Edu N̄waidem Ada Mme Edidiọn̄ Edi
1. Didie ke David ye Nehemiah ẹkewụt edu n̄waidem?
1 Ke ini Goliath okosụn̄ide mbonekọn̄ Israel, owo ekọn̄ ekededi akpakan̄wana ye enye. Edi ekedi ekpri ekpemerọn̄ oro mîkọbọhọ ukpep un̄wana ekọn̄ ekenyịme ndika. (1 Sam. 17:32) Ke ini mme Jew oro ẹketan̄de ẹfep ẹkefiakde ẹnyọn̄ Jerusalem edi ẹtrede ndibọp mme ibibene, ekedi akama-wine edidem Persia ekenyịme ndikpọn̄ eti idaha oro enye ekenyenede ke ufọk ubọn̄ nnyụn̄ nnam isan̄ n̄ka Jerusalem man eketịm utom oro. (Neh. 2:5) Jehovah ama ọdiọn̄ iren iba emi, David ye Nehemiah, ke edu n̄waidem mmọ.—1 Sam. 17:45, 50; Neh. 6:15, 16.
2. Ntak emi mme Christian ẹkpewụtde edu n̄waidem-e?
2 Mfịn, mme owo inyeneke aba edu n̄waidem ke ererimbot nte ẹkesinyenede. Ke “mme akpatre usen” emi, uwem mme owo ọyọhọ ye utom, ediwak owo ẹnyụn̄ ‘ẹma idem’ mmọ. (2 Tim. 3:1, 2) Edi mmemmem n̄kpọ owo ndinen̄ede nyak idemesie nsịn ke mbubehe esie tutu enye ikemeke ndinọ un̄wam ke ini mme owo ẹyomde un̄wam esie. Nte ededi, nte mme Christian, nnyịn iyom ndikpebe Jesus oro ekesinyịmede ndin̄wam mbon efen. (John 5:5-9; 13:12-15; 1 Pet. 2:21) Didie ke nnyịn ikeme ndiwụt ẹdu n̄waidem emi, ndien mme edidiọn̄ ewe ke nnyịn idibọ?
3. Didie ke edu n̄waidem etịp esịn ke mbono esop?
3 Ke Ufọn Nditọete Nnyịn: Nnyịn imekeme ndinọ mbon efen “enọ eke spirit” ebe ke ndinyịme ndinọ ibọrọ ke ini ẹyomde ẹnam ntre ke mme mbono esop. (Rome 1:11) Ndinọ ibọrọ ọnọ Jehovah ubọn̄, anam akpanikọ ẹnen̄ede odụk nnyịn esịt ye ekikere, onyụn̄ anam nnyịn ikop inem mbono esop. (Ps. 26:12) Nnyịn n̄ko imekeme ndinọ utịn̄ikọ ke Ufọkn̄wed Utom Ukara Abasi ke ini owo oro akpanade ọnọ mîdụhe. Emi ayan̄wam nnyịn ifori ukeme unọ ukpep nnyịn.
4. Ke mme usụn̄ efen ewe ke nnyịn ikeme ndiwụt edu n̄waidem?
4 Nditọete iren ẹkeme ndiwụt edu n̄waidem ke ndinyanade mbịne mme ifetutom ke esop. (Isa. 32:2; 1 Tim. 3:1) Kpukpru owo ẹkeme ndinam n̄kpri ye ikpọ mbono ẹsan̄a nte ọfọnde ebe ke ndinọ idemmọ unyịme unyịme ndinam utom ke nsio nsio itieutom. Ke ini inyịmede ndisan̄a ye esenyịn oro asan̄ade-san̄a ke an̄wautom m̀mê ndinam udia nnọ enye, emi ekeme ndinam inyene “nsịnudọn̄ eke otode edem mbiba.” (Rome 1:12) Ke ini inyịmede ndisịn un̄wam nnọ nditọakpa, mme ebeakpa, mbon udọn̄ọ, ye mbon n̄kpọnnam, mme eka oro ẹnyenede n̄kpri nditọ, ye mbon eken ke esop, nnyịn imesikop inemesịt inyụn̄ inyene unyịme Jehovah.—N̄ke 19:17; Utom 20:35.
