“Nte N̄kpenyene Ndiwọrọ Idụn̄?”
1 Ke ndinam n̄kpọ mban̄a ewụhọ Jesus oro nte “ẹka ẹkenam kpukpru mme idụt ẹdi mbet,” ediwak asan̄autom Jehovah oro ẹyakde idem ẹnọ ẹwọrọ idụn̄ man ẹkenam utom ke ebiet oro udọn̄ okponde akan. (Matt. 28:19) Mmọ ẹkpebe Paul, emi ekeyerede ikot oro: “Be di ke Macedonia, dinyan̄a nnyịn.” (Utom 16:9) Didie ke ẹkeme ndinam emi ke ata ata usụn̄?
2 Nam Usio-Ukot Kiet ke Ini Kiet: Ndi efakutom oro owo mîsisọpke inam utom odu ke esop mbufo? Ke edide ntre, afo emekeme ndisịn ukeme fo ke mme ebiet emi. Mbemiso ebierede ndika ebiet en̄wen, neme ye mbiowo mbufo ndifiọk m̀mê mmọ ẹkere ke afo emetịm idem ndiwọrọ idụn̄. Afo emekeme n̄ko ndibụp esenyịn circuit mbufo m̀mê enye ọfiọk n̄kpet n̄kpet esop emi afo ekemede nditat utom ukwọrọikọ fo. Ke n̄kan̄ eken, ke ama eketịm abat se iditakde, afo emekeme ndikere ndin̄wam ke ebiet en̄wen ke idụt emi m̀mê ke idụt en̄wen. Edieke emi edide udọn̄ fo, afo ọkọrọ ye otu mbiowo fo ẹkpenyene ndiwet ọfis n̄kọk itieutom ebiet emi afo enyenede udọn̄ ndinam utom, ẹtịn̄de idaha fo ke esop. Ekeme ndiwụt eti ibuot afo ndika n̄kese ikpehe oro mbemiso ebierede ndiwọrọ idụn̄ taktak m̀mê nditre ndiwọrọ.
3 Du ke Ukpeme Ban̄a Uwọrọidụn̄: Ibat nditọete nnyịn oro ọdiọn̄de-diọn̄ ọkọri ẹwọrọ idụn̄ ẹka obio en̄wen edide ke ntak ẹyomde eti idaha udu uwem m̀mê man ẹbọhọ mfịghe. Ke ndinam emi, ndusụk ẹmeduọ ẹdụk ubọk mme oburobụt owo oro ẹn̄wọn̄ọde ndin̄wam mmọ ẹnyene itie idụn̄ ke obufa idụt edi n̄kukụre ẹbọde okụk mmọ ẹnyụn̄ ẹfehede ẹkpọn̄ mmọ. Ke ndusụk idaha mme owo emi ẹsikam ẹdomo ndinyịk mme ọwọrọidụn̄ emi nsịn ke ufịn oburobụt edinam. Ke ini mmọ mînyịmeke, ẹsikpọn̄ mmọ do ye unana un̄wam ke obio emi mmọ ẹkekade. Ntem idaha mme ọwọrọidụn̄ emi esikabade ọdiọk akan nte ekedide ke obio emana mmọ. Mmọ ẹkam ẹkeme ndidọhọ nditọete ẹda mmimọ ẹsịn ke ufọk ndien ke ẹsiode oro ẹfep ẹnọ mmimọ un̄wam, ẹdoride mme ubon Christian eken oro ẹn̄wanade ye mme mfịna ye nsọn̄ọn̄kpọ mmọ mbiomo ke idem. Utọ idiọk uwọrọidụn̄ oro anam ndusụk mbonufọk ẹdian̄ade ẹkpọn̄ kiet eken, onyụn̄ anam mme ubon ẹmem ke n̄kan̄ eke spirit.—1 Tim. 6:8-11.
4 Edieke oyomde ndiwọrọ idụn̄ ke ufọn idemfo, ti ete ke ebiet ekededi oro afo odụn̄de, mme mfịna ẹsụk ẹdodu. Enen̄ede emem ndikan mme mfịna ke ebiet oro ama ọkọfọfiọk usem ye ido obio, akan ndikọtọn̄ọ obufa ke n̄kann̄kụk emi mûmeheke.