Ndi Afo ke Ada N̄wedikot Anam N̄kpọ?

Usen kiet, eyeneren emi ekedide isua 11 ama ọfiọhọ n̄wedikot emi ọkọtọtde utịn̄ikọ an̄wa aban̄ade hell. Nte ini akakade, enye ọkọdọhọ ete: “Emi ama edemede mi udọn̄ ọkpọsọn̄ sia eketiede nte ke ami kpukpru ini nsinam se idiọkde, ndien ke ntre mma nsitịmede esịt ekese mban̄a edika hell oro asakde ikan̄ ke n̄kpade.” Enye ama odụk utịn̄ikọ oro, ndien ke n̄kpọ nte isua kiet ke ukperedem, ke ama ekekpep Bible ediwak ini, enye ama ana baptism. Ntre ke Karl Klein, emi akanamde utom ke ukperedem ke ediwak isua nte owo Otu Ukara eke Mme Ntiense Jehovah, ọkọtọn̄ọ utom Christian esie. Kpukpru emi ọkọtọn̄ọ ye n̄wedikot.

N̄wedikot ke aka iso ndidi n̄kpọutom oro ẹdade ẹnọ ikọ ntiense uforo uforo mfịn. Ediwak mme asuanetop ẹkụt nte ke ndiyak n̄wedikot kiet nnọ owo edi eti usụn̄ ndinam mme owo ẹfiọk mmimọ onyụn̄ edi eti usụn̄ ndida ntọn̄ọ nneme. Mme ete ye eka ẹkeme ndinam n̄kpri nditọ mmọ ẹtiene ẹbuana ke utom an̄wautom ke ndinọ mmọ n̄wedikot man ẹyak ẹnọ mme owo ke enyịnusụn̄. Mme asuanetop oro ẹdade leta ẹnọ ikọ ntiense ẹkeme ndinam mme owo ẹfiọk ẹban̄a mme mbono esop ke ndisịn n̄wedikot ke efọk leta oro nnọ mmọ. N̄wedikot akam edi eti usụn̄ ndida n̄kot nditọ ukpepn̄kpọ Bible ye mbon efen oro ẹnyenede udọn̄ ẹdidụk mme mbono esop nnyịn.

Ẹtịn̄ ibio ibio ẹban̄a mbono esop kiet kiet ke akpa page n̄wedikot oro. Sia owo mîwetke adres Ufọkmbono Obio Ubọn̄ ye mme ini mbono esop, oyoyom afo anam owo oro afo ọnọde n̄wedikot emi ọfiọk adres ye ini mbono esop oro. Ufan̄ odu ndiwet m̀mê ndifịk ufịkn̄kpọ ke n̄wedikot oro edieke oyomde. Ndi afo ke ada n̄wedikot anam n̄kpọ ke eti usụn̄ ke utom an̄wautom?