Ntak Emi Mme Ntiense Ẹkade Iso Ndiwaha?
‘MMỌ ẹnyụn̄ ẹfiak ẹdi! Edi mmọ ẹkedi mi sụk urua ifan̄ ẹmi ẹkebede!’ Nte oro esidụk fi esịt ke ini kiet ke otu Mme Ntiense Jehovah awahade ebịne fi? Mme Ntiense Jehovah ẹsiwaha ẹbịne ediwak miliọn owo kpukpru ini mfịn. Afo emekeme ndibụp ete, Ntak emi mmọ ẹyịrede ke ini mmọ ẹdiọn̄ọde ẹte ke ata ediwak owo ẹnyene ido ukpono eke mmọ m̀mê ke inyeneke udọn̄? Mbụme oro oyom ibọrọ.
Mbiomo Ẹnyenede ke Iso Abasi
Mme Ntiense Jehovah ẹmekpep ẹto N̄wed Abasi nte ke ọtọn̄ọde ke 1914, kpa isua oro Ekọn̄ Ererimbot I ọkọtọn̄ọde, mme n̄kpọntịbe ererimbot ẹmesu mme prọfesi Bible ẹban̄ade utịt editịm n̄kpọ ererimbot emi odude kemi ye ukara Obio Ubọn̄ Abasi oro edide ndikara isọn̄ emi. Etie nte afai, uduọkiyịp, ye usua oro ekperede ndisịm isua ikie ẹmenịm ubonowo oyom usụn̄ ọkpọn̄ usọbọ oro ukaraidem ekemede ndinọ mme mfịna mmọ akan nte akanam edide. Mme ekọn̄ ye edinam oyomonsia oro ẹsụk ẹnọmọde ubonowo ẹdi uyarade nte ke itie ukara eke owo omokpu ndikpụhọde esịt, ekikere, ye eduuwem mme owo. Ọkpọsọn̄ usua ẹnyenede ẹban̄a mme n̄kpọntịbe oro ẹkedade itie ke edem ke mbụk osụk ababiat itie ebuana oro odude ke ufọt ekpụk, orụk, ye mme otu ido ukpono. Oro edi akpanikọ ke mme anyan ebiet nte Afghanistan, India, Nothern Ireland, South Africa, Ufọt Ufọt Edem Usiahautịn, ye akani Yugoslavia. Nso, ndien, idi n̄kukụre usọbọ oro ebịghide?
Nso Inụk Mme Ntiense?
Mme Ntiense Jehovah ẹfiọk ẹte ke usọbọ Abasi—Obio Ubọn̄ esie ke ubọk Christ Jesus oro ẹn̄wọn̄ọde—edi n̄kukụre usọbọ oro ekemede ndinyene ufọn. Jesus ama akam esịn eben̄e kaban̄a ukara Obio Ubọn̄ oro ke ọwọrọetop akam uwụtn̄kpọ esie: “Ẹbọn̄ akam ntem ndien, ẹte, Ete nnyịn emi odude ke heaven: yak ikpono enyịn̄ Fo, yak ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” Mme Ntiense ẹnịm ke akpanikọ ẹte ke akam oro enen̄ede eben̄e Abasi ndisịbe ndụk ke mme mbubehe owo.—Matthew 6:9, 10.
Ntre ntak emi Mme Ntiense Jehovah ẹsinyenede udọn̄ kpukpru ini ndika ke ufọk ke ufọk man ẹdomo nditịn̄ etop oro? Ke ntak ewụhọ iba oro Jesus okosiode owụt: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo. Emi edi akamba ye ebeiso item. Udiana onyụn̄ ebiet enye, ete, Ma mbọhọidụn̄ fo nte idemfo.”—Matthew 22:37-39.
Mme Ntiense ẹyom edidiọn̄ Abasi ẹnọ idemmọ, ndien sia mmọ ẹmade mme mbọhọidụn̄ mmọ, mmọ ẹyom ukem edidiọn̄ oro ẹnọ mmọ. Ntem, ke ẹtienede uwụtn̄kpọ Jesus, ima unana ibụk onụk mmọ ndika mbịne mme mbọhọidụn̄ mmọ. Mmọ ke nsụhọde n̄kaha ẹyom ndinọ mmọ ifet edidi ndifiọk se “Abasi inemesịt” ọn̄wọn̄ọde ọnọ okopitem ubonowo ke isọn̄ oro ẹnamde asana.—1 Timothy 1:11, NW; 2 Peter 3:13.
