Nsịnudọn̄ eke Otode Edem Mbiba Odu Ọnọ Kpukpru Owo
1. Nso idi mme san̄asan̄a ifet oro edidi mme esenyịn oro ẹsan̄ade-san̄a esinọde?
1 Apostle Paul ama ewet esop ke Rome ete: “[Ọdọn̄] mi ndikụt mbufo, man n̄kpọnọ mbufo ndusụk enọ eke spirit man ẹnam mbufo ẹsọn̄ọ ẹda; mîdịghe, man nsịnudọn̄ eke otode edem mbiba okpodu ke otu nnyịn, oto ke mbuọtidem edem mbiba, eke mbufo ye okịm.” (Rome 1:11, 12) Mfịn n̄ko, mme esenyịn oro ẹsanade-sana ndisidi esop esinam ẹkeme ndibọ nsịnudọn̄ eke otode edem mbiba.
2. Ntak emi ẹsibakde-bak ẹtọt edidi esenyịn circuit?
2 Esop: Ẹsibabak ẹtọt esop ẹban̄a edidi esenyịn circuit n̄kpọ nte ọfiọn̄ ita mbemiso enye edide. Emi esinọ nnyịn ini ndinam mme ukpụhọde ke ndutịm nnyịn man ikeme ndibọ ufọn ọyọhọ ọyọhọ. (Eph. 5:15, 16) Edieke anamde utom ke idak owo, emekeme ndisịn ẹben̄e mbọ usen nduọkodudu man etiene abuana ke utom ukwọrọikọ ke urua oro. Ndusụk owo ẹsinam ndutịm man ẹnam utom usiakusụn̄ unọ un̄wam ke ọfiọn̄ oro esenyịn circuit edide. Edieke edide ama ananam nditịm ndika isan̄, nte emekeme ndinam ukpụhọde ke ndutịm fo man odu ke urua oro?
3. Nso ke nnyịn owo kiet kiet ikeme ndinam man ibọ nsịnudọn̄ ke ini esenyịn circuit edide?
3 Akpan ntak kiet oro esenyịn circuit esidide edi man edisịn udọn̄ ọnọ nnyịn owo kiet kiet onyụn̄ ọnọ nnyịn ukpep ke an̄wautom. Nte emekeme ndinọ enyịn̄ fo ndisan̄a ke an̄wautom ye enye m̀mê n̄wan esie edieke enye ọdọde ndọ? Esenyịn circuit esima ndisan̄a ye nsio nsio asuanetop, esịnede mbon oro mîtịmke inyene ifiọk m̀mê usọ ke an̄wautom. Kpukpru owo ẹkeme ndikpep n̄kpọ nto usụn̄ oro enye ọkwọrọde ikọ ẹnyụn̄ ẹda mme ekikere oro enye ọnọde ẹsịn ke edinam. (1 Cor. 4:16, 17) Ndikot enye ufọk eyeberede ifet efen ndibuana ke nneme oro ọnọde owo nsịnudọn̄. (Heb. 13:2) Sia enye esinamde mme utịn̄ikọ esie ekekem ye mme udọn̄ esop, nen̄ede kpan̄ utọn̄.
4. Didie ke ikeme ndisịn udọn̄ nnọ esenyịn circuit nnyịn?
4 Esenyịn Circuit: Apostle Paul ama esisobo nsọn̄ọn̄kpọ onyụn̄ okop editịmede esịt ukem nte nditọete oro enye ekesikade ekese, ntre enye ama esiyom nsịnudọn̄ n̄ko. (2 Cor. 11:26-28) Ke ini esop oro ke Rome ọkọfiọkde ke Paul oro okodude ke n̄kpọkọbi ke edi edise mmimọ, ndusụk mmọ ẹma ẹnam isan̄ oro okoyomde usụn̄ ke n̄kpọ nte kilomita 74 ẹka An̄waurua Appius man ẹkesobo ye enye. “Ke ini Paul okụtde mmọ, enye ọkọm Abasi onyụn̄ okop nsọn̄esịt.” (Utom 28:15) Afo n̄ko emekeme ndisịn udọn̄ nnọ esenyịn circuit mbufo. Nọ enye “ukpono utịm ikaba” ebe ke ndinen̄ede mbere ye enye ke ini edidi esie. (1 Tim. 5:17) Dọhọ enye ke imọ imenen̄ede ima ukeme oro enye esịnde ndin̄wam fi nyụn̄ nam n̄kpọ ndiwụt emi. Enye ye n̄wan esie ẹyekop inemesịt ndikụt mbuọtidem, ima, ye ime fo.—2 Thess. 1:3, 4.
5. Ntak emi kpukpru nnyịn iyomde nsịnudọn̄ mfịn?
5 Ke “ndiọkeyo” emi, anie ke otu nnyịn mîyomke nsịnudọn̄? (2 Tim. 3:1) Biere idahaemi ndisibuana ọyọhọ ọyọhọ ke san̄asan̄a urua utom ye esenyịn circuit. Kpukpru nnyịn—mme esenyịn oro ẹsan̄ade-san̄a ye mme asuanetop—imekeme nditiene mbuana ke inem inem nsịnudọn̄ eke otode edem mbiba. Ke usụn̄ emi, nnyịn n̄ko ‘iyaka iso ndidọn̄ kiet eken esịt inyụn̄ ibọp kiet eken inam ọkọri.’—1 Thess. 5:11.