Nte Afo Emeti?

Nte afo ama adara ndikot mme nsiondi Enyọn̄-Ukpeme ndondo emi? Ke edide ntre, afo eyekụt nte edide inem n̄kpọ nditi se itienede mi:

▫ Nte ẹkeme ndinyene akpanikọ ido ukpono?

Jesus Christ ọkọdọhọ ete: “Mbufo ẹyefiọk akpanikọ, akpanikọ eyenyụn̄ anam mbufo ẹwọrọ ufụn.” (John 8:32) Jesus n̄kukụre ikowụtke ite ke ẹkeme ndinyene akpanikọ edi ama owụt n̄ko nte ke ndikụt enye edi se ẹyomde ke utuakibuot nnyịn nnọ Abasi. Enye ama asian n̄wan Samaria ete: “Ata mme andituak ibuot [ẹdituak] ibuot ẹnọ Ete ke spirit ye ke akpanikọ.” (John 4:23)—4/15, page 5.

▫ Anie ekedi Robert Estienne, ndien didie ke enye ọkọkpọn̄ idiọn̄ọ esie?

Robert Estienne ekedi emịn̄n̄wed emi okodude uwem ke ọyọhọ isua ikie 16. Enye ama ayak uwem esie esịn ke ndimịn̄ Edisana N̄wed Abasi onyụn̄ odomo ndiyarade mme ikọ Bible nte ẹkewetde mmọ ke akpa. Usụn̄ oro enye okosiode edi ndibahade Bible nsịn ke mme ufan̄ikọ ẹnyenede nọmba edi usụn̄ emi ẹkamade mfịn ke ofụri ererimbot.—4/15, page 10, 14.

▫ Didie ke nnyịn ibọ ufọn ito edikot Bible eke usen ke usen?

N̄wed Abasi enyene obufa n̄kpọ oro enye ọwọrọde ọnọ nnyịn kpukpru ini, ndien mme prọfesi ẹban̄ade ukperedem ini ẹtotịm ẹtụk owo ke idem ẹkan ke ẹkerede ẹban̄a se nnyịn ikụtde, ikopde, inyụn̄ ifiọkde ke idem nnyịn. Nte ifiọk nnyịn ke uwem atarade nnyịn inyụn̄ iyọde mme mfịna, nnyịn iyetịm idiọn̄ọ mme item Bible. (Mme N̄ke 4:18)—5/1, page 15.

▫ Didie ke ẹkeme nditi mme itien̄wed Bible?

Nte afo okotde Bible, sịn idiọn̄ọ ke mme itien̄wed oro ekemekde oro afo oyomde nditi, mîdịghe sion̄o mmọ dọn̄ ke n̄kpri babru nyụn̄ dọn̄ mmọ ke ebiet emi edikụtde mmọ kpukpru usen. Nte afo odomode ndimụm mme ufan̄ikọ ẹmi ndọn̄ ke ibuot, tie kere mmọ nyụn̄ da mmọ nam n̄kpọ. Kûdomo ndimụm ata ediwak mmọ ndọn̄ ke ibuot ini kiet, eyedi kiet m̀mê iba kpọt kpukpru urua.—5/1, page 16, 17.

▫ Nso ntọt ke Gospel Luke esịne oro adiande n̄kpọ efen efen ye se mme andiwet Gospel eken ẹnọde?

Ke adan̄aemi n̄waknkan ke se Luke ewetde edide ukem ye mbụk Matthew, mbahade 59 eke ikie okpụhọrede. Luke ama ewet mme utịben̄kpọ itiokiet ẹmi ẹdide n̄wọrọnda ke n̄wed esie, enye ama onyụn̄ obụk se iwakde ikan utịm ikaba ke ibat mme uwụtn̄kpọ Jesus ẹmi mme andiwet Gospel eken mîkasiakke.—5/15, page 12.

▫ Nso n̄wọrọnda uyama un̄wana akpanikọ ke ẹkeyarade ke 1935?

Isua oro ikọt Jehovah ẹma ẹdifiọk nte ke akwa otuowo oro ẹsiakde ke Ediyarade 7:9, 14 itịn̄ke itụk udiana otu eke heaven, edi etịn̄ otụk mbon oro ẹnyenede idotenyịn eke isọn̄. (John 10:16)—5/15, page 20.

▫ Ke ewe nti usụn̄ ke nnyịn ikeme ndidọn̄ mbon oro owo mmọ akpade esịt?

