Nte Afo Edi Owo Emi Esikopde Bụt?
1 Idem isikpaha nnyịn ke ini nnyịn ikụtde eyenọwọn̄ edịbede ke edem eka m̀mê ete otop enyịn ese nnyịn. Edi ndammana n̄kpọ ndikop bụt ke ntọn̄ọ ntọn̄ọ ini uyen. Idem ke owo ama okokpon, ediwak owo ẹsitie bụt bụt. Edieke bụt akpande fi ndibuana ke utom ukwọrọikọ, nso ke afo ekeme ndinam?
2 Ndinam N̄kpọ Mban̄a Bụt: Edi akpan n̄kpọ ndinọ ntịn̄enyịn ke “esịt-esịt uwem.” (1 Pet. 3:4) Nam ima emi afo enyenede ọnọ Jehovah ye mbọhọidụn̄ fo ọkọri. Nen̄ede nịm ke akpanikọ nte ke ndinam utom ukwọrọikọ edi kiet ke otu mfọnn̄kan usụn̄ ndiwụt ima n̄waidem. Nyene eti ndutịm ọkpọkpọ ukpepn̄kpọ ye edidụk mme mbono esop. Bọn̄ akam kpukpru ini yom akpan un̄wam Jehovah. Ọkpọsọn̄ mbuọtidem ye ibetedem ke enye ọyọbọp mbuọtidem onyụn̄ anam ‘ọsọn̄ esịt etịn̄ ikọ Abasi ye uko.’—Phil. 1:14.
3 N̄wana ye ekikere unana edidot. Etie nte Timothy ekenyene ndinam emi. Paul ama esịn udọn̄ ọnọ Timothy ete ‘okûyak owo esịn enye kaban̄a uyen esie,’ etide enye ete ke “Abasi ikọnọhọ nnyịn spirit ufep, edi spirit odudu.” (1 Tim. 4:12; 2 Tim. 1:7) Jehovah emi edidade fi anam n̄kpọ n̄ko edieke afo akade iso ye ọyọhọ mbuọtidem ke Enye, ama ada Timothy anam n̄kpọ ọyọhọ ọyọhọ.—Ps. 56:11.
4 Nditie n̄kere utọ itie Bible nte Matthew 10:37 ama an̄wam eyenete an̄wan kiet oro bụt akanamde enye abak ebe esie oro ọkọbiọn̄ọde enye. Nte enye ekesịnde ifịk, utom ukwọrọikọ ama akabade edi mmemmem n̄kpọ akan ọnọ enye, ndien ke akpatre ebe, eka, ye kpukpru nditọeka esie irenowo ẹma ẹbọ akpanikọ!
5 Ntịmidem Edi Akpan N̄kpọ: Uko fo ayaka iso ọkọri ke ini afo etịmde idem mfọn mfọn ọnọ utom ukwọrọikọ. Mek mmemmem ntọn̄ọikọ ke ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible m̀mê n̄kani nsiondi Utom Obio Ubọn̄ Nnyịn, tịm kpep enye, nyụn̄ nam ndomonse. Utu ke nditịmede esịt nte mîdotke, kere n̄kpọ in̄wan̄în̄wan̄. Nyene uko to edinam utom ọtọkiet ye mbon en̄wen. Nyene ke ekikere nte ke ediwak ke otu owo oro afo edisobode ke enyịnusụn̄ ẹsikop bụt, ukem nte afo. Kpukpru owo ẹyom etop Obio Ubọn̄.
6 Edieke afo okopde bụt, kûduọk idotenyịn. Nte afo esịnde idem, Jehovah ayan̄wam fi ndidi ọkwọrọ eti mbụk oro enyenede uforo. Ndien afo oyokop idatesịt ke utom ukwọrọikọ fo.—N̄ke 10:22.