Mbụme Oro Mme Andikot Ẹbụpde
Ntak Emi Mme Ntiense Jehovah Mîsin̄wanake Ekọn̄-ọ?
Ebịghi mme owo ẹkediọn̄ọ ke Mme Ntiense Jehovah isin̄wanake ekọn̄. Australian Encyclopædia oro ẹkewetde ke isua 50 oro ẹkebede ọkọdọhọ ke “Mme Ntiense Jehovah isin̄wanake ekọn̄.”
Akpan ntak emi Mme Ntiense Jehovah mîsitieneke in̄wana ekọn̄ edi koro emi ayabiat ubieresịt mmọ nte mme Christian. Ewụhọ ye uwụtn̄kpọ Ọbọn̄ Jesus Christ akara ubieresịt mmọ. Enye eketeme mme anditiene enye ete ẹma mbọhọidụn̄ mmọ. Enye ama owụk mmọ n̄ko ete: “Ẹka iso ẹma mme asua mbufo, ẹnyụn̄ ẹnam ufọn ẹnọ mmọ eke ẹsuade mbufo.” (Luke 6:27; Matthew 22:39) Ke ini kiet ke otu mbet Jesus okosiode akan̄kan̄ oyom ndinyan̄a enye, Jesus ama ọdọhọ enye ete: “Sịn akan̄kan̄ fo ke itie esie, koro kpukpru owo eke ẹmende akan̄kan̄ ẹdikpa ke akan̄kan̄.” (Matthew 26:52) Mmọdo, Jesus ama owụt in̄wan̄-in̄wan̄ ke ikọ ye ke edinam ete ke mme anditiene imọ ikpenyeneke ndin̄wana ekọn̄.
Ntak en̄wen emi Mme Ntiense Jehovah mîsin̄wanake ekọn̄ edi ke kpukpru mmọ ẹdi nditọeka. Ndika ekọn̄ ediwọrọ owo ndikan̄wana ye eyeneka esie, ndien oro ayatuaha ye ewụhọ oro Jesus ọkọnọde ete mmọ ‘ẹnyene ima ke otu idemmọ.’—John 13:35.
Mme Ntiense Jehovah ẹnam ewụhọ Jesus oro ọdọhọde mmọ ẹma kiet eken. Ke uwụtn̄kpọ, kere ban̄a nte mmọ ẹkenamde n̄kpọ ke ini ẹken̄wanade ọyọhọ ekọn̄ ererimbot iba ke 1939-1945. Ke United States, ẹma ẹsịn se iwakde ibe Mme Ntiense Jehovah 4,300 ke ufọk-n̄kpọkọbi sia mmọ mîkenyịmeke ndidụk ekọn̄. Ke Britain, ẹma ẹsịn se iwakde ibe Mme Ntiense 1,500, esịnede iban 300, ke ufọk-n̄kpọkọbi sia mmọ mîkenyịmeke ndidụk ekọn̄. Ukara Germany ama owot se iwakde ibe Mme Ntiense 270 sia mmọ mîkamaha ndidụk ekọn̄. Ukara emi n̄ko ama esịn se iwakde ibe Mme Ntiense 10,000 ke ufọk-n̄kpọkọbi, m̀mê ke mme itienna ekikere. Mme Ntiense Jehovah ke Japan ẹma ẹsobo ọkpọsọn̄ ndutụhọ n̄ko. Owo ekededi oro ẹkewotde owo esie ke ọyọhọ ekọn̄ ererimbot iba—m̀mê ke ekọn̄ en̄wen oro ẹken̄wanade ke oro ebede—ekpenyene ndifiọk ke baba Ntiense Jehovah kiet iketieneke iwot owo esie.
Akpatre ikọ Wolfgang Kusserow, kpa eyen Germany emi ekedide isua 20, enen̄ede owụt nte Mme Ntiense Jehovah ẹsede ekọn̄. Ukara Germany ẹma ẹbịghi enye ibuot ke 1942 sia enye mîkamaha ndidụk ekọn̄. (Isaiah 2:4) Enye ọkọdọhọ esopikpe ekọn̄ ete: “Ẹkeda ikọ Abasi oro ẹwetde ke Edisana N̄wed Abasi ẹbọk mi nte kiet ke otu Mme Ntiense Jehovah. Akakan ye ata edisana ibet oro Abasi ọkọnọde owo edi: ‘Afo enyene ndima Abasi n̄kan kpukpru n̄kpọ nnyụn̄ mma mbọhọidụn̄ fo nte idemfo.’ Ibet en̄wen oro enye ọkọnọde ọdọhọ ete: ‘Kûwot owo.’ Ndi Andibot nnyịn akanam ẹwet kpukpru emi ẹnịm ẹnọ mme eto?”—Mark 12:29-31; Exodus 20:13.
Mme Ntiense Jehovah ẹnịm ke Jehovah kpọt, kpa Ata Ọkpọsọn̄ Abasi, edinam emem odu ke isọn̄ ke nsinsi. Mmọ ke ẹbet ini oro enye edinamde “ekọn̄ etre tutu esịm ke utịt ekondo” kpa nte enye ọn̄wọn̄ọde.—Psalm 46:9.