Mme Ntiense Jehovah Ke Ofụri Ererimbot—Brazil
BRAZIL edi ata akwa idụt ke ediwak usụn̄. Ke udomo ye ke ibatowo, enye edi ọyọhọ idụt ition emi okponde akan ke ererimbot. Enye ekpere ndidi mbahade iba ke otu ofụri isọn̄ South America onyụn̄ awak owo akan kpukpru mme idụt eken ke akamba ubak isọn̄ oro ke ẹtan̄de ẹdian ọtọkiet. Brazil n̄ko enyene n̄kponn̄kan akai ke ererimbot. N̄kponn̄kan akpa ke isọn̄—kpa Amazon—ewet ebe ke akai oro.
Brazil n̄ko edi ata akwa idụt ke usụn̄ en̄wen. Ibat mme asuanetop eti mbụk Obio Ubọn̄ esie ekpere ndisịm 400,000, ndien isua oko se iwakde ikan 1,000,000 ẹkedụk Editi n̄kpa Christ. Idụt emi ke ntre edi n̄wọrọnda adan̄a nte utom edikwọrọ Obio Ubọn̄ abuanade. Mme ifiọkutom eke ndondo emi anam n̄kpọ emi an̄wan̄a.
Ndinam Utom ke Ebiet Udọn̄ Okponde Akan
Antonio ye n̄wan esie ẹma ẹnam ọkpọsọn̄ ubiere ndikpọn̄ iman mmọ ye eti utom emi ẹkpede uwak okụk ke São Paulo man ẹkenam utom ke ebiet emi udọn̄ kaban̄a mme anditan̄a Obio Ubọn̄ okponde akan ke stet Minas Gerais. Efakutom mmọ ama esịne otu mme anamutom ke itieutom unam sugar. Mmọ ẹma ẹtọn̄ọ ukpepn̄kpọ Bible usụkkiet ke akpa usen oro mmọ ẹkenọde ikọ ntiense do. Ke ufan̄ ọfiọn̄ 18, mmọ ẹma ẹnịm se iwakde ikan ukpepn̄kpọ Bible 40!
Ke akpa, ẹkesinịm mme mbonoesop ke itieutom oro. Nte ededi, mbufa mme asuanetop ẹma ẹyom ndikụt ata Ufọkmbono Obio Ubọn̄. Ntem, ẹma ẹbọ bọs ke ukpeokụk man emen owo 75 aka esop oro ekekperede akan. Ekem mbono ama edisịm; owo 45 ke otu mbufa nditọ ukpepn̄kpọ Bible oro ẹma ẹdụk ẹma ẹnyụn̄ ẹnam ndụn̄ọde ye mmọ. Ẹma ẹnịm owo 15 ke otu ẹmi baptism ke mbono oro. Nte ededi, n̄kpọ ikakpanke mmọn̄eyet idatesịt ndisiaha!
Kpa bọs usiakifia oro ke ẹkekama ke mme ukem isan̄ oro, ndien ikpọ mbonutom ẹma ẹsụhọde ekọmurua. Ke ndiwụt esịtekọm, Antonio ama ọnọ andinyene usiakifia oro n̄wed un̄wam ukpep Bible. Enye ama onyịme nditọn̄ọ ndikpep Bible kpa ke mbubịteyo oro onyụn̄ ana baptism ke ama ekesịn ifịk ekpep Bible ke ọfiọn̄ ifan̄ ẹbede. Ke akpa, n̄wan esie ama ọbiọn̄ọ ukpepn̄kpọ oro, edi nte ini akakade, edu esie ama okpụhọde. Mfịn enye n̄ko edi Ntiense Jehovah emi ama akana baptism.
Ke February 1992 ẹma ẹsiak esop emi enyenede ifịk ifịk mme asuanetop 22. Etisịm 1994 ibat emi ama ọdọk osịm 42, ye mme asiakusụn̄ ofụri ini 4, m̀mê mme ọkwọrọ eti mbụk uyọhọ ini. Nte utịp, Antonio ama ọdọhọ ete: “Ami ye n̄wan mi ima ikụt ite ke edieke ‘idomode Jehovah ise,’ nte Malachi 3:10 ọdọhọde, enye ‘eyen̄wan̄a nti n̄kpọ ọnọ nnyịn tutu akaha.’”
Ndinọ Mme N̄wed Bible
Eyedi ntak efen emi anamde utom ukwọrọikọ enyene utọ akwa n̄kọri ntre ke Brazil edi nte ke Mme Ntiense ẹsinọ mme n̄wed Bible ke kpukpru ifet. Ke uwụtn̄kpọ, esop kiet ama ewet ọfis n̄kọk itieutom Watch Tower Society oyom n̄wed Questions Young People Ask—Answers That Work 250. Ntak utọ akwa editobo oro?
Leta oro ama anam an̄wan̄a ete: ‘Kiet ke otu ufọkn̄wed ẹmi ẹdude ke obio emebiere ndikama n̄wed emi nte n̄wed ukpepn̄kpọ ke kiet ke otu mme ubet ukpepn̄kpọ. Ubiere mme akamautom ufọkn̄wed oro oto ntak ikọ ntiense ido nneme emi mme ete ye eka nditọ ufọkn̄wed ẹmi ẹdide Mme Ntiense Jehovah ye kiet ke otu mme eseutom ufọkn̄wed ẹkenọde. Jehovah akpakam akaiso ndidiọn̄ mme asan̄autom esie nte mmọ ẹnọde nti ukpep ebe ke n̄wed emi.’ Ih, akpakam Jehovah onyụn̄ akaiso ndidiọn̄ eti n̄kọri emi ẹnamde ke utom ukwọrọikọ Obio Ubọn̄ ke ata akwa idụt Brazil emi.
[Ekebe ke page 8]
IDAHA IDỤT ORO
Isua Utom 1994
N̄WAKN̄KAN IBAT ẸMI ẸNỌDE IKỌ NTIENSE: 385,099
MBAHADE: Ntiense kiet ke owo 404
MME ANDIDỤK EDITI: 1,018,210
UKEM MBAHADE MME ASUANETOP ẸDIDE MME ASIAKUSỤN̄: 38,348
UKEM MBAHADE UKPEPN̄KPỌ BIBLE: 461,343
IBAT ẸKENADE BAPTISM: 24,634
IBAT ESOP: 5,928
ỌFIS N̄KỌK ITIEUTOM: CESÁRIO LANGE
[Ndise ke page 9]
Moto usuanetop oro ẹkekamade ke São Paulo ke n̄kpọ nte 1940
[Ndise ke page 9]
Edinọ ikọ ntiense ke In̄wan̄ Eto ke Rio de Janeiro
[Ndise ke page 9]
Ọfis n̄kọk itieutom ke Cesário Lange