Mme Ntiense Jehovah Ke Ofụri Ererimbot—India
INDIA! Akwa mbahade akamba ubak isọn̄ emi edi itieidụn̄ ọnọ owo 1 ke otu kpukpru owo 6 ẹmi ẹdude ke ekondo emi. Ke ẹkerede ẹban̄a kpukpru n̄kpọ, ẹsem se iwakde ikan usem 1,000 ke idụt nsio nsio uduot emi. Mme owo oro akpan akpan ẹdi mbon Hindu, mbahade 83 eke ikie ke otu mmọ, ke adan̄aemi mbahade 11 eke ikie ẹdide mbon Muslim, ye mbon Sikh, mbon Buddha, mbon Jain, ye mme Christian inua inua ẹnamde se isụhọde oro.
Mme Ntiense Jehovah ẹmekụt unen ke n̄wọrọnda usụn̄ ke India ke mme isua ndondo emi. Mmọ ẹmekụt mbon mbieterọn̄ ẹmi ẹnyịmede ndisọn̄ọ nda ke n̄kan̄ Obio Ubọn̄ Jehovah, kpa ye kpukpru orụk mfịghe ye ubiọn̄ọ.
Ke uwụtn̄kpọ, n̄kaiferi kiet ke ata ubon Hindu ama akabade edi mbụn̄ọ ke ntak ibe oro okomụmde enye toto ke uyen. Ufen oro enye ọkọbọde ama anam enye ekere aban̄a Abasi ye uduak uwem. Enye ama odụn̄ọde ediwak ido ukpono oyom ibọrọ edi ikekwe ndọn̄esịt. Nte utịp, enye ama ọduọk mbuọtidem ke ido ukpono, okposụkedi mîkedịghe ke Abasi.
Ke ukem ini emi Mme Ntiense iba ẹma ẹsobo ye n̄kaiferi emi ke utom ukwọrọikọ mmọ eke ufọk ke ufọk. Enye eti ete: “Mmọn̄eyet ama asiaha mi ke ini n̄kekopde nte mmọ ẹkotde Ediyarade 21:4.” Enye ama ọbọ ediwak n̄wed Watch Tower Society onyụn̄ enyịme ukpepn̄kpọ Bible kpa ye oro eka esie ekesịnde ubiọn̄ọ. N̄kaiferi emi ama anam ekese ukpụhọde ke uwem esie, osobo ubiọn̄ọ otode mme iman uko uko, onyụn̄ akabade edi Ntiense emi anade baptism. Enye ọdọhọ ete: “Ami mmanam ekese n̄kọri, ndien emi ekedi ata ọkpọsọn̄ edinam. Edi Jehovah Abasi omodu ye ami kpukpru ini onyụn̄ ọnọ mi akwa emem ye idatesịt.”
Nsọn̄ọnda Kaban̄a Edisana Utuakibuot ke Ufọkn̄wed
Andikpep ama ọdọhọ uyen kiet edide eyenete an̄wan ete etiene mbon eken ke ubet ukpepn̄kpọ aka ufọkabasi Catholic. Eyenete an̄wan oro ama esịn ke ukpono ukpono usụn̄, ọdọhọde ete ke imọ ikedi kiet ke otu Mme Ntiense Jehovah ndien ke idituakke ibuot inọ owo m̀mê n̄kpọ ekededi ke ebede Jehovah. Andikpep oro ama ọdọhọ ete ke ini kpukpru mbon eken ẹdikade ufọkabasi, enye enyene ndika n̄ko. Edi eyenete an̄wan oro ama ọsọn̄ọ ada onyụn̄ ọdọhọ ete sia mbon oro ẹkade ufọkabasi mîdibọn̄ke akam inọ Jehovah, imọ ikwe nte iditienede idu do.
