Jehovah Ọyọdiọn̄ “Owo Eke Atatde Ubọk”

IDỊGHE mfịn ke ikọt Abasi ẹketọn̄ọ ndiwa uwa nnọ enye. Nditọ Israel ẹkesiwa unam ẹnọ Abasi, edi ikọt Abasi mfịn ẹwa “uwa ekọm.” Edi odu mme uwa en̄wen emi enen̄erede enem Abasi esịt. (Heb. 13:15, 16) Mbon oro ẹsiwade mme utọ uwa emi ẹsikop inemesịt ẹnyụn̄ ẹbọ edidiọn̄ Abasi.

Ke uwụtn̄kpọ, Hannah emi ekedide asan̄autom Abasi ke eset ama enen̄ede oyom eyen, edi ikenyeneke sia enye ekedi ada. Enye ama ọbọn̄ akam ọdọhọ Jehovah ke edieke enye ọnọde imọ eyeneren, ke imọ ‘iyayak eyen oro inọ Jehovah ke ofụri usen uwem esie.’ (1 Sam. 1:10, 11) Ekem Hannah ama oyomo onyụn̄ aman Samuel. Ke enye ama okosio Samuel ke eba, enye ama emen enye aka tent utuakibuot nte enye ọkọn̄wọn̄ọde. Jehovah ama ọdiọn̄ Hannah ke se enye akanamde oro, onyụn̄ ọnọ enye nditọ ition en̄wen. Samuel ama edikabade edi prọfet onyụn̄ etiene ewet Bible.—1 Sam. 2:21.

Ikọt Abasi mfịn ẹkeme ndida uwem mmọ nnam n̄kpọ nnọ Abasi kpa nte Hannah ye Samuel ẹkenamde. Jesus ama ọdọhọ ke Jehovah ọyọdiọn̄ nnyịn ke se ededi oro iyakde atak man ika iso inam n̄kpọ Jehovah.—Mark 10:28-30.

Ke eyo mme apostle, ẹma ẹnen̄ede ẹdiọn̄ọ Dorcas ke ntak “nti edinam ye mme enọ mbọm” oro enye ekesinọde nditọete. Edi usen kiet enye ‘ama ọdọn̄ọ onyụn̄ akpa.’ Nditọete ẹma ẹtua etieti. Ke ini mme mbet ẹkekopde ke Peter odu ke mbọhọ oro, mmọ ẹma ẹkpe enye ubọk ẹte ọsọsọp edi. Kere nte esịt ekenemde nditọete oro ini Peter ekedide edinam Dorcas eset! Akpa ini emi apostle Jesus akanamde owo eset ekedi oro. (Utom 9:36-41) Abasi ikefreke nti n̄kpọ oro Dorcas akanamde. (Heb. 6:10) Abasi ama anam ẹwet ẹsịn ke Bible nte Dorcas ekesinọde nditọete n̄kpọ man ikeme ndikpebe enye.

Apostle Paul ama enịm uwụtn̄kpọ n̄ko ọnọ nnyịn. Enye ama esida ini esie an̄wam nditọete. Enye ọkọdọhọ nditọete ke Corinth ete: “Koro ami mmenen̄ede n̄kop idatesịt ndiyak kpukpru se nnyenede nnọ nnyụn̄ nyak idem mi ofụri ofụri nnọ ukpọn̄ mbufo.” (2 Cor. 12:15) Paul ama ọfiọk ke ndinam n̄kpọ nnọ mbon en̄wen esinam owo okop inemesịt, ndien akakan n̄kpọ edi ke Jehovah esidiọn̄ onyụn̄ ama mbon oro ẹsinọde owo n̄kpọ.—Utom 20:24, 35.

