Ubịnikọt Ndikot Mme Owo Ẹdidụk Editi Editọn̄ọ ke March 1
1. Ini ewe ke iditọn̄ọ ndikot mme owo ẹdidụk Editi, ndien ntak emi ini ubịnikọt emi ọniọn̄de ntre isua emi?
1 Ke Friday, March 1, nnyịn iyọtọn̄ọ ubịnikọt oro isinamde kpukpru isua ndikot mme owo ẹditiene nnyịn ẹdụk Editi. Editi edidi ke March 26, emi ọwọrọ ke ini ubịnikọt isua emi ọyọniọn̄ akan eke mme isua oro ẹkebede. Emi ayanam ẹkeme ndinọ ediwak owo ikot, akpan akpan edieke mmọ ẹdụn̄de ke ebiet emi esop enyenede akamba efakutom.
2. Nso ndutịm ke ẹnam ẹban̄a edibọ n̄wedikot ye nte ẹdisan̄ade ẹnam utom ke ofụri efakutom?
2 Ndutịm Oro Ẹnamde Kaban̄a Ubịnikọt: Mbiowo ẹyenọ ndausụn̄ ke nte ẹdisan̄ade ẹnam utom ke ofụri efakutom, ẹnyụn̄ ẹnam ẹfiọk m̀mê ẹyenịm n̄wedikot ẹnọ mbon oro mîdụhe ke ufọk. Edieke n̄wedikot osụhọde ke ẹma ẹkekwọrọ ikọ ke ufọk ke ufọk ke ofụri efakutom, ẹkeme ndinọ mmọ ke ini ẹnamde an̄wan̄wa unọ ikọ ntiense. Esenyịn utom ekpenyene ndikụt ete ke ẹdori n̄wedikot oro ẹma ẹkewet ini ye ebiet ke itie emi ẹsidoride n̄wed m̀mê mme magazine man mme asuanetop ẹkemen, edi owo ididorike kpukpru n̄wedikot inikiet. Inyene ndimen sụk se idinọde ke an̄wautom urua oro.
3. Nso ke ikpeti ke ini inọde n̄wedikot?
3 Nso ke Iditịn̄? Mfọnn̄kan usụn̄ edi ndinam nneme nnyịn edi ibio ibio, koro emi ayanam ikeme ndisịm ediwak owo. Usụn̄ unyene nneme emi ikemede ndinam ekekem ye efakutom nnyịn odu ke page 4. Edi edieke enyeneufọk etiede ufan ufan m̀mê obụpde mbụme, iyomke inam ibio ibio isọp idaha. Ke ini idemede n̄wedikot ke mme utịturua, inyene ndinọ mme magazine n̄ko ke ini ọfọnde ndinam ntre. Ke March 2, idinọ ntịn̄enyịn ke ndideme n̄wedikot utu ke nditọn̄ọ ukpepn̄kpọ Bible.
4. Ntak emi ikpetienede isịn idem inam ubịnikọt emi?
4 Imodori enyịn ke ediwak owo ẹyetiene nnyịn ẹdụk Editi. Utịn̄ikọ Editi ayanam owo emi Jesus edide an̄wan̄a. (1 Cor. 11:26) Oyowụt nte n̄kpa esie an̄wamde nnyịn. (Rome 6:23) Oyonyụn̄ owụt ntak emi nnyịn nditi Jesus edide akpan n̄kpọ. (John 17:3) Ẹyak nnyịn itiene isịn idem inam ubịnikọt emi!