọt orụk mmọn̄ibọk oro ọnọde ukpeme ye enyeoro ọnọde unan, esịnde nnyịn ke itiendịk edinyene udọn̄ọ esịt.​—⁠12/15, page 32.

▫ Nso ekikere ẹdin̄wam nnyịn ndinam ibat magazine Enyọn-Ukpeme ye Awake! oro inịmde ọdọk?

Nyene udọn̄ ke Enyọn̄-Ukpeme ye Awake!; nam nneme edi mmemmem mmemmem; kpụhọde da ekekem ye idaha ebe ke ndidiomi ibat ibat n̄kpọ oro afo editịn̄de; nịm ọkpọkpọ utịtmbuba.​—⁠1/1, page 24-⁠25.

▫ Ntak emi Moses edide utọ eti uwụtn̄kpọ ukara Abasi ntre ọnọ nnyịn nditiene?

Moses ama esiyom ndausụn̄ Jehovah ke mme n̄kpọ. Enye ikenyeneke udọn̄ ikpọ n̄kpọ edi ekekere aban̄a ubọn̄ Abasi. Enye ama enyene ọkpọsọn̄ mbuọtidem, ndien enye ikedehede ifre ite ke Jehovah ekedi ata Andikara idụt Israel.​—⁠1/15, page 11.

▫ Nso idi ndusụk usụn̄ emi ukpepn̄kpọ Abasi akande?

Ukpepn̄kpọ Abasi amakan ebe ke ndinọ ikọt Jehovah ifiọk akpanikọ oro akade-kaiso. Enye ada mme owo edisịn ke un̄wana eke spirit, ndien enye owụt mbon nsụhọdeidem nte ẹkpetuakde ibuot ẹnọ Abasi “ke spirit ye ke akpanikọ.” (John 4:24) Ukpepn̄kpọ Abasi n̄ko amakan ediwak idomo ye idiọk ererimbot.​—⁠2/1, page 10-⁠12.

▫ Nso idi ukpọhọde item oro okụtde unen?

Ukpọhọde edi ndinọ owo enye eken ukpono oro odotde ye unen oro enye enyenede ndidi se ẹnamde n̄kpọ ke edu ukpono. Ntem, Christian edide ọnọitem ekpenyene ndiwụt mfọnido ye nsọn̄ọnda, edi ẹkpenyene ndinọ andibọ item ukpono.​—⁠2/1, page 28.

▫ Didie ke Ufọkabasi Roman Catholic ekedinyịme Edimen Mary Ndọk nte ukpepn̄kpọ?

Ke akpa isua ikie ke Jesus ama akakpa, ekikere aban̄ade Edimen Mary Ndọk ke heaven ekedi ata esen esen n̄kpọ ọnọ ekikere mme Christian. Nte ededi, ke ukpepn̄kpọ Abasi-Ita-ke-Kiet ama akakabade edi akpan ukpepn̄kpọ ufọkabasi, ẹma ẹnọ Mary akpan idaha oro akade-kaiso okpon. Owo ikonyịmeke Edimen Ndọk nte ukpepn̄kpọ tutu ke November 1, 1950, ke ini Pope Pius XII ọkọtọtde ete: “Nnyịn ikabade enye nte ukpepn̄kpọ oro Abasi ayararede.”​—⁠Munificentissimus Deus.​—⁠2/15, page 26-⁠27.

▫ Ke Jeremiah ibuot 24, nso ke akpasa fig iba, nti fig ye ndiọi fig, ẹda ẹban̄a?

Nti fig ẹkeda ẹban̄a mme Jew ẹmi ke akpa ẹkemende ke ntan̄mfep ẹka Babylon, emi nsụhọ editode ke otu oro ẹfiak ẹnyọn̄ Judah. Ndiọi fig ẹkeda ẹban̄a Edidem Zedekiah ye mbon oro ẹkedude ye enye ẹmi ẹkesọn̄de ibuot ye Edidem Nebuchadnezzar kpa ye ẹkenamde ediomi ke enyịn̄ Abasi. Ke ndimen ndomo, nnyịn imokụt nsụhọ Israel eke spirit ke eyo nnyịn, ẹmi ẹsion̄ode nti mfri ke uwem mmọ, ke edide isio ye mme ọkwọrọ ederi Christendom, ẹmi ẹsion̄ode mbiara mfri.​—⁠3/1, page 14-⁠16.

▫ Mmanie ẹkedi mbon Quartodeciman, ndien ntak emi mmọ ẹdide n̄kpọ udọn̄ ẹnọ mme Christian mfịn?

Ke eyo mme apostle ama ekebe, ndusụk owo ẹma ẹdu ẹmi ẹkesinịmde Udia Mbubịteyo Ọbọn̄ ke Nisan 14 kpukpru isua, ẹtienede uwụtn̄kpọ mme apostle. Ẹkedidiọn̄ọ mmọ nte “Mbon Ọyọhọ Usen Duopenan̄,” m̀mê mbon Quartodeciman. Emi edi n̄kpọ udọn̄ mfịn, koro enye owụt ete idem ke mme apostle ẹma ẹkekpan̄a ẹma, mme owo ẹma ẹdu oro ẹkesọn̄ọde ẹyịre ke nnennen usụn̄ editi n̄kpa Jesus inikiet ke isua ke Nisan 14.​—⁠3/15, page 4-⁠5.

▫ William Whiston ekedi anie?

Enye ekedi enyene-ifiọk eyen ukpepn̄kpọ ọyọhọ isua ikie-⁠18 ke England, n̄kpet n̄kpet ufan Sir Isaac Newton. Whiston ama akabade N̄wed Abasi Christian Usem Greek, ọbiọn̄ọ ukpepn̄kpọ Abasi-Ita-ke-Kiet an̄wan̄wa, okonyụn̄ edi akwa andikpep ukpepn̄kpọ aban̄ade ikpaenyọn̄ ye ibat. Edi anaedi ẹnen̄ede ẹti Whiston ke enye ndikakabade mme uwetn̄kpọ ewetmbụk eset owo Jew oro, Flavius Josephus, nsịn ke Ikọmbakara.​—⁠3/15, page 26-⁠28.

▫ Didie ke ẹkebot owo ke mbiet Abasi? (Genesis 1:27)

Ẹkebot owo ye ukeme ndiwụt mme n̄wọrọnda edu Abasi ẹdide ima, unenikpe, ọniọn̄, ye odudu​—⁠ọkọrọ ye mme edu eken.​—⁠4/1, page 25.