N̄wedikot Editi Oro Anade Ẹsuan ke Ofụri Ererimbot!
1. San̄asan̄a ubịnikọt ewe ke ẹdinam ke ofụri ererimbot mbemiso Editi?
1 “Ẹka iso ẹnam emi nditi mi.” (Luke 22:19) Man mme andituak ibuot nnọ Jehovah ẹnam ewụhọ Jesus emi, mmọ ẹyesobo ọtọkiet ye mbon oro ẹnyenede udọn̄ ke March 30, 2010, nditi n̄kpa Jesus. Ọtọn̄ọde ke March 13 esịm March 30, ẹyesuan san̄asan̄a n̄wedikot Editi emi ke ofụri ererimbot.
2. Didie ke idinọ n̄wedikot emi?
2 Nte Ẹdinọde N̄wedikot: Emekeme ndiyak n̄wedikot emi nnọ enyeneufọk man enye ese ndise oro odude ke edem, ekem ọdọhọ ete: “Ke mbubreyo March 30, ediwak miliọn owo ke ofụri ererimbot ẹyesobo ọtọkiet man ẹnịm Editi n̄kpa Jesus. Ndi ndikot fi ye ubon fo ẹdidụk Editi emi. Kot mme ufan mbufo n̄ko ẹtiene ẹdi. Mbọk sese ini ye ebiet oro ẹdinamde edinam emi mi.” Edieke ini odude, ẹmekeme ndikot Luke 22:19 ke Bible fo man owụt ke N̄wed Abasi ọdọhọ inịm Editi emi. Edi ti ete ke sia enyenede esisịt ini ndikụre efakutom, ọkpọfọn anam nneme fo edi ibio ibio.
3. Mmanie ke ikpokot?
3 Edieke efakutom esop mbufo okponde, mbiowo ẹkeme ndidọhọ enịm n̄wedikot ke mme ufọk oro owo mîdụhe ke akpa ini oro akade. Ke ini odotde, dian n̄wedikot ye magazine nọ. Kụt ete ke omokot mbon oro esifiakde aka ebịne, nditọ ukpepn̄kpọ Bible, nsan̄autom, nsan̄a ufọkn̄wed, iman, mbọhọidụn̄ ye mbon en̄wen oro afo emehede.
4. Ndiwụt esịtekọm mban̄a ima oro Jehovah owụtde ke ndinọ ufak edinam nnyịn inam nso?
4 Tịm Idem Man Abuana Ọyọhọ Ọyọhọ: Ini Editi edi ata eti ini nditat utom nnyịn. Ndi emekeme ndinam ndutịm man anam usiakusụn̄ unọ un̄wam? Ndi emenyene nditọ m̀mê nditọ ukpepn̄kpọ Bible oro ẹnamde n̄kọri? Edieke edide ntre, neme ye mbiowo man mmọ ẹse m̀mê mbufa owo emi ẹdot nditiene mbuana ke san̄asan̄a ubịnikọt emi nte mme asuanetop emi mînaha baptism. Ndiwụt esịtekọm mban̄a ima oro Jehovah owụtde ke ndinọ ufak ayanam idụk Editi oro inyụn̄ ikot adan̄a ediwak owo nte ikekeme ẹdibuana ye nnyịn.—John 3:16.