Un̄wam Emi Enen̄erede Ekpere
1. Didie ke itie ebuana owo ye Abasi ekeme ndibiara?
1 Ekedi ọkpọsọn̄ n̄kpọ ọnọ Anna, eyenete an̄wan emi akanamde utom oro esidiade ini, okonyụn̄ ọdọde ebe oro mînịmke ke akpanikọ, ndidụk mme mbono esop Christian kpukpru ini, ndibuana ke utom ukwọrọikọ, ndinyụn̄ n̄kpep Ikọ Abasi. Okposụkedi enye okosụk amade Jehovah, enye ikọwọrọke an̄wautom aba. Edi n̄kpọ inemesịt ndifiọk nte ke mbiowo oro ẹkewụtde edikere mban̄a ẹma ẹnọ enye un̄wam eke spirit.
2. Ke nso usụn̄ ke kpukpru mme Christian ẹkeme ndidi un̄wam emi ẹnen̄erede ẹkpere?
2 Ndinyịme un̄wam eke spirit oro ẹnọde ke esop Christian owụt ke nnyịn imọbuọt idem ye Jehovah. Mbiowo esop ẹkpebe ima ima usụn̄ oro Jesus Christ owụtde edikere mban̄a ke ndiyom mme ifet oro ẹkemede ndinọ mbon oro mîsọn̄ke idem ke n̄kan̄ eke spirit nsịnudọn̄ ye un̄wam. (1 Thess. 5:14) Ke ediwak ini, ekeme ndidi n̄kukụre se ẹyomde edi nditịn̄ nti ikọ ndọn̄esịt emi ẹkọn̄ọde ke N̄wed Abasi. Idịghe mbiowo kpọt ẹnyene ndin̄wam mbon oro ẹkopde mmemidem ke esisịt ini, edi kpukpru Christian ẹkeme ndin̄wam. Eyịghe idụhe nte ke kpukpru nnyịn imọfiọk odudu oro nti “ikọ eke ẹtịn̄de ke ekem ini” ẹnyenede.—N̄ke 25:11; Isa. 35:3, 4.
3, 4. Nso ke ndin̄wam mbon en̄wen abuana, ndien didie ke nnyịn ikeme ndinam ntre?
3 Daha ke Idemfo Kan̄wam: Man owụt ke imenen̄ede inyene udọn̄ ke idem mbon oro ẹyomde un̄wam, oyom idaha ke idem nnyịn ikan̄wam mmọ, iwụt edikere mban̄a, inyụn̄ isịn ifịk inam emi. Ke ini Jonathan ọkọfiọkde ke David odu ke nnanenyịn, enye ama “adaha ke enyọn̄, aka ekesịm David ke akai, onyụn̄ ọsọn̄ọ enye ubọk.” (1 Sam. 23:15, 16) Da sụn̄sụn̄ ido n̄wam mbon efen. Ikọ oro itịn̄de ke ntak udọn̄ oro inyenede iban̄a mbon en̄wen esinen̄ede enyene ufọn. N̄ko-n̄ko, Jesus ama owụt in̄wan̄-in̄wan̄ nte ke oyom ifịk ifịk ukeme oro enyenede uduak man ẹkpefiak ẹda eyenete ẹnyene. (Luke 15:4) Ndinyene ọkpọsọn̄ udọn̄ ndin̄wam owo en̄wen oyonụk nnyịn ndisịn ifịk nnọ un̄wam idem edieke owo oro mîsọpke inam n̄kọri.
4 Nso n̄kpọ nsịnudọn̄ ke esidi ntem ke ini ikotde mbon efen, utọ nte mbon emi ẹdude ke itie ukpepn̄kpọ n̄wed esop nnyịn, ẹdisan̄a ye nnyịn ke an̄wautom! Nte nnyịn in̄wamde ekemmọ asan̄autom Jehovah ndibuana ke an̄wautom, nnyịn imekeme ndida ifet oro nsịn udọn̄ nnọ enye ndinam ekese ke utom Abasi. Utọ idara idara ini emi ẹbuanade ọtọkiet ẹnam utom Jehovah mi esinen̄ede edi n̄kpọ nsịnudọn̄ ọnọ mbon oro ẹyomde ndifiak nnyene eti itie ebuana ye Abasi.
5. Nso un̄wam ke mbiowo ẹkeme ndinọ ke ndusụk idaha?
5 Ima Ima Ndutịm: Mbon oro mîbuanake ke utom ukwọrọikọ, mînyụn̄ ibuanake ye esop ke ndusụk ini ẹkeme ndiyom un̄wam efen efen man ẹkpekeme ndisọn̄ọ mbuọtidem mmọ. Ọkpọkpọ ukpepn̄kpọ Bible ke utọ n̄wed nte Tuak Ibuot nọ Ata Abasi Kierakiet, San̄a Kpere Jehovah, m̀mê Nso ke Bible Enen̄ede Ekpep? ekeme ndidi n̄kukụre se ẹyomde. Nte ido edide, sia owo emi ama akanana baptism, ukpepn̄kpọ oro ikpenyeneke ndida anyan ini. Kọmiti Utom Esop ekpenyene nditịn̄ enyịn nse m̀mê odu owo emi edibọde ufọn oto ndutịm emi.—Se mme Ekebe Mbụme ke Utom Obio Ubọn̄ Nnyịn eke November 1998 ye November 2000.
6. Didie ke eyenete an̄wan kiet akafiak edinyene eti itie ebuana ye Jehovah?
6 Anna emi ikebemde iso itịn̄ iban̄a ama okop inemesịt aban̄a un̄wam oro mbiowo ẹkenọde, onyụn̄ enyịme eyenete an̄wan emi ama ọkọkọri esịm ọyọhọ idaha enịm ukpepn̄kpọ Bible ye imọ. Ekenịm ukpepn̄kpọ oro ikanan̄ kpọt, ndien ẹma ẹn̄wam enye ọtọn̄ọ ntak asan̄a ekpere Jehovah. Enye ama ọtọn̄ọ ntak odụk mme mbono esop, onyụn̄ otoro Jehovah Abasi an̄wan̄wa. Eyenete an̄wan emi ama ọkọkọri esịm ọyọhọ idaha do ama an̄wam enye ke an̄wautom ebe ke ndida enye n̄ka mme ukpepn̄kpọ Bible efen tutu ẹnam enye ọsọn̄ọ idem ekem ndikwọrọ ikọ ke ufọk ke ufọk. Un̄wam ekedi n̄kukụre se enye okoyomde man afiak enyene eti itie ebuana ye Jehovah.
7. Mme ufọn ewe ẹsidu ke ini isọn̄ọde mbon en̄wen idem ke n̄kan̄ eke spirit?
7 Ndisọn̄ọ mbon oro ẹyomde un̄wam idem esida edidiọn̄ ọsọk kpukpru owo. Owo oro ẹn̄wamde esikop inemesịt ndisan̄a n̄kpere Jehovah nnyụn̄ mbuana ke mme utom oro ẹnamde ke esop Esie. Mbiowo ẹsidat esịt ndikụt utọ n̄kọri eke spirit oro. (Luke 15:5, 6) Ke ini kpukpru owo ẹnen̄erede ẹkere ẹban̄a kiet eken, edidianakiet oyodu ke esop. (Col. 3:12-14) Nso nti ntak ke nnyịn inyene ntem ndikpebe Jehovah, kpa un̄wam emi enen̄erede ekpere nnyịn!—Eph. 5:1.