Kpan̄ utọn̄. Nọ nsọn̄ọ. Du ke itie. Nam usio-ukot ke ini odotde. Wet leta mîdịghe nọ kad oro ọnọde ndọn̄esịt. Bọn̄ akam ye mmọ. (James 5:16) Kaiso ndinọ mmọ un̄wam.—6/1, page 13, 14.

▫ Nso ke nditọete iren ye iban eke spirit ẹkeme ndinam man ẹn̄wam mbon oro ẹdụn̄de ke mme ubon ẹmi ẹbaharede ke n̄kan̄ ido ukpono ndiyọ?

Kpukpru ini, tịn̄ ikọ oro ẹsịnde udọn̄, ẹdide nti, ẹnyụn̄ ẹkamade ndọn̄esịt nọ mmọ. (1 Thessalonica 5:14) Emi esinam n̄kpọ nte n̄kpọ ọnọde ekikere ye ikpọkidem mmọ nduọkodudu. Ke ini oro ọfọnde onyụn̄ odotde, sịn mmọ ke mme edinam ukara Abasi ye eke n̄kaowo fo. Sịn mmọ ke akam fo. (Rome 1:9; Ephesus 1:16)—6/1, page 29.

▫ Nso utịp esito edinyene ime ke adan̄aemi ẹbuanade ke utom ukwọrọikọ?

Ime esin̄wam asuanetop Obio Ubọn̄ ndiyọ unana udọn̄ m̀mê ubiọn̄ọ ekededi. Utu ke ndineni eneni ye mme enyeneufọk ẹmi ẹyatde esịt, mme asan̄autom ẹmi ẹnyenede ime ẹyekeme ndinọ sụn̄sụn̄ ibọrọ mîdịghe ẹkpọn̄ sụn̄sụn̄, ntem ẹsụk ẹnyenede emem ye idatesịt. (Matthew 10:12, 13) N̄ko-n̄ko, mbon mbieterọn̄ ẹyesịk ẹkpere ndikop etop Obio Ubọn̄.—6/15, page 9.

▫ Ntak emi edifiọk akpanikọ Bible enyenede ufọn ntre?

Edifiọk akpanikọ anam nnyịn ibọhọ nsu, edikpu, ye nsunsu ekikere. Ke ini idade enye idu uwem, akpanikọ ọsọn̄ọ nnyịn idem ndiyọ nsọn̄ọn̄kpọ onyụn̄ anam nnyịn inyene idotenyịn oro an̄wamde nnyịn ndisọn̄ọ nda ke idak idomo ekededi.—7/1, page 8.

▫ Nso akpan mbiomo ke esop Christian oro ẹyetde aran ọkọbọ ata Israel obiom?

Ifet editie ntiense mban̄a ubom Jehovah ke otu mme idụt. (Isaiah 43:21; 1 Peter 2:9)—7/1, page 19.

▫ Nso ke ikọ apostle Peter ọwọrọ nte ke ebe ekpenyene ndinọ n̄wan esie ‘ukpono’? (1 Peter 3:7)

Ebe oro okponode n̄wan esie isueneke m̀mê isụhọkede enye itie. Utu ke oro, enye anam owụt ebe ke ikọ esie ye edinam esie—ke ndịbe ye ke eferife—nte ke imọ imada enye ke n̄kpọ. (Mme N̄ke 31:10-31)—7/15, page 19.

▫ Ntak emi ẹkemede ndidọhọ nte ke edibịn anamidiọk emi mîkabakede esịt mfep ke esop Christian edi ima ima n̄kpọ?

Edisio mfep edi ndiwụt ima nnọ Jehovah ye mme usụn̄ esie. (Psalm 97:10) Enye owụt ima ọnọ mbon oro ẹbịnede edinen usụn̄uwem koro enye osiode owo emi ekemede ndinyene idiọk odudu ke otu mmọ efep; emi n̄ko ekpeme edisana idaha eke esop. (1 Corinth 5:1-13)—7/15, page 25.

▫ Didie ke ẹkeme ndidiọn̄ọ “asan̄autom emi anamde akpanikọ, onyụn̄ enyenede ọniọn̄” mfịn, emi Jesus etịn̄de aban̄a ke Matthew 24:45-47?

Ẹdiọn̄ọ mmọ akpan akpan oto utom oro mmọ ẹnamde ke ndinọ mme n̄wed ẹkọn̄ọde ke Bible, ke ndikpep nnyụn̄ n̄kwọrọ “gospel Ubọn̄ Abasi,” ye ke mmọ ndiyịre ketket ke Ikọ Abasi, kpa Bible. (Matthew 24:14; 28:19, 20)—8/1, page 16.