Se Idin̄wamde Nnyịn Idi Nti Mme Ọkwọrọikọ—Da Eti Mbụk Emi Otode Abasi! Tọn̄ọ Ukpepn̄kpọ Bible ye Owo ke Enyịnusụn̄
Ntak Emi Edide Akpan N̄kpọ: Ana ifiọk ndikpep mme owo Ikọ Abasi man inam mmọ ẹdi mbet Jesus. (Matt. 28:19, 20) Kpukpru nnyịn imekeme ndida se esop Abasi ẹnọde nnyịn ikpep mme owo n̄kpọ ọfọn. Ẹkesio ediye ekpri n̄wed emi ẹkotde, Eti Mbụk Emi Otode Abasi! man ida ikpep mme owo akpanikọ. Imekeme ndida enye ntọn̄ọ ukpepn̄kpọ Bible ye mme owo ke enyinusụn̄.
Nam Emi Ọfiọn̄ Emi:
Ben̄e Jehovah anam fi ama ndisikpep mme owo Bible. Ben̄e enye n̄ko an̄wam fi ekeme ndisitọn̄ọ ukpepn̄kpọ Bible ye mme owo onyụn̄ an̄wam fi ọdiọn̄ọ ndikpep mme owo Bible ọfọn.—Phil. 2:13.
Da ini utuakibuot ubon mbufo m̀mê ini ukpepn̄kpọ idemfo nen̄ede kpep nte edinamde se ẹtịn̄de ke ekebe ke ibuotikọ emi. Emi ayanam ekeme nditịn̄ ikọ uko uko onyụn̄ ọtọn̄ọ ukpepn̄kpọ Bible ke enyịnusụn̄ ke ini akade ukwọrọikọ.