Ndisịm Ata Ediwak Owo Nte Ikekeme
1. Nso ke mme akpa Christian ẹkenam man ẹkwọrọ eti mbụk ẹnọ ata ediwak owo nte ẹkekeme?
1 Akpa mme anditiene Jesus ẹma ẹsịn ifịk ẹsuan etop Obio Ubọn̄. Mmọ ẹma ẹda mme usụn̄ oro ẹnyenede uforo ẹnam eti mbụk esịm ata ediwak owo nte ekekeme. Mme andiwet Bible emi ẹkedide mme Christian ẹkewet mme uwetn̄kpọ eke odudu spirit mmọ ke ọsọ usem Greek, emi ekedide usem oro ẹkesisemde ke ofụri Obio Ukara Rome. Ke adianade do, ekeme ndidi ifịk ifịk mme ọkwọrọ ikọ eke ọyọhọ isua ikie iba ye ikie ita E.N. ka iso ẹma ẹkụt ke ndikama n̄wed nyom mme itie N̄wed Abasi ama emem utom akan ndikama ikpan̄wed.
2, 3. (a) Didie ke Isaiah 60:16 osu mfịn? (b) Didie ke ẹda ifiọk ubotn̄kpọ ẹnam edisana utuakibuot aka iso?
2 Edida Ifiọk Ubotn̄kpọ Nnam N̄kpọ: Ebede ke prọfet Isaiah, Jehovah ama ebem iso etịn̄ ete: “Afo ayawap mmọn̄eba mme idụt.” (Isa. 60:16) Ke ndisu ntịn̄nnịm ikọ emi mfịn, mme asan̄autom Jehovah ke ẹda mme ọsọn̄urua inyene mme idụt ẹnam n̄kpọ man utom ukwọrọikọ aka iso. Ke uwụtn̄kpọ, ke 1914, ediwak isua mbemiso ẹkedade mme ndise senima ẹnam mbubehe uforo uforo, Nditọ Ukpepn̄kpọ Bible ẹma ẹtọn̄ọ ndiwụt “Photo-Drama of Creation.” Ndise senima ye ndise slide emi, oro ebighịde ke hour itiaita, esịnede uduot onyụn̄ enyenede uyo, ama anam ediwak miliọn owo ẹkop ikọ ntiense.
3 Mfịn, ikọt Abasi ẹsida mme ukwak umịn̄n̄wed oro ẹnen̄erede ẹsọp ye mme n̄kpọutom oro ẹdade kọmputa ẹse ẹban̄a ẹmịn̄ mme Bible ye mme n̄wed Bible ke ediwak usem. Ẹsitan̄ mme n̄wed Bible ẹka nsannsan ikpehe isọn̄, ẹsịmde mme owo ke mme idụt 235 ke ata mmemmem usụn̄. Jehovah amada spirit esie onụk ikọt esie ndida utọ ifiọk ubotn̄kpọ oro nnam n̄kpọ uforo uforo, anamde akpanikọ Bible odu ọnọ ediwak owo akan nte akanam edide ke mbụk.
4. Mme ukpụhọde ewe ke ndusụk owo ẹnam ke uwem mmọ man ẹnam ediwak owo ẹkop eti mbụk?
4 Mme Ọkpọkpọ Ukpụhọde: Omonụk ata mme andituak ibuot n̄ko ndinam mme ọkpọkpọ ukpụhọde man ẹnam ediwak owo ẹkop eti mbụk. Ediwak mmọ ẹmenam uwem mmọ ẹmem man ẹnyene ọyọhọ ebuana ke utom ukwọrọikọ. Ndusụk ẹmeka ẹkenam utom ke ebiet oro ẹnen̄erede ẹyom mme anditan̄a Obio Ubọn̄. Mbon en̄wen ẹkpep esen usem man ẹtat utom ukwọrọikọ mmọ.
5, 6. Nso ke ẹkeme ndinam man ẹsịm adan̄a ediwak owo nte ẹkekeme ke efakutom n̄kann̄kụk?
5 Ke adianade do, nnyịn imekeme n̄ko ndinam ediwak owo ẹkop eti mbụk ebe ke ndikwọrọ ikọ ke ini mme owo ẹdude ke ufọk ye ke ebiet ẹkemede ndikụt mme owo. Edieke mme owo mîsiwakke ndidu ke ufọk ke uwemeyo ke efakutom mbufo, nte afo emekeme ndinam ukpụhọde ke ndutịm fo man ọnọ ikọ ntiense ke mbubịteyo? Nte mme itie oro ẹkemede ndikụt ediwak owo nnọ ikọ ntiense ẹdu? Nte afo omodomo unọ ikọ ntiense urụk ukopikọ ese onyụn̄ anam utom ke efakutom mbubehe? Nte afo emesiyom mme ifet ndinọ ikọ ntiense ido nneme?
6 Nso ifet ke nnyịn inyene ntem ndibuana ke akwa ikọ ntiense oro ẹnọde ẹban̄a enyịn̄ ye Obio Ubọn̄ Jehovah! Nnyịn ikpakam ika iso ndibuana ọnọ-uwem akpanikọ otode Ikọ Abasi ye adan̄a ediwak owo nte ikekeme.—Matt. 28:19, 20.