Mụm Eti Edu Oro Ọnọde Abasi Ubọn̄ Kama
1 Ebiet ekededi oro nnyịn idude, edu uwem, edisịnen̄kpọ, ye ukamaidem nnyịn ẹtie ntiense ẹban̄a Abasi oro nnyịn ikponode. Emi esiwọrọ ada akpan akpan ke ikpọ mboho ikọt Abasi, emi ediwak owo ẹkụtde nnyịn. Ke ini nnyịn inịmde nti uwụtn̄kpọ, emi ọnọ enyịn̄ Jehovah ubọn̄. (1 Pet. 2:12) Nte ededi, idiọk edu uwem m̀mê mme edinam unana ekikere oro ibat ibat owo ẹnamde ẹkeme ndida esuene nsọk enyịn̄ Abasi ye ikọt esie. (Eccl. 9:18b) Ndinyene ke ekikere nte ke mbon an̄wa ẹda edu uwem nnyịn ẹbiere se esop nnyịn edide ẹnyụn̄ ẹbiere Abasi oro nnyịn ituakde ibuot inọ ekpenyene ndinam nnyịn ‘inam kpukpru n̄kpọ inọ Abasi ubọn̄’ ke ofụri esịt.—1 Cor. 10:31.
2 Eti Edu Uwem ke Itieidụn̄ Fo: Ke ediwak idaha, eti ndutịm, nti edu uwem, ye usanaidem Mme Ntiense Jehovah ẹsinen̄ede ẹtụk mme ete enyene-ebiet. Ke etịn̄de aban̄a ubon Mme Ntiense oro ẹkedụn̄de ke ufọk esie, ete enyene-ebiet kiet ọkọdọhọ ete: “Nditọ Mme Ntiense Jehovah ẹdi mfọnn̄kan nditọwọn̄ oro akanam n̄kụtde! Mmọ ẹsịne n̄kpọ nte ikpọ owo, mmọ ẹwụt nti edu, ẹfọn ido, ẹnyụn̄ ẹye ido; mmọ inyụn̄ inamke mfịna ndomokiet. Mbufo ẹmenen̄ede ẹdot itoro kaban̄a nditọ mbufo. Nnyịn imadara ndinyene nditọ mbufo mi.” Ẹsiwak ndikop mme utọ ikọ emi koro mbon oro ẹnamde n̄kpọ ye nnyịn ẹkemede ndikụt ima ye ukpono oro ẹdude ke otu ikọt Jehovah.
3 Ke n̄kan̄ eken, se mme enyeneufọk en̄wen ẹtịn̄de ẹwụt ẹte ke mfịna ke osụk ododu ye ndusụk mbon oro mîkereke iban̄a edu uwem mmọ m̀mê oro ẹkamade ebietidụn̄ mmọ ke idiọk usụn̄. Emi ada mme mfịna ye nsụkuyo oro mîkpodụhe edi. Ndusụk mme ete enyene-ebiet ẹseme ẹte ke nditọwọn̄ ye mme uyen ẹtie uyom uyom ẹnyụn̄ ẹsọn̄ ibuot, sia mme ete ye eka mîsehe mmọ enyịn.
4 Ke ndusụk idaha, ẹsinọ mme andidụk mbono itieidụn̄ ke ufọkisen. Ekese ufọkisen emi ẹsinyene mme mbet oro ẹyomde isenowo ẹnịm. Ndusụk nditọete ẹsibiat mbet aban̄ade idaha uyom m̀mê editem udia ke mme ubet mmọ. Mme etubom utom ke ufọkisen ẹdọhọ nnyịn ẹte ke editem udia, ke ebiet oro owo mînyịmeke, ẹdi ọsọ usụn̄ oro ẹdade inyene mmimọ ẹnam n̄kpọ ke idiọk usụn̄. Adianade ye edibiat mme ubet, utebe oro mîsọpke ikụre isiyakke ẹnọ mme ubet oro ke ukpeokụk ke ediwak usen m̀mê urua ke oro ebede. Ibọhọke ẹnen̄ede ẹnyịme ẹtem udia ke ubet, inaha ẹnam oro.
