Mme Mbụme Ẹtode Mme Andikot
Nso ke ikọ apostle Paul ọkọwọrọ ke ini enye ọkọdọhọde ke imọ ‘ifefre se idude ke edem, inyụn̄ inyanade ibịne se inade ke iso’? (Philippi 3:13) Nte owo ekeme ndikokoi mfre n̄kpọ?
Baba, ke ata ediwak idaha nnyịn ikemeke ndikokoi nsio n̄kpọ ke ekikere nnyịn mfep. Akpanikọ edi, ke nnyịn imesifre ekese n̄kpọ oro nnyịn ikpamade nditi inyụn̄ iti ediwak n̄kpọ ẹmi idifrede ke esisịt ini. Nso, ndien, ke ikọ Paul ọkọwọrọ ke ini enye ekewetde mme ikọ eke Philippi 3:13? Udọn̄ikọ oro an̄wam ndinam oro an̄wan̄a nnyịn.
Ke Philippi ibuot 3, Paul etịn̄ aban̄a ‘ibetedem esie ke obụkidem.’ Enye etịn̄ aban̄a eti idaha esie ke uwem nte owo Jew ye ifiopesịt emi enye ekenyenede ọnọ Ibet—kpa mme n̄kpọ ẹmi ẹkpekenọde enye ekese ufọn ke idụt Israel. (Philippi 3:4-6; Utom 22:3-5) Kpa ye oro, enye ama esịn mme utọ ufọn oro, abatde mmọ ke ntakurua, yak idọhọ ntre. Ntak-a? Koro enye ama okụt n̄kpọ oro ọkọfọnde akan—kpa “akan ifiọk Christ Jesus.”—Philippi 3:7, 8.
Akpan utịtmbuba Paul ikedịghe ndinyene itie ke ererimbot emi, edi ekedi “[akpa] ediset ke n̄kpa.” (Philippi 3:11, 12) Ntem, enye ewet ete: “Mfefre se idude mi ke edem, nnyụn̄ nnyanade mbịne se inade mi ke iso; mmesịn ifịk n̄ka iso mbịne utịtmbuba, man n̄kpọbọ utịp akwa ikot eke Abasi okokotde mi ke Christ Jesus.” (Philippi 3:13, 14) Ke ini Paul ọkọdọhọde ke imọ ‘ifefre se idude ke edem,’ ikọ esie ikọwọrọke ke imọ ke usụn̄ ekededi ima isio ‘se idude ke edem’ ifep ke ekikere imọ. Enye nte an̄wan̄ade okosụk eteti mmọ, sia mîbịghike nte enye akakam asiak mmọ. Akande oro, ke akpasarade usem Greek, enye ada orụk ikọedinam oro owụtde edinam oro akade-ka iso, emi mîkụreke. Enye ọdọhọ “mfefre,” idịghe “mma mfre.”
Ikọ Greek oro ẹkabarede “fre” (e·pi·lan·thaʹno·mai) enyene nsio nsio se enye ọwọrọde, emi kiet ke otu mmọ edide “kûdọn̄ enyịn,” m̀mê “fụmi.” Nte ekemde ye Exegetical Dictionary of the New Testament (emi Horst Balz ye Gerhard Schneider ẹwetde), emi edi se “mfefre” ke Philippi 3:13 ọwọrọde. Paul ikesikereke kpukpru ini iban̄a mme n̄kpọ ẹmi enye ọkọkpọn̄de. Enye ama ekpep ndise mmọ nte se inyenede esisịt ufọn. Mmọ ẹketie nte “mbio” ke ẹmende ẹdomo ye idotenyịn eke heaven.—Philippi 3:8.
Didie ke mme ikọ Paul ẹkeme ndinyene n̄kpọ ndinam mfịn? Ọfọn, Christian, ukem nte Paul, ekeme ndinam uwaidem man anam n̄kpọ Abasi. Eyedi enye ama ọkpọn̄ eti ubọkọkọ man odụk utom uyọhọ ini. Mîdịghe ekeme ndidi enye okoto ubon imọ oro eketrede ndinọ enye okụk sia mmọ ẹsuade akpanikọ. Ẹtoro mme utọ uwaidem emi, edi mmọ idịghe n̄kpọ emi owo ekpekerede aban̄a kpukpru ini. Christian ‘efre,’ etre ndikere mban̄a, ‘se idude ke edem’ ke ntak ubọn̄ ubọn̄ ini iso oro anade ebet enye.—Luke 9:62.
Eyedi ẹkeme ndida edumbet odude ke mme ikọ Paul nnam n̄kpọ ke usụn̄ en̄wen. Nso kaban̄a Christian oro ama ekesịn idem ke idiọk edinam mbemiso ekpepde n̄kpọ aban̄a Abasi? (Colossae 3:5-7) Mîdịghe nso edieke enye anamde akwa idiọkn̄kpọ, ke ama akakabade edi Christian, esop onyụn̄ otụnọde enye. (2 Corinth 7:8-13; James 5:15-20) Ọfọn, edieke enye atuade n̄kpọfiọk ke esịt akpanikọ onyụn̄ okpụhọde mme usụn̄ esie, ‘ẹyet enye asana.’ (1 Corinth 6:9-11) Se ikotịbede ama ebe. Ekeme ndidi enye ke ataata usụn̄ idifreke se enye akanamde tutu amama—ke akpanikọ, eyewụt ifiọk enye ndikpep n̄kpọ nto ifiọk n̄kpọntịbe oro man enye okûfiak anam idiọkn̄kpọ oro aba. Kpa ye oro, enye ‘efre’ ke usụn̄ifiọk eke editre ndibiom idemesie ikpe kpukpru ini. (Men Isaiah 65:17 domo.) Ke ẹma ẹkefen enye oto isọn̄ uwa ufak Jesus, enye odomo ndifre mban̄a se ikotịbede ke edem.
Ke Philippi 3:13, 14, Paul etịn̄ aban̄a idemesie nte efehe itọk mbuba, ‘anyanarede ebịne’ ndisịm utịtmbuba. Efehe itọk esise iso, idịghe edem. Kpasụk ntre, Christian ekpenyene ndise mme edidiọn̄ ẹdude ke iso, idịghe mme n̄kpọ ẹkekpọn̄de ke edem. Paul n̄ko ọdọhọ ete: “Edieke mbufo ẹnyenede ekikere eke ẹkpụhọrede ke se ntetịn̄, Abasi eyeyarade emi ọnọ mbufo.” (Philippi 3:15) Ntem, bọn̄ akam nọ Abasi an̄wam fi ọkọri idaha ekikere emi. Yọhọ esịt fo ye mme ekikere Abasi kpa nte ẹkụtde ke Bible. (Philippi 4:6-9) Tie kere ban̄a ima oro Jehovah enyenede ọnọ fi ye mme edidiọn̄ oro afo adarade ke ntak oro. (1 John 4:9, 10; 17-19) Ndien, ebede ke edisana spirit Jehovah eyen̄wam fi okûkere aban̄a se afo ọkọkpọn̄de ke edem. Utu ke oro, ukem nte Paul, afo eyese ubọn̄ ubọn̄ ini iso oro odude ke iso.—Philippi 3:17.