Eti Mbụk Odu Ke Iso!

KPUKPRU nnyịn imesifụhọ ke ini ibọde idiọk mbụk oro otụkde nnyịn ọkpọkpọ. Ke n̄kan̄ eken, nnyịn imesidat esịt ke ini ikopde eti mbụk—idara idara mbụk oro ebehede nnyịn m̀mê mbonima nnyịn. Edi ke ini idiọk mbụk otụkde mbon en̄wen mînyụn̄ itụkke nnyịn, mme owo ẹsiwak ndimenede utọn̄ ke enyọn̄; akam esinem ndusụk owo ndikop mban̄a ndiọkiso mbon en̄wen. Emi ekeme ndinam an̄wan̄a ke ubak ubak ntak emi idiọk mbụk esinen̄ede anyama ntre!

Ke ntọn̄ọ ntọn̄ọ ini Ekọn̄ Ererimbot II, in̄wan̄în̄wan̄ uwụtn̄kpọ ama odu kaban̄a idiọk udọn̄ oro mme owo ẹkenyenede ẹban̄a afanikọn̄ oro okosịmde ndusụk owo. Graf Spee, nsụn̄ikan̄ ekọn̄ odobide tọn 10,000 ekedi n̄kpọ ntan̄idem ke otu nsụn̄ikan̄ mbon Germany ke 1939. Ke ediwak urua nsụn̄ikan̄ ekọn̄ emi ama esịn ntịme ke otu nsụn̄ikan̄ mbonurua oro ẹkedianade kiet ke mme Inyan̄ibom Edem Usụk Atlantic ye India. Ke akpatre, nsụn̄ikan̄ ekọn̄ mbon Britain ita ẹma ẹdisịm usọp usọp ẹnyụn̄ ẹn̄wana ye Graf Spee, ẹbiat uwem owo ẹnyụn̄ ẹnyịk nsụn̄ikan̄ oro awat sụn̄sụn̄ ekebehe ke esụk Montevideo eke Uruguay man ẹkediọn̄. Ukara Uruguay ama ọdọhọ ẹfiak ẹsịn nsụn̄ikan̄ oro ke akpa usọp usọp, mîdịghe ntre ẹyekọbi ẹnịm. Ntre ama ana in̄wan̄în̄wan̄ nte ke n̄kan̄ kiet ekeme ndikan ke idat idat ekọn̄ oro.

Ke ẹkopde emi, otu mme anam mbubehe ẹmi ẹdide mme enyene n̄kpọ owo ke United States ẹma ẹbọ ubomofụm, ke ukpeokụk ke ekọmurua akakpade n̄kpọ nte $2,500 ke ibuot owo kiet, ndife n̄ka Uruguay man ẹkekụt ekọn̄ uduọkiyịp oro. Ke ndiọkiso mmọ, ekọn̄ oro ikan̄wanake. Adolf Hitler ama ọnọ uyo ete ẹtịbi ndudu ke idak Graf Spee. Ediwak tọsịn mme ndanse ẹmi ẹkebụn̄ọde ẹka esụk ye idotenyịn ndikụt ọkpọsọn̄ ekọn̄ ke mmọn̄, ẹkekam ẹkụt ẹnyụn̄ ẹkop ọkpọsọn̄ uyom oro akanamde Graf Spee oro osịp, oto ndudu oro mme anamutom esie ẹketịbide. Etubom nsụn̄ikan̄ oro ama otop idemesie ke ikan̄ ke ibuot owot.

Kpa ye se iketiede nte ọkpọsọn̄ ndịk oro akanamde ndusụk owo, ata ediwak owo ẹyenyịme ke mmimọ imema eti mbụk ikan idiọk mbụk. Nte itiehe fi ntre? Ntak, ndien, emi mbụkeset ewetde ekese idiọk mbụk ntre ye ata esisịt eti mbụk? Nte ẹkeme ndikpụhọde idaha oro tutu amama?

Mme Ntak Kpukpru Idiọk Mbụk

Bible etịn̄ aban̄a ini emi eti mbụk ikpọn̄ okodude. Idiọk mbụk ekedi n̄kpọ oro owo mîdiọn̄ọke, mînyụn̄ ikopke. Ke ini Jehovah Abasi okokụrede mme utom obot esie, ama eben̄e ekondo Isọn̄ ọnọ owo ye unam man ẹkop idatesịt. Mbụk Genesis asian nnyịn ete: “Abasi okụt kpukpru se enye akanamde, ndien, sese ẹfọn eti eti.”—Genesis 1:31.

