Nte Mme Andibuana ke Ubon Ẹdianade Kiet Man Ẹnyene Ọyọhọ Ebuana—Ke Utom Ukwọrọikọ
1 Nso ikeme ndinem n̄kan ndikụt mme ebe ye iban, mme ete ye eka ye nditọ ẹnamde utom ukwọrọikọ Christian ọtọkiet, ẹtorode enyịn̄ Jehovah an̄wan̄wa? (Ps. 148:12, 13) Akpana kpukpru ubon ẹnyene eti ndutịm ndibuana kpukpru ini ke utom an̄wautom. Ndi ubon mbufo enyene usen emi enye osiode enịm ke urua kiet kiet ndibiat ke utom ukwọrọikọ? Ke edide ntre, do kpukpru owo ẹfiọk nnennen se ẹkpediomide ẹban̄a ẹnyụn̄ ẹkeme ndinyene ọyọhọ ebuana.—N̄ke 21:5a.
2 Mbemiso usen utom ukwọrọikọ ubon, ntak mîtịmke mme usụn̄ nneme oro ubon mbufo ẹdidade ọtọkiet? Mme ini ndomonse ẹkeme ndinen̄ede n̄n̄wam, ndien mmọ ẹkeme ndinen̄ede nsịn udọn̄ nnọ ata edu edidianakiet ke ubon. Edi se inọde utịp didie ntem ke ini utom ukwọrọikọ edide mbubehe ubon ndien kpukpru mme andibuana ẹnyụn̄ ẹtịmde idem ọfọn!
3 Esenyịn oro asan̄ade-san̄a ama asan̄a ye ofụri ubon ke utom magazine. Ke adan̄aemi enye akasan̄ade ke ufọk ke ufọk ye kiet ke otu nditọiban oro, eyenan̄wan oro ama obụp ete: “Afo edisan̄a ye ami ebịghi adan̄a didie?” Ekem enye ama anam an̄wan̄a ete ke owo efen emi imọ ididade isan̄a edi ete imọ. Ama ana in̄wan̄în̄wan̄ nte ke enye ye ete esie ẹma ẹsinen̄ede ẹkop inem ndinam utom ọtọkiet. Nso eti edu ubon ke emi edi ntem!
4 Ndusụk ubon ẹkeme ndinam usiakusụn̄ unọ un̄wam ọtọkiet ke ọfiọn̄ kiet ke isua. Mîdịghe ekeme ndidi mmemmem ke nsụhọde n̄kaha owo kiet ke ubon ndika iso nnam utom nte asiakusụn̄ unọ un̄wam m̀mê ndikam nsịn enyịn̄ nte asiakusụn̄ ofụri ini. Ye eti ndutịm ye edidianakiet, iso-ọfọn kpukpru mme andibuana ke ubon ẹkeme ndifori ọkpọkpọ ebuana mmọ ke utom ukwọrọikọ ebe ke ndin̄wam owo emi asiakde usụn̄. Ke akpanikọ ubon ọyọbọ edidiọn̄ oto n̄kọri utom emi ye nti ifiọkutom ẹmi mmọ ẹnyenede ke utom ukwọrọikọ.—Mal. 3:10.
5 Ndinyene ọyọhọ ebuana ke utom ukwọrọikọ ayan̄wam ke ndinam ubon adiana kiet, esịn ifịk, osion̄o mbun̄wụm, onyụn̄ okop inemesịt ke utom Jehovah!—Men Philippi 2:1, 2 domo.