Christian isụn̄utom oro Paul ama onịm un̄wọn̄ọ Abasi ke akpanikọ ndien ke ntem ama ekeme ndiwet ete: “Ami Paul, emi ndide owo Abasi ye apostle Jesus Christ, man ndimek ikọt Abasi ẹnyene mbuọtidem, ẹnyụn̄ ẹnyene ifiọk akpanikọ eke asan̄ade ye uten̄e Abasi, ke idotenyịn nsinsi uwem; eke Abasi, emi mîkemeke ndisu nsu, ekebemde nsinsi ini iso ọn̄wọn̄ọ.” Ih, Abasi, “emi mîkemeke ndisu nsu,” “ọn̄wọn̄ọ” nsinsi uwem ọnọ mbon oro ke nsụhọdeidem ẹyomde ndifiọk nnyụn̄ nnam n̄kpọ esie.—Titus 1:1, 2; Zephaniah 2:3.
Nte Ẹsikpe Mme Ntiense Okụk?
Ke ini ke ini ndusụk owo ẹsikere ẹte ke ẹsikpe Mme Ntiense okụk ke utom ukwọrọikọ mmọ. Emi idịghe akpanikọ! Mmọ ẹda mme ikọ oro Paul ekewetde ọnọ ẹsọk esop ke Corinth ke akpan n̄kpọ: “Nnyịn itiehe nte ediwak owo ẹmi ẹnyanyam ikọ Abasi ẹn̄wana udori; edi itịn̄ ikọ ke Christ ke iso Abasi, nte owo ẹmi ẹdide owo akpanikọ ye owo Abasi ẹtịn̄de.”—2 Corinth 2:17.
Ndusụk mme adaiso ido ukpono ẹkwọrọ ikọ ke ntak okụk, edide enye edi edibọ okụk ke ntak mme edinam ido ukpono m̀mê edisịn udọn̄ nnọ mme mbubehe unyamurua ke ukwọrọikọ TV mmọ. Ata ediwak ido ukpono ẹnyene mme ọkwọrọ ederi oro ẹsikpede-kpe okụk.
Ke edide isio ye oro, Mme Ntiense inyeneke mme ọkwọrọ ederi oro ẹsikpede okụk, ndien ediwak ini ẹsinọ mbon esịt akpanikọ oro ẹyomde akpanikọ n̄wed ukpep Bible mmọ ke mfọn, okposụkedi esinụkde ediwak mmọemi ndinọ etịbe unyịmesịt. Ẹsida ẹmi ndise mban̄a okụk oro ẹbiatde ke utom ukwọrọikọ ofụri ererimbot emi. Ke n̄kemuyo ye item Jesus emi: “Mbufo ẹkebọ ke ikpîkpu, ẹnọ n̄ko ke ikpîkpu,” Mme Ntiense ke mfọn ẹsibiat inyene mmọ, esịnede ini ye odudu, ke ndisịn ediwak miliọn hour kpukpru isua ke utom Abasi. Ntem, mmọ ẹkpep mme owo oro ẹnyenede udọn̄ ke ufọk ke ufọk onyụn̄ ebe ke mme ukpepn̄kpọ Bible.—Matthew 10:8; 28:19, 20; Utom 20:19, 20.
Akpanikọ ẹwụt ẹte ke Mme Ntiense Jehovah nte owo kiet kiet, mme esop n̄kann̄kụk mmọ, m̀mê Watch Tower Society, inyeneke uduak ukọ okụk. Owo ndomokiet ibọhọ okụk ke ndisan̄a ke ufọk ke ufọk. Didie ndien ke ẹse ẹban̄a utom emi ke n̄kan̄ okụk? Ebe ke etịbe unyịmesịt emi otode mme owo oro ẹwụtde esịtekọm ke ofụri ererimbot. Owo isitan̄ke etịbe.
