Ekebe Mbụme
◼ Ini ewe ke odot ẹtọn̄ọ otu oro ẹsemde usem esenidụt?
Ke ini efakutom esop enyenede ediwak owo oro ẹsemde usem esenidụt, mbiowo ẹkpenyene ndinam se ẹkemede nditịm utom ukwọrọikọ ke usem oro. (km-EF 7/02 p. 1; km-EF 2/98 p. 3-4) Ekeme ndidi mbon oro ẹsemde usem esenidụt emi ẹsasuana ẹdụn̄ọ ke efakutom esop iba m̀mê awakde akan oro. Ke utọ idaha oro, mme esenyịn circuit ẹyenọ ndausụn̄ oro ẹyomde, man ẹn̄wam mme esop oro ẹbuanade ndidiana kiet nnam utom ukwọrọikọ. Ke ini ke ini, ẹkeme ndidiomi utịn̄ikọ an̄wa m̀mê Ukpepn̄kpọ Enyọn̄-Ukpeme man an̄wam ndidiọn̄ọ ibat owo oro ẹsidụkde mme mbono esop oro ẹnịmde ke usem esenidụt.
Ẹkeme nditọn̄ọ otu oro ẹsemde usem esenidụt ke ini ẹsịmde mme n̄kpọ emi ẹyomde mi: (1) Edieke mme asuanetop m̀mê mbon oro ẹnyenede udọn̄ ẹdude oro eti mbụk an̄wan̄ade mmọ akan ke usem esenidụt emi. (2) Edieke ebiowo m̀mê asan̄autom unamutom oro odotde odude man ada usụn̄ onyụn̄ enịm ke nsụhọde n̄kaha mbono esop kiet kpukpru urua. (3) Edieke otu mbiowo ẹnyịmede ndin̄wam otu emi. Ke ini esịmde se ẹyomde emi, mbiowo ẹkpenyene ndinam ọfis n̄kọk itieutom ọfiọk aban̄a man ekeme ndinọ otu oro unyịme ye mme item efen efen.
Ediwak otu ẹsitọn̄ọ ke ndinịm Ukpepn̄kpọ N̄wed Esop kpukpru urua. Nte ini akade, mbiowo ẹkeme ndinyịme ẹnịm mme mbono esop eken utọ nte An̄wan̄wa Mbono Esop ye Ukpepn̄kpọ Enyọn̄-Ukpeme. Edieke ebiowo m̀mê asan̄autom unamutom oro odotde ndinam utom nte ọnọitem odude emi emehede ye usem oro, ẹkeme ndinọ Utịn̄ikọ Nọ. 2, 3, ye 4 ke udiana ubet ukpepn̄kpọ Ufọkn̄wed Utom Ukara Abasi. Edi, otu oro ayabuana ye esop ke ini ẹnemede ido utịn̄ikọ, utịn̄ikọ item, mme akpan n̄kpọ ẹtode edikot Bible, ye Esoputom. Ẹkeme n̄ko ndidiomi mme mbono an̄wautom nnọ otu oro.
Kpukpru owo ke otu emi ẹkpenyene ndinam utom ọtọkiet ke idak ndausụn̄ otu mbiowo. Mbiowo ẹkpenyene ndinọ ndausụn̄ oro adade ukem ukem nnyụn̄ nnyene ọkpọsọn̄ udọn̄ ndise mban̄a se otu emi oyomde. Ke ini esenyịn circuit akade ekese esop emi esede aban̄a otu emi, enye n̄ko ayanam ndutịm ndiwọrọ an̄wautom ye otu oro man ọsọn̄ọ mmọ idem ke n̄kan̄ eke spirit. Ye un̄wam Jehovah, otu oro ẹsemde usem esenidụt mi ekeme ndikabade ndi esop nte ini akade.