Ndituak Ibuot Nnọ Jehovah nte Ubon
1 Ke mme ini Bible, mbonubon ẹma ẹsinam ediwak n̄kpọ ọtọkiet. Mmọ ẹma ẹsinam utom esịtufọk ọtọkiet, ndien ke edide akpan n̄kpọ akan, mmọ ẹma ẹsikpono Jehovah nte ubon. (Lev. 10:12-14; Deut. 31:12) Ke ediwak itie mfịn, mbonubon isinen̄ekede inam n̄kpọ ọtọkiet. Nte ededi, mme Christian ẹfiọk ke ọfọn ndinam n̄kpọ ọtọkiet nte ubon, akpan akpan n̄kpọ aban̄ade utuakibuot. Eyịghe idụhe nte ke Anditọn̄ọ ubon esinem esịt ndikụt ubon ẹdianade kiet ẹtuak ibuot ẹnọ imọ!
2 Ẹkwọrọ Ikọ Ọtọkiet: Ndisan̄a kiet n̄kwọrọ eti mbụk esisọn̄ọ mbọbọ ubon. Ke ntre, ke adianade ye edisan̄a ye mbon en̄wen ke esop n̄kwọrọ ikọ, ebiowo ekpenyene ndisan̄a n̄ko ndien ndien ye n̄wan ye nditọ esie. (1 Tim. 3:4, 5) Kpa ye oro ẹyọhọde ye utom, mme esenyịn oro ẹsan̄ade-san̄a ẹsinam ndutịm ndisan̄a ye iban mmọ ke an̄wautom.
3 Mme ete ye eka oro ẹsikwọrọde ikọ ye nditọ mmọ ẹsikeme ndin̄wam mmọ ẹnam n̄kọri nte mme ọkwọrọ eti mbụk. Nditọ ẹyekụt idatesịt ye uyụhọ oro ete ye eka mmọ ẹnyenede ke an̄wautom ẹnyụn̄ ẹkụt nte mmọ ẹwụtde ima oro mmọ ẹmade Jehovah ye ekemmọ owo. (Deut. 6:5-7) Osụk ededi akpan n̄kpọ mme ete ye eka ndikwọrọ ikọ ye nditọ mmọ nte mmọ ẹkọride ẹkpon. Ebe ye n̄wan kiet emi ẹnyenede nditọiren ita emi ẹdude ke ufọt isua 15 esịm 21 ke emana ẹsika iso ndisan̄a ye nditọ mmọ ke an̄wautom. Ete mmọ ọkọdọhọ ete: “Nnyịn imesikpep mmọ n̄kpọ kpukpru ini. Ndien nnyịn imesinam ini emi enem onyụn̄ akama nduaidem.”
4 Ẹtịm Idem Ọtọkiet: Mme ubon ẹsikụt nte ọfọnde nditịm idem ọtọkiet nnọ an̄wautom. Nditọwọn̄ ẹsima ini ndomonse emi mbonubon ẹsinọde ikọ ntiense m̀mê ẹnamde nte idi enyeneufọk. Ndusụk owo ẹsida minit ifan̄ ke ẹma ẹkekụre ukpepn̄kpọ ubon ẹnam emi.
5 Nnyịn imesinen̄ede ikop inemesịt ke ini nnyịn ye mbon oro nnyịn imade ibuanade ke mme utom oro ẹdide akpan n̄kpọ ẹnyụn̄ ẹnọde uyụhọ. Esinem didie ntem mbonubon ndisan̄a kiet ke an̄wautom ke ufọk ke ufọk ye ke ndinam mfiakn̄ka nnyụn̄ nnịm mme ukpepn̄kpọ Bible! Nte adianade ye ubon fo atuak ibuot ọnọ Jehovah, afo emekeme nditịn̄ ye idatesịt ete: “Ama edi ami ye ufọk mi, nnyịn iyanam n̄kpọ Jehovah.”—Josh. 24:15.