Da Mme N̄wedikot Nam N̄kpọ nte Ọfọnde
1 Mme n̄wedikot esop ẹfọn ke ndida ntọt mme owo ke n̄kann̄kụk mban̄a adres Ufọkmbono Obio Ubọn̄ ye nnennen ini mbono esop. Ọkpọfọn ndikpọn̄ kiet nnọ owo kiet kiet emi afo osobode. Ke ntak oro, esop kiet kiet ekpenyene ndinyene n̄wedikot oro awakde ekem. Kaban̄a mme esop oro ẹsikpụhọde mme ini mbono esop ke isua ke isua, ke January, ẹkpenyene nditobo mbufa n̄wedikot isua kiet kiet ke October isua oro ebede man ẹnyene mme n̄wedikot oro ẹnyenede mme ini mbono esop eke idahaemi kpukpru ini. Ẹnyene ndida babru Handbill Request nnam n̄kpọ kaban̄a uduak emi. Ke ndondo oro ẹnyenede mmọ, didie ke ẹkeme ndida mme n̄wedikot nnam n̄kpọ ke mfọnn̄kan usụn̄?
2 Ediwak asuanetop ẹkụt ke ndiyak kiet nnọ owo edi eti usụn̄ nditịn̄ owo ẹmi mmimọ idide nnyụn̄ ntọn̄ọ nneme. Ndiwụt ndutịm mbono esop m̀mê etop oro odude ke edem ekeme ndiberede usụn̄ nneme aban̄ade utom nnyịn ye uduak esie. Mme ete ye eka ẹkeme ndibuan n̄kpri nditọ mmọ ke utom ukwọrọikọ ebe ke ndinam mmọ ẹnọ n̄wedikot ke enyịnusụn̄. Mme asuanetop ẹmi ẹsibuanade ke edinọ ikọ ntiense eke ediwet leta ẹkpenyene ndisịn n̄wedikot kiet ke leta mmọ ẹnyụn̄ ẹnọ owo oro ikot ndidụk mme mbono esop. Eyedi nte ke ẹkeme ndinịm mme n̄wedikot ke mme ufọk oro owo mîdụhe ke ufọk, ama akam edi ẹtịn̄ enyịn ẹsịn enye ke idak usụn̄ man mmọ ẹdịbe owo ke enyịn ofụri ofụri.
3 Mme n̄wedikot ẹmedi n̄kpọutom ke ndidụri mbon esịt akpanikọ n̄wụt akpanikọ. Ifiọkutom kiet etịn̄ aban̄a n̄wan kiet emi, ke ntak n̄wedikot, ekekemede ndiyụhọ udọn̄ ofụri eyouwem esie ndifiọk Bible. Ke enye ama akabiat ofụri okoneyo ke ndibọn̄ akam nnọ Abasi, ke usenubọk ebe ye n̄wan ẹdide Mme Ntiense ẹma ẹmia n̄kanika enyịnusụn̄ esie. Ke esede odudu unyụn̄ọ nse an̄wa, enye ama ofiori ete ke imọ ikemeke ndiberede usụn̄. Mme Ntiense oro ẹma ẹnụk n̄wedikot kiet ẹsịn ke idak usụn̄. Enye okokot ete: “Fiọk Bible Fo.” Enye ama okụt onyụn̄ eberede usụn̄. Ẹma ẹtọn̄ọ ukpepn̄kpọ ebe oro, ndien enye ama ana baptism ke ukperedem. Ke mîdehede ida odudu spirit Abasi ke usụhọde, nnyịn kpukpru ini ikpakam ida mme n̄wedikot inam n̄kpọ nte ọfọnde nte nnyịn inamde utom ukwọrọikọ nnyịn ima ọyọhọ ọyọhọ.