Ndi Bible Ekpep Ete Ẹnịm Akan̄a Ke Akpanikọ?

IKỌ EBIARI! EDIDỌK! Ke ini owo oro ẹkponode ke obio ekerede ke ẹbiat enyịn̄ ye idaha imọ ebe ke nsunsu mbụk, eyebiomo enye ndinen̄ede mme n̄kpọ. Enye ekeme ndikam n̄kot mbon oro ẹdide ntak ikọ ebiari emi ikpe.

Ọfọn, ukpepn̄kpọ edibem iso mbiere n̄kpọ nnịm idịghe n̄kpọ efen ikan edidọk Ata Ọkpọsọn̄ Abasi edidọk. Ekikere oro ọdọhọ ete ke Abasi ke idemesie edi ntak kpukpru nnama ye ndiọkiso oro ọnọmọde ubonowo. Edieke afo onịmde akan̄a ke akpanikọ, afo emekeme ndikere nte ke Andikara Ekondo ama otịm n̄wed oro esịnede n̄kpọ oro ebietde enyeoro etienede mi: ‘Mfịn, John eyeda unan ke mbabuat n̄kpọntịbe o-moto, Fatou eyedọn̄ọ utoenyịn, oyobio eyebiat ufọk Mamadou’! Nte afo ekpenen̄ede oyom ndikpono utọ Abasi oro?

Mbon oro ẹnịmde akan̄a ke akpanikọ ẹbụp ẹte: ‘Edi edieke mîdịghe Abasi edi ntak ndiọkiso nnyịn, anie ndien edi?’ Ousmane, ekpri akparawa oro ẹkesiakde ke ibuotikọ oro ekebemde iso, ama ekere aban̄a emi ke idemesie. Edi ikoyomke enye ekekere man osịm akpanikọ. Enye ama ekpep ete ke Abasi ama odorode edidọk oro efep ke idem ebe ke mme ukpepn̄kpọ oro ẹkụtde ke Ikọ Esie eke odudu spirit, kpa Bible. (2 Timothy 3:16) Ẹyak nnyịn ikere, ndien, se Bible etịn̄de aban̄a ibuot nneme emi.

Anie ke Ẹkpeduọhọ?

Ukwọ, oyobio, unyekisọn̄—ẹsiwak ndikot mme utọ unọmọ oro mme edinam Abasi. Edi Bible iwụtke ite ke Abasi esinam mme utọ afanikọn̄ oro ẹtịbe. Kere ban̄a n̄kpọ mmọn̄eyet oro okotịbede ediwak isua ikie ẹmi ẹkebede ke Ufọt Ufọt Edem Usiahautịn. Bible asian nnyịn ete ke n̄kukụre owo oro ọkọbọhọde nsobo emi okobụk ete: “Ikan̄ Abasi [ikọ Hebrew oro esiwakde ndiwọrọ emịnen̄mịnen̄] omoto ke enyọn̄ ọduọ edifọp n̄kpri ufene, ye n̄kparawa fo, onyụn̄ ata mmọ.”—Job 1:16.

Okposụkedi ekemede ndidi owo oro okokopde ndịk mi ekekere ke Abasi ekedi ntak ikan̄ oro, Bible owụt ete ke owo ikenyeneke ndiduọhọ Enye. Kot Job 1:7-12 ke idemfo, ndien afo eyefiọk ete ke idịghe Abasi ekedi ntak emịnen̄mịnen̄ oro, edi okoto Asua esie—Satan kpa Devil! Idịghe kpukpru unọmọ ẹto Satan nnennen. Edi nte an̄wan̄ade, ntak ndomokiet idụhe ndiduọhọ Abasi.

