Ntọt M’ọkwọrọ Obio Ubọn̄

Ẹyekwọrọ Eti Mbụk Obio Ubọn̄

KE EDIWAK isua ikie akpan asua Abasi, Satan kpa Devil, ke n̄kari amada mme ukara ukaraidem ye nsunsu ido ukpono ke mme ukeme esie nditre editat ata Ido Ukpono Christ. Edi mme usụn̄ ẹmi ẹyekpu. Jesus ama ebemiso etịn̄ ete ke “ẹyenyụn̄ ẹkwọrọ [idịghe, “ekeme ndidi ẹyekwọrọ” m̀mê, “ẹkeme ndikwọrọ”] gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:14.

Edikpu oro Satan okpude amana in̄wan̄în̄wan̄ ke Greece. Ke idụt oro Ufọkabasi Greek Orthodox omodomo ndikpan Mme Ntiense Jehovah ndikwọrọ eti mbụk Obio Ubọn̄. Edi, nte ifiọkutom oro etienede mi owụtde, ke akpatre mme akpanikọ Bible ẹsịm mbon esịt akpanikọ kpa ye ubiọn̄ọ.

Ke n̄kpọ nte isua 30 ẹmi ẹkebede, oku Greek Orthodox kiet ama onyịme eti mbụk onyụn̄ akam owụt udọn̄ ndikabade ndi kiet ke otu Mme Ntiense Jehovah. Nte ededi, mme iman esie ẹma ẹnen̄ede ẹbiọn̄ọ usio-ukot emi ẹnyụn̄ ẹnyịk enye nditre ebuana esie ye Mme Ntiense. Man enem ubon esie esịt, enye ama akaiso ke ubọkọkọ esie nte oku; edi, enye ama esifiọk kpukpru ini ete ke Mme Ntiense Jehovah ẹma ẹn̄wam imọ ndikpep akpanikọ ye nte ke imọ ima isịn enye ke ntak akwa idaha ke nsunsu ido ukpono.

Nte ededi, enye ndusụk ini ama esitịn̄ ikọ ke ibuot Mme Ntiense Jehovah ke ini ifet edemerede. Ke ediwak idaha enye ama akam eteme mme owo ete ke edieke mmọ ẹyomde ndikpep mme akpanikọ Bible, mmọ ẹkpenyene ndikpep n̄kpọ ye Mme Ntiense. Ke ediwak isua ndusụk owo ke akpan ẹma ẹnam se enye okotorode emi.

Ke ndondo emi oku oro ama ọdọn̄ọ etieti onyụn̄ ọfiọk ete ke ekeme ndidi imọ iyekpa ke mîbịghike. Ke adan̄aemi odude ke ufọkibọk, enye ama okot nditọ esie, ndien kpukpru mmọ ẹma ẹsop ibuot ke itie bed esie.a Do enye ama anam an̄wan̄a mmọ ete ke edieke imọ ikpade ke mmọ ẹkeme ndifiak n̄kụt imọ. Enye ama eneme ọnọ mmọ aban̄a ukpepn̄kpọ Bible aban̄ade Jehovah ndinam mme owo ẹset ẹdidu uwem ke paradise ke isọn̄, edi edieke mmọ ẹnen̄erede ẹyom ndikụt oro otịbede, mmọ ẹnyene ndikpep akpanikọ nto Bible ẹnyụn̄ ẹwọrọ ẹkpọn̄ nsunsu ido ukpono. Enye ama ekpe ye mmọ ete ẹbuana ye Mme Ntiense Jehovah ẹnyụn̄ ẹkpep ẹto mmọ nte ẹkemede ndidi mme ata Christian.

Esisịt ini ke oro ebede oku oro ama akpa. Nte ededi, akpatre item oro enye ọkọnọde nditọ esie ama osion̄o nti utịp. Eyenan̄wan esie, ukem nte ata ediwak iman esie, ama enen̄ede asua Mme Ntiense Jehovah ye utom mmọ. Edi enye ikekemeke ndifụmi n̄kpeubọk esịt akpanikọ ete esie oro okoyomde ndikpa, ntre ikebịghike enye ama osobo ye Mme Ntiense Jehovah onyụn̄ ọtọn̄ọ ndikpep Bible. Ke ndondo emi enye ke idemesie ama akabade edi Ntiense, ayakde uwem esie ọnọ Jehovah Abasi onyụn̄ ayadarede uyakidem esie ke mmọn̄ baptism.

Ke Greece ye ke se iwakde ikan idụt 230 efen, Mme Ntiense Jehovah ẹberi edem ke odudu edisana spirit Abasi. Edi ye ọyọhọ ibetedem edisana spirit ke mmọ ẹbuana ke edisu prọfesi Jesus emi: “Mbufo ẹyebọ odudu, ke Edisana Spirit ama edi edidoro mbufo ke idem: mbufo ẹyenyụn̄ ẹdi mme ntiense Mi ke Jerusalem, ye ke ofụri Judea ye Samaria, tutu osịm utịt ererimbot.”—Utom 1:8.

[Mme Ikọ idakisọn̄]