Ubịnikọt Editọt Mme Owo Mban̄a Editi Editọn̄ọ ke March 17
1. Nso ke iditọn̄ọ ndinam ke March 17?
1 Editi oro isinịmde kpukpru isua esidi man ẹkwọrọ n̄kpa Jesus. (1 Cor. 11:26) Mmọdo, imoyom mbon en̄wen ẹtiene nnyịn ẹdụk ẹnyụn̄ ẹkop ẹban̄a ufak, kpa edima enọ oro Jehovah ọnọde nnyịn. (John 3:16) Isua emi, nnyịn iditọn̄ọ ke March 17 ikot mme owo ẹdidụk Editi. Ndi afo amanam ndutịm nditiene mbuana ifịk ifịk?
2. Nso ke ikpetịn̄ ke ini inọde owo n̄wedikot?
2 Se Ikpetịn̄de: Ọkpọfọn inam nneme nnyịn edi ibio ibio. Imekeme ndidọhọ: “Mmọkọm-o. Iyom ndinọ fi ye ubon fo ikot ẹdidụk ata akpan edinam oro ẹsinamde kpukpru isua, emi ẹdinamde ke ofụri ererimbot ke April 5. Ẹyenọ utịn̄ikọ Bible mfọn oro edinamde ufọn n̄kpa Jesus an̄wan̄a ye se Jesus anamde idahaemi. N̄wedikot emi owụt ebiet ye ini oro ẹdinịmde mbono emi ke n̄kann̄kụk nnyịn.” Ke ini itienede isuan n̄wedikot ke mme utịturua, ikpenyene ndidian enye ye magazine nnọ ke ini odotde ndinam ntre.
3. Didie ke ikeme ndikot adan̄a ediwak owo nte ikekeme?
3 Kot Adan̄a Ediwak Owo nte Ekekeme: Uduak nnyịn ekpedi ndikot adan̄a ediwak owo nte ikekeme. Ntre, kụt ete ke omokot nditọ ukpepn̄kpọ Bible fo, mbon oro esifiakde aka ebịne, iman fo, nsan̄autom, nsan̄a ufọkn̄wed, mbọhọidụn̄, ye mbon en̄wen oro afo emehede. Mbiowo esop mbufo ẹyenọ ndausụn̄ ke nte ẹdikụrede efakutom mbufo. Ubịnikọt oro isinamde kpukpru isua ndikot mme owo ẹdidụk Editi esinyene utịp. Ke ini n̄wan kiet akakade ebiet oro ẹkenịmde Editi isua oko, adaidaha ama ọdọhọ ke imọn̄ in̄wam enye iyom asuanetop oro okokotde enye. Edi, n̄wan oro ama ọdọhọ ke imọ idiọn̄ọke owo ndomokiet, ye nte ke ẹkenọ imọ n̄wedikot oro ke ini ẹkekwọrọde ikọ ke ufọk ke ufọk usenubọk oro.
4. Mme ntak ewe ke inyene ndibuana ifịk ifịk ke ubịnikọt emi?
4 Ekeme ndidi owo oro odụkde Editi mbufo edidụk ke ntak n̄wedikot oro ọkọnọde enye. Edide owo oyodụk m̀mê ididụkke, ọkpọsọn̄ ukeme oro afo esịnde oyosụk ọnọ ikọ ntiense. N̄wedikot oro afo asuande ayatan̄a ke Jesus edi okopodudu Edidem idahaemi. Ifịk oro afo esịnde ayanam kpukpru owo—mbon oro ẹdude ke efakutom mbufo, ekemmọ mme asuanetop, ndien akpan akpan Jehovah—ẹkụt ke afo emenen̄ede owụt esịtekọm aban̄a enọ ufak.—Col. 3:15.