Utịp Unọ Ikọ Ntiense Mmọ
Nte utom eke ufọk ke ufọk ye unọ ikọ ntiense ido nneme eke Mme Ntiense enyene utịp ndomokiet ke ekikere mbonan̄wa? Uyarade ke mbụk n̄kpọntịbe ọbọrọ ih ke mbụme emi ye nsọn̄uyo. Ẹsitịn̄ n̄kpọ ẹban̄a Mme Ntiense Jehovah ke mme edinam TV ye mme senima ke ini ẹwụtde nte owo ọkọn̄de usụn̄. Ndise mbubru ama etịn̄ n̄kpọ aban̄a Mme Ntiense. Ẹtịm ẹdiọn̄ọ ifịk ifịk utom mmọ tutu mme ewet ndise mbubru ke ofụri ererimbot ẹsiwet n̄kpọ ẹban̄a Mme Ntiense Jehovah. Mmọemi ẹkeme nditie nte n̄kpọ nsahi, edi mmọ ẹsiwak ndikọn̄ọ ke ata in̄wan̄în̄wan̄ akpanikọ—nte ke ẹdiọn̄ọ Mme Ntiense ke ifịk ifịk ukwọrọikọ mmọ eke ufọk ke ufọk.—Utom 20:20.
Ndise mbubru kiet ke ndondo emi ama owụt owo ọdọkde obot ndikosobo ye “guru.” Enye ama ọdọhọ ete: “Tịn̄ mme utịben̄kpọ oro ẹdide nọ mi!” Didie ke “guru” ọkọbọrọ? “Yak ise . . . Akan̄, ndiọi udọn̄ọ, ye mme unyekisọn̄ ẹyedu. Utịn eyekabade edi ekịm, ọfiọn̄ eyenyụn̄ akabade edi iyịp.” Anam ndụn̄ọde oro ama obụp ete: “Nso idi eti mbụk?” Emi “guru” ọkọbọrọde ete: “Abasi eyekwọhọde kpukpru mmọn̄eyet efep . . . ndien n̄kpa m̀mê mfụhọ m̀mê ubiak ididụhe aba!” Esenowo oro ama obụp ete: “Afo asan̄a didie ọdiọn̄ọ mme utọ n̄kpọ emi?” Ibọrọ? “Owo ndomokiet ibọhọke Mme Ntiense Jehovah!” Ndien anaedi oro ekedi akpanikọ n̄ko aban̄a ewet ndise mbubru oro ke idemesie!
Akpan n̄kpọ aban̄ade mbuwed emi ye mmọ eken oro ẹbietde enye edi nte ke enye n̄kukụre iwụtke n̄kaiso ediwaha eke Mme Ntiense edi n̄ko n̄kemuyo oro odude ke etop mmọ. Ke mme ikọ ifan̄, ewet ndise oro ama owụt akpan ikpehe unọ ikọ ntiense eke ufọk ke ufọk mmọ onyụn̄ okot oto mme itien̄wed Abasi.—Men Matthew 24:7, 29; Ediyarade 21:3, 4 domo.
Akpanikọ oro nte ke ediwak owo ẹsịn etop mmọ inamke Mme Ntiense ẹkop mmemidem m̀mê ndinam ifịk mmọ etek. Apostle Peter ama ọtọt ete: “Ke ukperedem ini mbon nsahi ẹyeda nsahi ẹdi; mmọ ẹyesan̄a ke mme idiọkitọn̄ mmọ, ẹnyụn̄ ẹdọhọ ẹte, Edidi eke Enye ọkọn̄wọn̄ọde ete iyedi enye? koro tọn̄ọ nte mme ete ẹkede idap, kpukpru n̄kpọ ẹtie kpasụk nte ẹketiede toto ke editọn̄ọ ererimbot.” Kpa ye emi, ke edide se ima onụkde, Mme Ntiense ẹkaiso ndika mbịne mme mbọhọidụn̄ mmọ ndien ẹyenam ntre tutu Abasi ada utịt ọsọk mbiara editịm n̄kpọ oro odude kemi.—2 Peter 3:3, 4.
Jesus ọkọdọhọ ete ke ẹyebem iso ẹkwọrọ eti mbụk ke ukperedem ini. Kaban̄a n̄kaiso ndụn̄ọde kaban̄a ntak ye nte ẹkwọrọde, se ibuotikọ iba oro ẹtienede.—Mark 13:10.
[Mme ndise ke page 9]
Mme Ntiense Jehovah inyeneke otu mme ọkwọrọ ederi oro ẹkpede okụk ọfiọn̄—kpukpru mmọ ẹdi mme asan̄autom unyịmesịt