Ke nditịm ntịn̄, awak ndidi mme owo ẹnyene nduduọhọ ke ini mme n̄kpọ mîbonoke ẹfọn. Edinyene edikpu ke ufọkn̄wed, ke itieutom, m̀mê ke itie ebuana owo ekeme ndisụn̄ọ nto unana ukeme ye eti ukpep m̀mê unana edikere mban̄a mmọ en̄wen. Kpasụk ntre, udọn̄ọ, mbabuat n̄kpọntịbe, ye n̄kpa ẹkeme ndisụn̄ọ nto unana ntịn̄enyịn. Kamse, owo ndikam n̄kpaha n̄kpaha n̄kpọitie ke ini awatde uwat esinen̄ede osụhọde ifet owo ndikpa ke mbabuat n̄kpọntịbe moto. N̄kpaha n̄kpọitie ikpanamke ufọn ndomokiet edieke “akan̄a” oro owo mîkemeke ndikpụhọde edide ntak mme n̄kpọ. Nnennen ibọkusọbọ ye usanaidem n̄ko ẹsisụhọde ibat n̄kpa nsek akamba akamba. Idem ndusụk afanikọn̄ oro ẹsiwakde ndikot “mme edinam Abasi” ẹdi, ke akpanikọ, mme edinam owo—mfụhọ mfụhọ utịp otode owo ndida isọn̄ nnam n̄kpọ ke idiọk usụn̄.—Men Ediyarade 11:18 domo.

“Ini ye Unọmọ”

Edi akpanikọ, ediwak mfụhọ mfụhọ n̄kpọntịbe ẹdu ẹmi owo mînen̄ekede ifiọk ntak. Nte ededi, tịm fiọk se Bible etịn̄de ke Ecclesiastes 9:11 ete: ‘Ntie ke idak utịn n̄kabade, nnyụn̄ n̄kụt nte ke idịghe mbon nsọp-itọk ẹkan ke mbuba, inyụn̄ idịghe mbon-uko ẹkan ke ekọn̄, nte ke idịghe mbon eti ibuot ẹnyene udia, inyụn̄ idịghe mbon ikike ẹkụt inyene, inyụn̄ idịghe mme ọfiọkn̄kpọ owo ẹnyene itoro: koro ini ye unọmọ ẹtịbede ọnọ mmọ kpukpru.’ Ke ntre ntak ndomokiet idụhe ndikere nte ke Andibot edi ntak mbabuat n̄kpọntịbe m̀mê nte ke ẹnọ mbon unọmọ mbabuat n̄kpọntịbe ufen ke usụn̄ kiet m̀mê eken.

Jesus Christ ke idemesie ama afan̄a akama-nsobo ekikere edibem iso mbiere n̄kpọ nnịm oro. Ke etịn̄de otụk n̄kpọ mmọn̄eyet oro mme andikpan̄ utọn̄ nnọ enye ẹketịmde ẹdiọn̄ọ, Jesus ama obụp ete: “Owo efụteta ẹmi tower Siloam ọkọduọde ọtọ mmọ owot, nte mbufo ẹse ẹte mmọ ẹdi mme abiat-ibet ẹkan kpukpru mme andidụn̄ ke Jerusalem? Ndọhọ mbufo nte, idịghe ntre.” (Luke 13:4, 5) Jesus nte an̄wan̄ade ikabuanke afanikọn̄ oro ye edinam Abasi, edi akabuan ye “ini ye unọmọ.”

Mme Akama-Nsobo Utịp Unana Mfọnmma

Edi, nso kaban̄a n̄kpan̄a ye mme udọn̄ọ oro owo mîkemeke ndinam an̄wan̄a? Bible etịn̄ nnennen aban̄a idaha ubonowo ete: ‘Kpukpru owo ẹkpan̄a ke Adam.’ (1 Corinth 15:22) N̄kpa ọmọnọmọ ubonowo toto nte eteete nnyịn Adam okodụk usụn̄ nsọn̄ibuot. Kpa nte Abasi ọkọtọtde, Adam ama ayak n̄kpọ akpa edide n̄kpa ọnọ nditọ esie. (Genesis 2:17; Rome 5:12) Ke akpatre, ndien, ẹkeme ndidụn̄ọde ntọn̄ọ kpukpru udọn̄ọ n̄kosịm eteete nnyịn Adam. Mme ndammana mmeme nnyịn n̄ko ẹnyene ekese ndinam ye mme edikpu ye unana edikụt unen oro isobode ke uwem.—Psalm 51:5.