Idiọk mbụk nditre ndidu ikenen̄ekede ibịghi ke ẹma ẹkebot owo. Mbemiso eyen ndomokiet akamanade ọnọ Adam ye Eve, ẹma ẹtọt idiọk mbụk ẹban̄a nsọn̄ibuot ye Abasi ye ndutịm ekondo esie emi asan̄ade ke nde ke nde. Eyen eke spirit emi okokon̄de ke itie ama abiat itie ibetedem oro ẹkenọde enye onyụn̄ okụt unen ke ndinam akpa owo iba oro ẹdiana ye enye ke edinam nsọn̄ibuot esie, kpa ubia mbia.—Genesis 3:1-6.

Akpakịp idiọk mbụk ẹmi ubonowo okopde ẹkenyene ntọn̄ọ ke ini oro. Idịghe n̄kpọ n̄kpaidem nte ke n̄kari, abian̄a, nsu, unana editịn̄ akpanikọ, ye ubak akpanikọ ẹmewụt idem ata in̄wan̄în̄wan̄ ke idiọk mbụk oro ọyọhọde ererimbot toto ko. Jesus Christ okodori Satan nduduọhọ nnennen ke idem nte anditọn̄ọ idiọk mbụk, ọdọhọde mme adaiso ido ukpono eke eyo Esie ete: “Mbufo ẹdi nditọ ete mbufo, kpa Satan, ẹnyụn̄ ẹyom ndinam obukpo udọn̄ ete mbufo. Enye edi owot-owo toto ke editọn̄ọ, ikonyụn̄ isọn̄ọke ida ke akpanikọ, koro enye mînyeneke akpanikọ ke esịt esie. Ke ini enye osude nsu, enye osio se idude ke esịt esie etịn̄: koro enye edi osu nsu, ye ete nsu.”—John 8:44.

Nte mme owo ẹkọride ke ibat, idiọk mbụk ọkọri etiene. Nte ededi, emi iwọrọke ite ke mme ini idatesịt ye inemesịt ikodụhe, koro ediwak n̄kpọ ẹma ẹdu ke uwem emi ẹkedide ntak idatesịt. Kpa ye oro, uyarade mfịna ye mfụhọ ẹmedu ke ofụri emana ubonowo tutu osịm mfịn.

Akpan ntak en̄wen odu kaban̄a akama-mfụhọ idiọk idaha emi. Oro edi ndammana ntụhọ idiọkn̄kpọ ye afanikọn̄. Jehovah ke idemesie asiak ntak idiọk mbụk emi owo mîkemeke ndifep mi ke ndidọhọ ete: “Ekikere esịt owo [ọdọdiọk] toto ke uyen esie.”—Genesis 8:21.

Ntak Emi Idiọk Mbụk Ọkọride?

Nte ededi, odu ntak emi idiọk mbụk ọkọride ke isua ikie 20 emi. Ẹwụt ntak emi in̄wan̄în̄wan̄ ke Bible, emi ekebemde iso etịn̄ ete ke ubonowo ke ọyọhọ isua ikie 20 eyedụk n̄wọrọnda ini oro ẹdiọn̄ọde nte “ukperedem ini” m̀mê “utịt ini.” (2 Timothy 3:1; Daniel 12:4) Prọfesi Bible ye ubatini Bible ẹnam ẹdiọn̄ọ “utịt ini” emi, emi ọkọtọn̄ọde ke 1914. Kaban̄a ọyọhọ uyarade N̄wed Abasi ke emi, mbọk se ibuot 11 ke n̄wed oro Ifiọk Oro Adade Osịm Nsinsi Uwem, emi Watchtower Bible and Tract Society of New York, Inc., emịn̄de.

Mme ukperedem ini ẹkenyene nditọn̄ọ ye n̄kpọntịbe oro inikiet inikiet edinamde idiọk mbụk ke isọn̄ ọkọri. Nso ikedi oro? Enye ekedi edisio Satan kpa Devil ye udịm mme demon esie ke heaven nduọn̄ọ ke isọn̄. Afo emekeme ndikot in̄wan̄în̄wan̄ mbụk aban̄ade idiọk mbụk emi owo mîkemeke ndifep mi ke Ediyarade 12:9, 12: “Ẹsio akwa dragon ẹduọk ke isọn̄, kpa akani urụkikọt oro ẹkotde enye ẹte, andidori ikọt Abasi ikọ ye Satan, andibian̄a ofụri ererimbot; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye. . . . Mbọm isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.”

