Da Ini Oro Odude ke An̄wautom Nam N̄kpọ nte Ọfọnde
1 Ke akpanikọ, imenyene ekese ndinam ke an̄wautom, edi ini emi osụhọde iniọn̄ke aba. (John 4:35; 1 Cor. 7:29) Edieke inamde eti ndutịm inyụn̄ ibemde iso itịm idem, nnyịn imekeme ndida ini oro ikodiomide inọ an̄wautom inam n̄kpọ nte ọfọnde.
2 Tịm Idem: Mbemiso akade mbono an̄wautom, kụt ete ke emenyene n̄wed oro edinọde ke an̄wautom, onyụn̄ enyene se editịn̄de. Ke ẹma ẹkeberi mbono an̄wautom ke akam, daha ka an̄wautom nnennen nnennen. Emi ayan̄wam fi ye mbon oro ẹsan̄ade ye afo ẹnam ekese ke ini oro ẹdude ke an̄wautom.
3 Edieke ẹdọhọde fi enịm mbono an̄wautom, tọn̄ọ ke ini. Nam edi ibio ibio—oro edi, ebịghi n̄kpọ nte minit 10 edi okûbe minit 15. Mbemiso ẹdahade, kụt ete ke owo kiet kiet ọdiọn̄ọ nsan̄a esie ye ebiet emi ẹdikwọrọde ikọ.
4 Ke Adan̄aemi Odude ke An̄wautom: Ke ndondo oro mbono an̄wautom asuanade, kûda ubiat ini nte mîdotke, edi daha ka efakutom. Edieke oyomde ndibabak nnyọn̄, ekeme ndiyom odiomi nte edisan̄ade ọnyọn̄ mbak udunam mbon en̄wen ẹtre ukwọrọikọ ke ini oro mmọ mîkoyomke nditre. Ke ini ẹnamde utom ke otu, kere ban̄a mbon emi ẹdade ẹbet fi ẹte okụre nneme ye enyeneufọk. Oro ekeme ndisịne ndida mbufiọk ndaha n̄kpọn̄ owo oro afan̄ade mfan̄a m̀mê ndidiomi ndifiak n̄ka mbịne owo oro enyenede udọn̄.—Matt. 10:11.
5 Ke ini anamde mme mfiakn̄ka, emekeme ndifep ọkpọsọn̄ isan̄ ke ndikụre mme mfiakn̄ka oro enyenede ke efak kiet mbemiso akade efen. Emekeme ndikot ndusụk mbon oro oyomde ndika n̄kese ke urụk ukopikọ man ọfiọk m̀mê mmọ ẹdu ke ufọk. (N̄ke 21:5) Edieke ekerede ke eyebịghi ke ebiet oro anamde mfiakn̄ka, sian mbon eken man mmọ ẹkpekwọrọ ikọ ke mbọhọ oro m̀mê ẹkpeka mfiakn̄ka en̄wen.
6 Nnyịn idu uwem ke ini akwa idọk eke spirit. (Matt. 9:37, 38) Ibịghike utom emi eyetre. Mmọdo, akpana ida ini oro idude ke an̄wautom inam n̄kpọ nte ọfọnde.