5. Mme n̄kpọ ewe oro ẹbuanade Ufọkmbono Obio Ubọn̄ ke ẹyom ẹnọ idem unyịme unyịme?
5 Usụn̄ efen oro ikemede ndida ini ye ukeme nnyịn nnam utom n̄waidem edi ndise mban̄a nnyụn̄ n̄n̄wam ke ndinam Ufọkmbono Obio Ubọn̄ asana. Ke adianade do, sia edide ediwak owo ke ẹdụk akpanikọ mfịn, ẹnen̄ede ẹyom mbufa Ufọkmbono Obio Ubọn̄, ẹnyụn̄ ẹyom mme owo ẹnọ idem unyịme unyịme ndibọp mme itie emi. Okposụkedi ebe ye n̄wan kiet mîkenyeneke ifiọk ubọp n̄kpọ, mmọ ẹma ẹnọ idemmọ unyịme unyịme ndin̄wam Kọmiti Ubọpufọk eke Ikpehe ke Ikpehe ke n̄kann̄kụk mmọ. Nte ini akakade, ẹma ẹnọ ebe ye n̄wan emi ukpep, ndien idahaemi, mmọ ẹkeme ndikọk kọrikọri. N̄wan esie ọkọdọhọ ete: “Ndinam utom ọtọkiet ye mbon efen anam mi nnyene n̄kpet n̄kpet ufan. Kpa ye oro isikpade mba ke utom okụrede, nnyịn imesikop odudu ke n̄kan̄ eke spirit.”
6. Ntak emi utom ukwọrọikọ edide akakan utom unyịmesịt oro nnyịn ikemede ndinam?
6 Ebe ke Ndikwọrọ Ikọ: Utom edikwọrọ Obio Ubọn̄ edi akakan utom unyịmesịt oro nnyịn ikemede ndinam mfịn. Ke ini ẹn̄wamde mme owo ẹfiọk ẹnyụn̄ ẹnam item Bible, uwem mmọ esinyene uduak, mmọ ẹnyụn̄ ẹfiọk nte ẹkemede ndikan mme edu oro ẹnọde unan. Mmọ ẹkpep ẹban̄a edemede-owo-udọn̄ idotenyịn ini iso oro odude ke Bible. Nnyịn imanam inem inem utom unyịmesịt oro akamade nsinsi ufọn ke ntak utom unọ ukpep Bible oro nnyịn inamde. (John 17:3; 1 Tim. 4:16) Eyedi idaha nnyịn ekeme ndinọ nnyịn ufan̄ ndinen̄ede mbuana ke utom emi ebe ke ndinam utom usiakusụn̄ unọ un̄wam m̀mê usiakusụn̄ ofụri ini, ndika ebiet oro udọn̄ okponde akan, m̀mê ndikpep usem efen.
7. Ntak emi n̄waidem enen̄erede edi akpan n̄kpọ mfịn-e?
7 Edidem David ama ebem iso ọdọhọ ke ini oro Messiah editọn̄ọde ukara esie, ikọt Abasi ‘ẹyenọ idemmọ unyịme unyịme.’ (Ps. 110:3, NW) Sia Jehovah anamde akpatre idọk eke spirit awara, nnyịn imenyene ediwak utom unyịmesịt ndinam. (Isa. 60:22) Ndi afo ọmọdọhọ: “Se mi, dọn̄ mi utom”? (Isa. 6:8) Ke akpanikọ, edieke nnyịn iwụtde ẹdu n̄waidem, nnyịn iyenem Jehovah esịt inyụn̄ ibọ uwak edidiọn̄.