Ke ntak nsọn̄ọnda n̄kaiferi emi, andikpep mmọ ama oyom ndifiọk n̄kpọ efen efen. Ntre ke ndan̄nsiere eyenete an̄wan emi ama ọnọ enye ibuotikọ Enyọn̄-Ukpeme oro enemede aban̄a utuakibuot Jehovah. Ke se enye okokotde otụkde enye, andikpep oro ndien ama osio enye efep ke kpukpru edinam ido ukpono ke ufọkn̄wed. Eyenete an̄wan oro ama ekeme ndinịm magazine duop ye enye ye mme andikpep eken.
Ndisụk Ibuot Nnọ Ibet Abasi Kaban̄a Iyịp Ama Akama Utịp
Ke ndondo emi ufiopidem emi otode ifọt udọn̄ọ ama atara asuana ke ndusụk ikpehe ke obio Kerala. Udọn̄ọ emi esibiat ekpụt idiọk idiọk onyụn̄ ada osịm se oyomde ẹsịn mmọn̄ ke idem. Ẹsiwak ndikịm iyịp nsịn owo ke idem. Ke obio kiet ufọkibọk ama enyene owo 14 ẹmi ẹkedọn̄ọde udọn̄ọ emi. Kiet ke otu mbon udọn̄ọ ẹmi ekedi Ntiense, ebiowo ke esop n̄kann̄kụk. Ẹma ẹsian enye nte ke edikịm iyịp nsịn ke idem edi n̄kukụre usọbọ oro odude. Ebiowo oro ama anam mme edinịm ke akpanikọ esie ẹmi ẹkọn̄ọde ke N̄wed Abasi ẹn̄wan̄a onyụn̄ ọsọn̄ọ esịn ndibọ iyịp. (Utom 15:28, 29) Ke ẹma ẹkeneni ekese mme dọkta ẹma ẹdọhọ ẹte ke enye eyekpa sia enye esịnde ndibọ edikịm iyịp nsịn ke idem.
Mbon udọn̄ọ 13 eken ẹma ẹbọ iyịp. Ke n̄kpọ mmọn̄eyet, kpukpru mmọ ẹma ẹkpan̄a ke ufan̄ usen ifan̄. Eyenete oro ekedi n̄kukụre owo oro ọkọbọhọde! Mme anamutom ufọkibọk ẹma ẹdu ke ata n̄kpaidem. Edika n̄kese oro mme andibuana ke esop ẹkesikade kpukpru ini ama otụk mme ọnọ ibọkusọbọ akamba akamba. Ke ẹma ẹkesio enye unyọn̄ ke ufọkibọk, eyenete oro ama afiak aka ndikọm mme dọkta ẹmi, edi mmọ ẹma ẹdọhọ ẹte: “Ntak emi afo ọkọmde nnyịn? Kọm Abasi fo, Jehovah. Enye edi Owo emi akanyan̄ade fi. Mbọk bọn̄ akam nọ Abasi fo, Jehovah, ban̄a nnyịn.”
[Ekebe ke page 24]
IDAHA IDỤT ORO
Isua Utom 1994
N̄WAKN̄KAN IBAT ORO ẸNỌDE IKỌ NTIENSE: 14,271
MBAHADE: Ntiense 1 ke owo 65,266
MME ANDIDỤK EDITI: 38,192
UKEM MBAHADE MME ASUANETOP ASIAKUSỤN̄: 1,780
UKEM MBAHADE UKPEPN̄KPỌ BIBLE: 12,453
IBAT ẸKENADE BAPTISM: 1,312
IBAT ESOP: 410
ỌFIS N̄KỌK ITIEUTOM: LONAVLA
[Ndise ke page 25]
Ọfis n̄kọk itieutom, Lonavla
[Ndise ke page 25]
Ndinọ ikọ ntiense ke ebuana ye mbono “Nsinsi Eti Mbụk” ke 1963
[Ndise ke page 25]
Ndikwọrọ ikọ nnọ anyam n̄wed ke an̄wa Red Fort ke Delhi