Ọkpọsọn̄ Ukeme Oro Ẹsịnde ke Ofụri Ererimbot Nditọt Mbono District “Ẹtiene Christ!”
Mme Asuanetop Ẹyefiak Ẹsuan Akpan N̄wedikot
1 Ubịnikọt oro ẹkenamde isua oko ke ofụri ererimbot ndisuan etop Mbono District “Edinyan̄a Emekpere!” ama enen̄ede otụk mbon oro ẹnyenede udọn̄. Mbon oro ẹkeyerede akpan ikot emi ẹma ẹkụt ke akpa ini nte inem inem udia eke spirit ke otu Mme Ntiense Jehovah esitiede. (Isa. 65:13) Mmọ ẹma ẹtiene ẹkop inem ufiop ufiop itie ebuana nditọete nnyịn. (Ps. 133:1) Man in̄wam ata ediwak owo nte ikekeme ẹdụk Mbono District “Ẹtiene Christ!,” iyafiak isuan akpan n̄wedikot ke ofụri ererimbot.
2 Mme Utịp Oro Ẹkenyenede Isua Oko: Mbụk utom oro ikọbọde ke ofụri ikpehe ererimbot ama owụt ke nnyịn ndikasuan etop Mbono District “Edinyan̄a Emekpere!” ama ada ediwak nti utịp edi. Mme owo ẹma ẹtịn̄ nti ikọ ẹban̄a mbono emi ke ediwak itie. Ke uwụtn̄kpọ, ke akwa obio kiet, ẹma ẹwet n̄kpọ ke n̄wedmbụk n̄kpọntịbe kiet ẹban̄a ubịnikọt emi, ẹte: “Man ẹsịm kpukpru owo mbemiso ini mbono, Mme Ntiense ẹmesịn ekese ukeme ke mbọhọ—ẹnam utom ke ediwak hour, ẹsan̄a nnyan isan̄, ẹnyụn̄ ẹtịn̄ ikọ ẹsọp inua.” Ukeme oro ẹkesịnde ndisuan n̄wedikot emi ama edemede udọn̄ mme asuan mbụk n̄kpọntịbe ke obio efen, ndien emi ama anam mmọ ẹsuan ekese mbụk ẹban̄a mbono oro. N̄wedmbụk n̄kpọntịbe ita ke nsụhọde n̄kaha ẹma ẹwet nti n̄kpọ ẹban̄a se ẹkenamde mbemiso mbono oro. Ọkọmbụk n̄kpọntịbe kiet ama ewet ediwak nnyan mbụk emi ẹkebede page iba ke n̄wedmbụk n̄kpọntịbe kiet oro ẹkesiode ke Sunday. Enye ama etịn̄ ediwak n̄kpọ aban̄a se nnyịn inịmde ke akpanikọ, otu nditọete nnyịn, nte ẹkesuande n̄wedikot oro, ye mbono oro ke idemesie. Ke ini asuanetop kiet ọkọnọde owo n̄wedikot, enyeneufọk ama esịbe odụk onyụn̄ ọdọhọ ete, “Oh! Se n̄kosụk n̄kotde mban̄a edi oro ke n̄wedmbụk n̄kpọntịbe!” Enyeneufọk efen ọkọdọhọ ete: “Ami ndisụk n̄kot n̄kpọ mban̄a mbufo edi emi, ndien mbufo ẹbiọn̄ọde! Ndi n̄wedikot mi edi oro?” Ekem mma oro ama adian do ete: “Ata eti n̄kpọ ke Mme Ntiense Jehovah ẹnam emi.”
3 Ediwak mbon oro ẹnyenede udọn̄ ẹma ẹkama n̄wedikot mmọ ẹdi itie mbono. Ndusụk mbon oro ẹnyenede udọn̄ ẹma ẹwat ẹto anyan usụn̄ ẹdi mbono oro. Ọkpọsọn̄ ukeme oro nnyịn ikesịnde ama anam ibat mme andidụk mbono ọdọk, tutu ke idụt kiet, ibat mme andikodụk ama ada mbahade 27 eke ikie awak akan eke isua oko.
4 Ndikụre Efakutom: Mbufo ẹmekeme nditọn̄ọ ndisuan n̄wedikot urua ita mbemiso mbono mbufo ọtọn̄ọ. Ẹkpenyene ndisịn ofụri ukeme nsuan enye ke kpukpru efakutom mbufo. Ke mme esop oro ẹnyenede akamba efakutom, mme asuanetop ẹkeme ndinịm n̄wedikot ke ebiet oro ọfọnde ke mme ufọk oro owo mîdụhe ke akpatre urua mbemiso mbono oro. Mme esop ẹkpenyene ndisuan n̄wedikot mmọ mma nnyụn̄ nsịn ofụri ukeme ndikụre efakutom mmọ. Ẹkeme ndidian idem ekededi oro osụhọde nnọ mme asiakusụn̄ ke esop.
5 Se Ẹkpetịn̄de: Afo emekeme nditịn̄ n̄kpọ ntem: “Nnyịn ideme n̄wedikot emi inọ mme owo ke ofụri ererimbot man mmọ ẹdibuana ke akpan edinam oro edide ke iso. Okwo edi emi. Ẹtịn̄ mme n̄kpọ efen ẹban̄a mbono emi ke n̄wedikot emi.” Ndinam nneme edi ibio ibio ayanam ẹdeme mmọ ẹnọ ediwak owo. Nte ededi, edieke enyeneufọk enyenede mbụme, ẹda ini ẹbọrọ mmọ. Ke ebiet oro ẹkụtde udọn̄, ẹwet n̄kpọ ẹnịm ẹnyụn̄ ẹfiak ẹka ẹbịne owo oro usọp usọp nte ekekeme.
6 Edi akpan n̄kpọ didie ntem nte nnyịn idomo nditiene Christ! (John 3:36) Mbono District nnyịn oro edide ayan̄wam kpukpru owo oro ẹdụkde ndinam oro. Ke akpanikọ nnyịn imekeme ndidori enyịn nte ke ẹyefiak ẹnọ akwa ikọ ntiense ke ntak ọkpọsọn̄ ukeme oro ẹsịnde nditọt Mbono District “Ẹtiene Christ!” Ke ntre ẹsịn ifịk ẹkot adan̄a ediwak owo nte ẹkekeme ẹdidụk. Jehovah akpakam enen̄ede ọdiọn̄ mbufo nte ẹsịnde ukeme nditiene mbuana ke ubịnikọt ofụri ererimbot emi.