Ubịnikọt Ofụri Ererimbot Oro Ẹdade Ẹtọt Mbono District “Edinyan̄a Emekpere!”
Mme Asuanetop ke Kpukpru Esop Ẹnyene Ndisuan Akpan N̄wedikot
1 Toto ke ntọn̄ọ ntọn̄ọ May 2006 tutu esịm ini oro mme mbono district ke ofụri ererimbot ẹdikụrede, ẹma ẹtọtọn̄ọ ẹyenyụn̄ ẹka iso ke ubịnikọt ofụri ererimbot emi ẹdade akpan n̄wedikot ẹtọt mme mbono district oro ẹdinịmde ke n̄kpọ nte idụt 155. Ubịnikọt emi esịne akpan mbono district oro ẹdiomide ke Germany, Czech Republic, ye Poland ke July ye ke akpa urua August 2006.
2 Ke ikerede iban̄a mme akpatre ini oro idude mi, mme mbono emi ẹtịn̄de un̄wọn̄ọ Abasi ndinyan̄a mme owo nsio ke idiọk editịm n̄kpọ emi ẹkpenyene ndinen̄ede ndemede udọn̄ mbon esịt akpanikọ. Etop emi ekpenyene ndinụk mmọ ndikere mban̄a se iditịbede ke ini iso. Man ẹnọ ediwak miliọn owo ifet ndikop etop ndọn̄esịt ye idotenyịn emi, ẹsịn udọn̄ ẹnọ se ikande esop Mme Ntiense Jehovah 98,000 ke ofụri ererimbot nditiene mbuana ifịk ifịk ke nditọt mbono oro ẹnọde mmọ ikot ndidụk.
3 Ẹyenọ mme esop n̄wedikot oro ekemde man asuanetop kiet kiet enyene n̄kpọ nte n̄wedikot 50. Ẹkeme ndidian idem ekededi oro osụhọde nnọ mme asiakusụn̄ ke esop. Ke esop kiet kiet, ẹditọn̄ọ ubịnikọt emi urua ita mbemiso akpa usen mbono oro ẹdemede esop oro ẹsịn. Emi ọyọnọ ini oro ekemde ndisịm ekese ikpehe m̀mê kpukpru ikpehe ke efakutom esop.
4 Ke ebiet ekededi oro ẹkemede, ẹsịn udọn̄ ẹnọ kpukpru owo ndinọ enyeneufọk n̄wedikot kiet. Nte ededi, edieke ndusụk owo mîdụhe ke ufọk, ẹkeme ndifak n̄wedikot ke ebiet oro ọfọnde ke enyịnusụn̄. Ẹkpenyene ndinen̄ede nsịn ifịk nsuan kpukpru n̄wedikot ke urua ita emi.
5 Nnyịn imenịm nte ke ẹyenọ akwa ikọ ntiense ke ntak ọkpọsọn̄ ukeme oro ẹsịnde ke ofụri ererimbot nditọt Mbono District “Edinyan̄a Emekpere!” nte ẹwụtde ke ibuotikọ emi. Nnyịn imeben̄e Jehovah ite enen̄ede ọdiọn̄ ukeme oro mbufo ẹsịnde ke nditiene mbuana ke ubịnikọt ofụri ererimbot emi.