Se inemede emi owụt ke esịt esinen̄ede enem Jehovah ke ini idade ini ye odudu nnyịn inam n̄kpọ Obio Ubọn̄ esie inyụn̄ in̄wamde nditọete nnyịn. Ndi odu n̄kpọ en̄wen emi ikpanamde man itiene in̄wam ẹka iso ẹkwọrọ eti mbụk Obio Ubọn̄? Ih odu! Ke adianade ye ndida ini ye odudu nnyịn nnam n̄kpọ Abasi, imekeme ndinọ enọ imaesịt ẹda ẹnam n̄kpọ esie. Enọ imaesịt nnyịn esin̄wam ẹka iso ẹkwọrọ ikọ ke ofụri ererimbot ẹnyụn̄ ẹse ẹban̄a mme isụn̄utom ye mbon oro ẹnamde san̄asan̄a utom uyọhọ ini. Enye ke ẹsinyụn̄ ẹda ẹmịn̄ mme n̄wed ẹnyụn̄ ẹda ẹnam mme vidio ke nsio nsio usem, ẹda ẹn̄wam nditọete ke ini afanikọn̄ etịbede, ẹnyụn̄ ẹda ẹbọp mbufa Ufọkmbono Obio Ubọn̄. Imenen̄ede inịm ke Jehovah ọyọdiọn̄ mbon oro ẹtatde ubọk. Ke ini inọde inyene nnyịn ẹda ẹnam n̄kpọ Jehovah, nnyịn iwụt ke imokpono enye.—N̄ke 3:9; 11:25.

Usụn̄ Emi Ndusụk Owo Ẹmekde Ndinọ N̄kpọ Ẹda Ẹnam Utom Abasi Ke Ofụri Ererimbot

Ukem nte ekedide ke eyo apostle Paul, ediwak nditọete mfịn ‘ẹsisio n̄kpọ ẹnịm,’ mîdịghe ẹbiere ibatokụk oro mmọ ẹdisisịnde ke Ufọkmbono Obio Ubọn̄ ke ekebe oro ẹwetde “Worldwide Work” (Utom Ofụri Ererimbot). (1 Cor. 16:2) Ke ọfiọn̄ kiet kiet, mme esop ẹsinọ okụk emi aka ọfis Mme Ntiense Jehovah emi ẹsede ẹban̄a idụt mmọ. Afo n̄ko emekeme ndinọ enọ imaesịt nnennen nnennen ẹsọk n̄ka emi ibet enyịmede, emi adade ke ibuot Mme Ntiense Jehovah ke idụt mbufo. Edieke oyomde ndifiọk eke idụt mbufo, mbọk wet mîdịghe kot n̄kọk itieutom. Emekeme ndikụt adres n̄kọk itieutom ke www.jw.org. Emekeme ndinọ enọ imaesịt oro ẹtienede mi:

ENỌ

Owo ekeme ndida fon, tablet, kọmputa, m̀mê kad ATM nnọ okụk ẹsọk n̄kọk itieutom. Ke ndusụk idụt, ẹkeme n̄ko ndida jw.org m̀mê ikpehe Intanet en̄wen nnam oro.
Ẹkeme ndinọ okụk, n̄kpọuto, m̀mê ọsọn̄urua n̄kpọ eken. Ẹkpenyene ndiwet leta nnam an̄wan̄a ke edi enọ.

OKỤK EMI ẸKEMEDE NDIKPỌN̄ NNỌ ANDINỌ

Owo ekeme ndinọ okụk ẹda ẹnam utom Abasi, ama oyom ẹkpọn̄ ẹnọ enye.
Wet leta dọhọ ke iyoyom ẹfiak ẹkpọn̄ okụk oro ẹnọ imọ.

ENỌ EMI ẸDIOMIDE-DIOMI

Ke adianade ye edinọ okụk ye mme ọsọn̄urua n̄kpọ eken, mme usụn̄ efen ẹdu oro ẹkemede ndinọ enọ man ẹda ẹnam utom Obio Ubọn̄ ke ofụri ererimbot. Ẹwet mme usụn̄ emi ke idak emi. Mbọk bem iso bụp n̄kọk itieutom emi ẹsede ẹban̄a idụt mbufo man ọfiọk m̀mê ewe ke ẹsinam ke idụt mbufo. Sia ibet obio ye ibet tax mîdịghe ukem ke kpukpru ebiet, enen̄ede ọfọn osobo ye mbon emi ẹfiọkde n̄kpọ ẹban̄a tax ye ibet mbemiso emekde usụn̄ emi oyomde ndida nnọ enọ.

