August Edidi Akpan Ọfiọn̄ Oro Ẹdinamde Utom!

1. San̄asan̄a ubịnikọt ewe ke edinam ke ofụri ererimbot nte nnyịn isan̄ade ikpere ọyọhọ isua 100 tọn̄ọ nte ẹketọn̄ọ ukara Obio Ubọn̄?

¹ Ekpere ndisịm isua 100 tọn̄ọ nte ẹketọn̄ọ ukara Obio Ubọn̄. Ntem enen̄ede odot nnyịn ikpono Jehovah ke ndinam san̄asan̄a ubịnikọt. Ke August, nnyịn iyasuan obufa tract oro ibuotikọ edide, Anie Ekeme Ndibọrọ Mbụme Emi Afịnade Ata Ediwak Owo? Tract emi esịn udọn̄ ọnọ mme andikot ete ẹyom ibọrọ mbụme emi ke Bible, onyụn̄ owụt nte jw.org ekemede ndin̄wam mmọ.

2. Didie ke ikeme nditịp nsịn ke ‘akwa mfiori oro ẹditorode Jehovah,’ ke August?

² Akwa Mfiori Itoro: Ẹnam san̄asan̄a ndutịm ẹnọ mme asuanetop oro ẹyomde ndinam utom usiakusụn̄ unọ un̄wam ke August man an̄wam mmọ ẹnam ekese ke utom ukwọrọikọ mmọ. Ẹyeyak mme asuanetop oro ẹma ẹkena baptism emi ẹyomde ndinam utom usiakusụn̄ unọ un̄wam ẹnọ hour 30 ọfiọn̄ oro. Sia August enyenede Friday ition, Saturday ition, ye Sunday ition, ediwak mme asuanetop oro ẹnamde utom m̀mê ẹkade ufọkn̄wed ẹyekeme ndinam usiakusụn̄ unọ un̄wam. Edieke enyenede eyen m̀mê eyen ukpepn̄kpọ Bible oro anamde n̄kpọ ndikabade ndi asuanetop, babak tịn̄ nọ anam-ndutịm otu mbiowo. Nso nsịnudọn̄ ke emi edidi ntem nte mmọ ẹtienede nnyịn ẹnam utom nte mme asuanetop ke akpan ọfiọn̄ emi! Okposụkedi emi ediwak mme asiakusụn̄ ofụri ini ke ndusụk idụt ẹsikade nduọkodudu ke August ke mmọ ẹma ẹkenyene ibat hour oro ẹyomde ẹto mmọ ke isua, mmọ ẹkeme ndinam ukpụhọde ke ndutịm mmọ man ẹnam ekese ke san̄asan̄a ubịnikọt emi. Ini edi emi mme ubon ndineme ọtọkiet nte mmọ ẹditienede ẹtịp ẹsịn ke ‘akwa mfiori oro ẹditorode Jehovah,’ ke August.—Ezra 3:11; N̄ke 15:22.

3. Nso ke idori enyịn ndikụt ke san̄asan̄a ubịnikọt emi?

³ Okposụkedi emi isitienede isuan mme tract ke ini edem, imodori enyịn nte ke enye emi edidi n̄wọrọnda. Ndi imekeme ndinyene n̄wakn̄kan ibat hour, mme asuanetop, ye mme asiakusụn̄ unọ un̄wam ke August? Nte ididade isua utom 2014 ikesịm utịt, Jehovah akpakam ọdiọn̄ ukeme oro ikọt esie ẹsịnde ke ofụri ererimbot ndinam ọfiọn̄ August edi ọfiọn̄ emi ẹnọde ikọ ntiense ẹkan!—Matt. 24:14.