Ekebe Mbụme

◼ Nso ke ẹkpeneme ke mme mbono an̄wautom?

Uduak mbono an̄wautom edi ndin̄wam nnyịn iwụk ntịn̄enyịn ke edinam oro etienede—utom ukwọrọikọ. Ke ntre, adausụn̄ ekpenyene nditịm idem nte ọfọnde nnyụn̄ ndu ke mben̄eidem ndineme akpan n̄kpọ oro ọnọde nsịnudọn̄ onyụn̄ enyenede ufọn. Edieke itien̄wed eke usen oro enemede nnennen nnennen aban̄a utom ukwọrọikọ, ẹkeme ndikọt nnyụn̄ nneme enye ibio ibio. Nte ededi, mbono emi ekpenyene ndiwụhọ akpan akpan ke utom ukwọrọikọ, an̄wamde kpukpru mbon oro ẹwọrọde ẹka utom edinọ ikọ ntiense ndinen̄ede ntịm idem man ẹnam utom ukwọrọikọ eke usen oro ọyọhọ ọyọhọ.—2 Tim. 4:5.

Ẹkeme ndida mme akpan n̄kpọ oro ẹkpedade ẹsịn ke edinam nto Utom Obio Ubọn̄ Nnyịn man ẹnam kpukpru owo ẹfiọk obufa n̄wed oro ẹnọde ye nte ẹkpenọde enye. Ke Usen Magazine ẹkeme ndinam nneme ẹtode “Se Ẹkpetịn̄de Ẹban̄a Mme Magazine” n̄wụt. Ke mme ubịnikọt eken, ẹkeme ndida ntọn̄ọikọ kiet m̀mê iba emi odotde ye efakutom n̄kann̄kụk nto n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible. Ẹkeme ndineme m̀mê ndinam ikpehe utom ukwọrọikọ kiet n̄wụt, utọ nte nte ẹkpedade Bible ẹnam n̄kpọ ke enyịnusụn̄, nte ẹkpebọrọde ikọ utre nneme, nte ẹkpetọn̄ọde ukpepn̄kpọ Bible, m̀mê nte ẹkpetienede udọn̄.

Mbono an̄wautom ikpenyeneke ndibe minit 10 esịm 15, esịnede edibahade mme owo ndọn̄ ke mme otu, edinọ efakutom, ye edibọn̄ akam. Ke ẹma ẹkekụre, kpukpru mme andibuana ẹkpenyene ndifiọk owo oro mmọ ẹdidade ẹsan̄a, ye ebiet oro ẹdinamde utom, ndien mmọ ẹkpenyene ndika efakutom ye unana ubiatini. Ke ikerede iban̄a nte mbono emi edide ibio ibio, edi akpan n̄kpọ kpukpru owo ndisịm ke ini. Ke ini mbono an̄wautom etienede mbono esop, utọ nte ukpepn̄kpọ Enyọn̄-Ukpeme, ẹkpenyene ndida ini oro ekpride akan nnịm enye. Idiyomke ẹneme itien̄wed eke usen oro, sia ẹma ẹkenyenyene eti nneme N̄wed Abasi.

Ẹkpenyene ndibem iso nnọ nditọete oro ẹdotde emi ẹma ẹkena baptism utom edinịm mbono an̄wautom. Edieke owo ndomokiet mîdụhe ndida usụn̄ ke usen oro, mbiowo ẹkpenyene ndimek nditọete iban oro ẹma ẹkena baptism ndinam emi ke ini ẹyomde. Ke adan̄aemi etiede-tie, eyenete an̄wan emi ekeme nditọn̄ọ nneme ye otu ke ndise mban̄a itien̄wed eke usen oro m̀mê mme akpan n̄kpọ eken oro ẹnyenede ebuana ye utom an̄wautom, anamde mme ikọ esie ẹdi mbio mbio. Enye ọyọbọbọ ọfọn̄ibuot.

Mbono an̄wautom edi ata eti ifet ọnọ nnyịn ndibọ nsịnudọn̄ onyụn̄ etịm nnyịn idem ndibuana ke utom ukwọrọikọ. Edieke adausụn̄ enen̄erede etịm idem, kpukpru owo ẹyebọ ufọn.