Kere ban̄a mfịna unana. Edinịm akan̄a ke akpanikọ esiwak ndisịn udọn̄ nnọ mbon oro ẹkụtde ukụt ndiyak idemmọ nnọ uwem nsọn̄ọn̄kpọ. Mmọ ẹnịm ke akpanikọ ẹte ke ‘emi edi akan̄a mmimọ.’ Bible owụt, nte ededi, ete ke unana mfọnmma owo ke ẹnyene ndiduọhọ, idịghe akan̄a. Ndusụk owo ẹkabade ẹdi ubuene ke ini mmọ ‘ẹdọkde se mmọ ẹketọde’ ẹto editie ifu ye edida inyene nnam n̄kpọ ke idiọk usụn̄. (Galatia 6:7; Mme N̄ke 6:10, 11) Ediwak miliọn owo ẹdu ke unana koro mme ọdiọkitọn̄ ẹmi ẹdude ke ukara ẹnọmọde mmọ. (Men James 2:6 domo.) Bible ọdọhọ ete: ‘Owo akara owo ọnọ enye unan.’ (Ecclesiastes 8:9, NW) Uyarade ndomokiet idụhe ndibat nte ke kpukpru unana ẹto Abasi m̀mê akan̄a.

Edinịm Akan̄a ke Akpanikọ—Ndiọi Utịp Esie

Edi okopodudu ntak efen oro anamde edinịm akan̄a ke akpanikọ enyene ntuaha edi utịp oro ukpepn̄kpọ edibem iso mbiere n̄kpọ nnịm ekemede ndinyene ke idem mme andinịm ke akpanikọ. Jesus Christ ọkọdọhọ ete: “Kpukpru eti eto ẹn̄wụm eti mfri; edi mbiara eto on̄wụm idiọk mfri.” (Matthew 7:17) Ẹyak nnyịn ikere iban̄a “mfri” kiet emi ukpepn̄kpọ edibem iso mbiere n̄kpọ nnịm on̄wụmde—usụn̄ nte enye enyenede odudu ke ekikere oro mme owo ẹnyenede kaban̄a mbiomo.

Eti ekikere oro owo enyenede aban̄a edibiom mbiomo edi akpan n̄kpọ. Enye edi kiet ke otu mme n̄kpọ oro ẹnụkde mme ete ye eka ndise mban̄a ubon mmọ, mme anamutom ndinam utom mmọ ifịk ifịk, mme osion̄o n̄kpọ ndi ndision̄o n̄kpọ oro ẹfọnde. Edinịm akan̄a ke akpanikọ ekeme ndibiat ekikere oro. Da, ke uwụtn̄kpọ, ke moto eren kiet enyene mfịna. Edieke enye enyenede eti ekikere edibiom mbiomo, enye eyenam ẹdiọn̄ ke ntak edikere oro enye ekerede aban̄a uwem esie ye uwem mme akaisan̄ esie. Andinịm akan̄a ke akpanikọ, ke n̄kan̄ eken, ekeme ndifụmi n̄kpọndịk oro, ekerede ete ke mfịna edidu n̄kukụre edieke edide ‘uduak Abasi’!

Ih, edinịm akan̄a ke akpanikọ ekeme ndisịn udọn̄ mmemmem mmemmem nnọ unana ntịn̄enyịn, ifu, edikpu ndibiom mbiomo kaban̄a mme edinam owo, ye ata ediwak ndiọi edu eken.

N̄kpọ Ubiọn̄ọ ke Itie Ebuana Nnyịn ye Abasi?

Nte ata ndiọkn̄kan n̄kpọ, edinịm akan̄a ke akpanikọ ekeme ndifịk ekikere edibiom mbiomo oro owo enyenede aban̄a Abasi nnịm. (Ecclesiastes 12:13) Andiwet psalm akpak ofụri ubonowo ete “ẹtabi, ẹnyụn̄ ẹse nte Jehovah ọfọnde.” (Psalm 34:8) Abasi onịm ndusụk n̄kpọ oro ẹyomde ẹto mbon oro ẹdinyenede mfọn esie.—Psalm 15:1-5.