Insurance ye Okụk Ukpọn̄ Utom: Ẹkeme ndiwet enyịn̄ n̄ka emi ibet enyịmede, emi adade ke ibuot Mme Ntiense Jehovah nte andibọ ufọn insurance m̀mê okụk ukpọn̄ utom.

Okụk Oro Ẹsịnde ke Ban̄k: Owo ekeme ndidọhọ ẹkpọn̄ okụk imọ ke ban̄k ẹnọ n̄ka emi ibet enyịmede, emi adade ke ibuot Mme Ntiense Jehovah imọ ima ikpa.

Inyene ye Mbubehe: Ẹkeme ndinọ n̄ka emi ibet enyịmede, emi adade ke ibuot Mme Ntiense Jehovah, inyene ye mbubehe nte enọ, mîdịghe ẹnam n̄wed man ẹkpọn̄ inyene ye mbubehe ẹnọ n̄ka emi ke ini andinyene akpade.

Isọn̄ ye Ufọk: Ẹkeme ndinọ n̄ka emi ibet enyịmede, emi adade ke ibuot Mme Ntiense Jehovah, isọn̄ ye ufọk oro ẹkemede ndinyam. Owo ekeme ndiyak ufọk emi enye odụn̄de nnọ n̄ka emi onyụn̄ ọdọhọ imọ ima ikpa mmọ ẹda ufọk oro.

N̄kpọ-Akpa ye N̄kpọ Emi Ẹnọde Owo Akama: Owo ekeme ndinam n̄wed nyak n̄kpọ-akpa esie, utọ nte inyene m̀mê okụk, nnọ n̄ka emi ibet enyịmede, emi adade ke ibuot Mme Ntiense Jehovah. Owo onyụn̄ ekeme ndinam n̄wed nyak inyene esie nnọ ẹkama ẹnọ n̄ka emi, ẹsinyụn̄ ẹkpọn̄ udori ẹnọ n̄ka emi. Ndutịm emi ekeme ndinam ukara ẹkûbọ andinọ enọ emi tax.

Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm. Ẹwet ediye ekpri n̄wed emi ẹkotde Charitable Planning to Benefit Kingdom Service Worldwide ke Ikọmbakara ye ke usem Spanish man an̄wam mbon oro ẹyomde ndinọ Mme Ntiense Jehovah n̄kpọ ẹda ẹnam utom Abasi ke ofụri ererimbot. Ẹkewet ediye ekpri n̄wed emi man an̄wam mme owo ẹfiọk nsio nsio usụn̄ oro ẹkemede ndinọ enọ m̀mê ndikpọn̄ n̄kpọ-akpa nnọ ke ini owo akpade. Idịghe kpukpru se ẹwetde ke n̄wed emi ke afo edikeme ndinam ke ntak ibet tax idụt mbufo m̀mê ke ntak mme ibet en̄wen ke idụt mbufo. N̄wed emi an̄wam ediwak owo ẹkeme ndinọ nnyịn n̄kpọ ida inam utom Abasi ke ofụri ererimbot inyụn̄ in̄wam mme owo. Ndien emi esinam tax oro mmọ ẹkpede osụhọde. Edieke n̄wed emi odude ke idụt mbufo, emekeme ndibọ ewetn̄wed esop mbufo.

Edieke oyomde ntọt efen efen, ka ebiet oro ẹwetde “Nọ Enọ Fo Mi Ẹda Ẹnam Utom Abasi ke Ofụri Ererimbot,” emi odude ke isọn̄ isọn̄ akpa page jw.org/efi, mîdịghe nyene nneme ye N̄kọk Itieutom Mme Ntiense Jehovah.