5 Ẹkpenyene ndinen̄ede nsịn ukeme ndibere ọyọhọ ọyọhọ ye mme ete enyene-ebiet ye mme akamautom ke ufọkisen. Ke akpanikọ, nnyịn iyomke ndinam ẹnyene idiọk ekikere ẹban̄a ikọt Jehovah. Nte mme Christian, ana nnyịn inam akpanikọ kpukpru ini. Nnyịn ikpenyeneke ndikokoi nda se inyenede mbon efen ke itieidụn̄ nnyịn ye unana edibọ unyịme, koro oro edide uyịpinọ; m̀mê nnyịn nditre ndinam akpanikọ ke ini itọtde mme inyene ẹbiarade ke itieidụn̄ nnyịn.
6 Eti Edu ke Mbono: Inamke n̄kpọ m̀mê nso utọ itie ke ẹda ẹnịm mbono, ẹkpenyene ndida enye nte akamba Ufọkmbono Obio Ubọn̄. Usịnen̄kpọ ye ukamaidem oro odotde ẹkpenyene nditie kpa nte esitiede ke ini idụkde mme mbono esop ke esop n̄kann̄kụk nnyịn. Ke ini ikpehe edinam mbono akade iso ye ke ini okụrede, nditọete iren ye iban ẹkpenyene ndifep ndisịne ọfọn̄ oro mîwụtke iso o-bụt m̀mê ido usịnen̄kpọ eke idahaemi, oro owụtde spirit ererimbot onyụn̄ anamde edi ọkpọsọn̄ n̄kpọ ndikụt nte nnyịn idide isio ke eti usụn̄. Nditọete iban ẹkpenyene ndikụt nte ke ido ye uniọn̄ isọn̄ọfọn̄ ye ekụra mmọ ẹwụt iso o-bụt nte ẹdotde. (1 Tim. 2:9, 10) Edide idụk mbono, itie ke itieidụn̄ nnyịn, idia udia ke itie unyamudia, m̀mê idep n̄kpọ ke ufọkurua, nnyịn ikpenyene ndiwụt kpukpru ini nte ke nnyịn idi mme asan̄autom Abasi, inịmke n̄kpọ ubiọn̄ọ baba kiet.—2 Cor. 6:3.
7 Edinam baptism oyodu ke mbono oro ke usenubọk Saturday. Enyọn̄-Ukpeme eke April 1, 1995, page 30, etịn̄ edu oro ikpowụtde ke ini edinam oro. Enye ọdọhọ ete ke nnyịn “ikpenyene ndida baptism ke akpan n̄kpọ nte odotde. Enye idịghe ini mfiori, ini usọrọ, m̀mê ini mbre. Edi enye inyụn̄ idịghe ini nditie mfụhọ mfụhọ.” Edinen̄ede edi se mîdotke mbon oro ẹnade baptism, ẹdide iren m̀mê iban ndisịne ọfọn̄ uyeremmọn̄ oro adianade owo ke idem akaha m̀mê oro owụtde ndido idem owo. Ntem, kpukpru owo ẹkpenyene ndiwụt akpan n̄kpọ ye idatesịt baptism Christian.
8 Peter eti nnyịn aban̄a ‘orụk owo oro nnyịn ikpedide ke edisana ido ye ke uten̄e Abasi.’ (2 Pet. 3:11) Mme ikọ ye edinam nnyịn ke Mbono District “Mme Anam Ikọ Abasi” ẹkpekam ẹn̄wam mbon esịt akpanikọ oro ẹdide mme andida nse ndifiọk nnyụn̄ ntuak ibuot nnọ akwa Abasi nnyịn, emi odotde ndibọ kpukpru ukpono ye ubọn̄.—1 Cor. 14:24, 25.