Kiet ke otu n̄kpọ oro ẹyomde edi edikabade esịt. (Utom 3:19; 17:30) Oro abuana edinyịme mme ndudue nnyịn ye edinam mme ukpụhọde oro ẹyomde. Nte mme anana mfọnmma owo, kpukpru nnyịn imanam ekese n̄kpọ oro oyomde ikabade esịt. Edi edieke owo ekerede ete ke imọ idi anana-un̄wam owo unọmọ akan̄a, ọsọsọn̄ ndikere ke oyom edikabade esịt m̀mê ndinyịme nduduọhọ ke mme ndudue esie.

Andiwet psalm ama etịn̄ aban̄a Abasi ete: ‘Ima fo ọfọn akan uwem.’ (Psalm 63:3) Edi, edinịm akan̄a ke akpanikọ amanam ediwak miliọn owo ẹnịm ke akpanikọ ẹte ke Abasi edi ntak unana inemesịt mmọ. Nte ido edide, emi amanam ediwak owo ẹyat esịt ye enye, ẹberide usụn̄ ẹbaha edinyene ata n̄kpet n̄kpet itie ebuana ye Andibot. Kamse, didie ke afo ekeme ndima owo oro afo ekerede nte edide ntak kpukpru mfịna ye idomo fo? Ntem ukpepn̄kpọ edibem iso mbiere n̄kpọ nnịm emesịn ubiọn̄ọ ke ufọt Abasi ye owo.

Kịbe Bọhọ Idiọk Odudu Akan̄a

Ekpri Ousmane, emi ẹkesiakde ke ntọn̄ọ, ama odu ke ufụn edinịm akan̄a ke akpanikọ ini kiet ko. Nte ededi, ke ini Mme Ntiense Jehovah ẹken̄wamde enye ndidụn̄ọde ekikere esie ke un̄wana Bible, ama onụk Ousmane ndikpọn̄ se enye okonịmde ke akpanikọ aban̄a akan̄a. Utịp ekedi akwa ubọhọ ye obufa, in̄wan̄în̄wan̄ idaha ke uwem. Ke edide akpan n̄kpọ akan, enye edifiọk Jehovah nte Abasi “mbọm, ye mfọn, ye anyan ime, awak ima ye akpanikọ.”—Exodus 34:6.

Ousmane edifiọk n̄ko ete ke Abasi, okposụkedi mînamke ndutịm inọ kpukpru ikpehe uwem nnyịn, enyene uduak aban̄a ini iso.a Udiana Peter 3:13 ọdọhọ ete: “Nnyịn itie ibet obufa enyọn̄ ye obufa isọn̄, nte un̄wọn̄ọ Esie edide; ndien edi do ke edinen ido edidụn̄.” Mme Ntiense Jehovah ẹmen̄wam ediwak miliọn owo ndikọri idotenyịn edidu uwem nsinsi nte ubak un̄wọn̄ọ “obufa isọn̄” emi. Mmọ ẹyema ndin̄wam fi n̄ko.

Nte afo ọkọride ke nnennen ifiọk Bible, afo eyedifiọk ete ke ini iso ikọn̄ọke ke ndusụk akan̄a oro ẹma ẹkebebiere ẹnịm emi afo mûkemeke ndinyan̄a. Mme ikọ oro Moses eketịn̄de ọnọ nditọ Israel eset ẹtịm ẹdot mi: “Mmada uwem ye n̄kpa, edidiọn̄ ye isụn̄i, nnịm fi ke iso; mek uwem, ndien, man afo ye nditọ fo ẹdu uwem: man afo ama Jehovah Abasi fo onyụn̄ okop uyo esie, onyụn̄ eyịre ye enye.” (Deuteronomy 30:19, 20) Ih, afo emekeme ndinam n̄kpọ mban̄a ini iso fo. Enye isịneke akan̄a ke ubọk.

[Ikọ idakisọn̄]

[Mme ndise ke page 6, 7]

Mme afanikọn̄ ẹmi ikedịghe ‘mme edinam Abasi’

[Mme Ebiet Ẹdade N̄kpọ Ẹto]

U.S. Coast Guard photo

WHO

UN PHOTO 186208 /M. Grafman