Ntre se ededi ini osụhọde mbemiso ukperedem ini ẹmi osịmde utịt esie, nnyịn imekeme ndidori enyịn idiọk mbụk ndika iso idem ndinyụn̄ n̄kọri ke ibat ye ke udomo.

N̄kpọ Iditiehe Ntem Kpukpru Ini

Ke edide n̄kpọ inemesịt ọnọ mme andidụn̄ isọn̄, idaha unana inemesịt oro adade ntatara idiọk mbụk edi ididụhe kpukpru ini. Ke akpanikọ, nnyịn imekeme nditịn̄ ye mbuọtidem nte ke mme usen n̄kaiso idiọk mbụk ọmọn̄ osịm utịt. Idaha oro odude idịghe enyeoro idotenyịn mîdụhe, kpa ye n̄kpọ oro ekemede ndinam oro etie ntre. Utịt kpukpru idiọk mbụk emekpere etieti idinyụn̄ itreke ndidi ke edikem ini Abasi.

Nnyịn imekeme ndinịm emi ke akpanikọ sia ẹketịn̄de ke prọfesi ẹte ke nsobo Abasi edida mme ukperedem ini osịm ata-utịt m̀mê utịt ye edisio kpukpru ntak idiọk mbụk mfep. Enye eyesio ndiọi owo ẹmi ẹsịnde nsọk ẹnọ en̄wan ẹmi ẹsịnde ndikpụhọde nnyụn̄ n̄wọn̄ọde n̄kpọn̄ idiọk usụn̄ mmọ. Emi edisịm utịt ke ekọn̄ akwa usen Abasi kpa Ata Ọkpọsọn̄, emi ẹwakde ndidiọn̄ọ nte ekọn̄ Armageddon. (Ediyarade 16:16) Ndondo oro ebede, ẹyetre utom Satan kpa Devil ye udịm mme demon esie. Ediyarade 20:1-3 etịn̄ aban̄a edikọbi Satan, anditọn̄ọ ofụri idiọk mbụk ete: “Ekem n̄kụt angel otode ke heaven osụhọde, akama ukpọhọde editụn̄ọ ukpe ye akwa n̄kpọkọbi ke ubọk. Enye onyụn̄ omụm dragon, akani urụkikọt, emi edide Andidori ikọt Abasi ikọ ye Satan, onyụn̄ ọkọbi enye ke thousand isua, onyụn̄ otop enye esịn ke editụn̄ọ ukpe, onyụn̄ ọkọbi ukpe, onyụn̄ esịri abaha enye, onịm ufịk-n̄kpọ ke esịt, man okûbian̄a aba mme idụt.”

Ke etienede n̄wọrọnda n̄kpọntịbe ẹmi, anana-mbiet ini eti mbụk eyedi ọnọ isọn̄ ye mme andidụn̄ enye. Mme andidụn̄ ẹmi ẹyesịne ediwak miliọn owo ẹmi ẹbọhọde akpatre ekọn̄ Armageddon ye ediwak biliọn owo ẹmi ẹdinamde ẹset ke idap n̄kpa ẹto ke udi ẹwọn̄ọ ẹdi. Ẹtịn̄ ẹban̄a ata mfọnn̄kan eti mbụk emi ke akpatre n̄wed Bible ẹte: “Ebiet idụn̄ Abasi omodu ye owo. Enye eyenyụn̄ odụn̄ ye mmọ; ndien mmọ ẹyedi ikọt Esie, Abasi ke Idem Esie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:3, 4.

Nte afo emekeme ndikere mban̄a utọ ini inemesịt oro? Ke akpanikọ enye edi ubọn̄ ubọn̄ ini iso emi idiọk mbụk mîdidụhe aba. Ih, kpukpru idiọk mbụk eyesịm utịt ndien owo idikopke mmọ aba. Eti mbụk eyewọrọ etop, adan̄aoro eyenyụn̄ odu ke nsinsi nsinsi.