‘Paul Ọkọm Abasi Onyụn̄ Ọdọn̄ Idem Esịt’

Ke ini nditọete oro ẹkedude ke Rome ẹkekopde ke Paul ke edi, ndusụk mmọ ẹma ẹsan̄a n̄kpọ nte itiat 40 ẹkesobo ye enye. Didie ke se mmọ ẹkenamde emi okotụk Paul? “Ke ini Paul okụtde mmọ, enye ọkọm Abasi onyụn̄ ọsọn̄ọ idemesie esịt.” (Ut 28:15) Okposụkedi emi Paul ekesisọn̄ọde nditọete idem ke ini enye akade ekese esop, isan̄ enye emi, nditọete ẹkesọn̄ọ enye idem sia enye ekedide owo n̄kpọkọbi.—2Co 13:10.

Mfịn, mme esenyịn circuit ẹsisan̄a ẹse mme esop ẹnyụn̄ ẹsọn̄ọ nditọete idem. Edi ukem nte ikọt Abasi eken, idem ẹsimem mmọ, esịt esinyụn̄ etịmede mmọ ndusụk ini. Ke ini esenyịn circuit ye n̄wan esie ẹfiakde ẹdi esop mbufo, nso ke akpanam man ọsọn̄ọ mmọ idem, kpa nte mmọ ẹdisọn̄ọde mbufo idem?—Ro 1:11, 12.

• 

  Tiene dụk mbono an̄wautom. Esinem esenyịn circuit ndikụt nditọete ẹnamde ofụri se mmọ ẹkemede man ẹtiene ẹdia ufọn urua oro enye edide edise esop. (1Th 1:2, 3; 2:20) Emekeme ndinam usiakusụn̄ unọ un̄wam ọfiọn̄ oro. Emekeme ndisan̄a ye enye ye n̄wan esie n̄ka ukwọrọikọ, mîdịghe ọdọhọ mmọ ẹtiene ẹdu ke ini ekpepde owo n̄kpọ. Esinem mmọ ndisan̄a ye nsio nsio owo ke an̄wautom, esịnede mbufa mme asuanetop m̀mê mbon oro ẹkerede ke mmimọ inen̄ekede ifiọk ndikwọrọ ikọ.

• 

  Dara mmọ esen. Emekeme ndidọhọ mmọ ẹdidụn̄ ye afo mîdịghe okot mmọ ufọk. Emi ayanam mmọ ẹkụt ke afo amama mmimọ. Iwọrọke ke ana etem enyọn̄ ye isọn̄ ọnọ mmọ.—Lu 10:38-42.

• 

  Kpan̄ utọn̄ kop item esie nyụn̄ nam se enye ọdọhọde. Esenyịn circuit esin̄wam nnyịn ifiọk nte ikpenen̄erede isịn idem inam n̄kpọ Jehovah. Ndusụk ini, enye ekeme ndisua nnọ nnyịn. (1Co 5:1-5) Esinem enye ndikụt nnyịn inamde se esop Abasi ẹdọhọde.—Heb 13:17.

• 

  Kọm mmọ. Nam esenyịn circuit mbufo ye n̄wan esie ẹdiọn̄ọ ufọn oro adiade ke mmọ ndidi ndise esop mbufo. Emekeme nditetịn̄ nnọ mmọ, ewet ke leta, mîdịghe ọnọ mmọ kad.—Col 3:15.