Nte Abasi Anamde Nnyịn Idiọn̄ọ Se Enye Edinamde

Tọn̄ọ Abasi okobot owo, enye esida mme angel ye mme prọfet eneme nneme ye mme owo. N̄ko, enye ama anam ẹwewet ikọ esie ye se enye ọn̄wọn̄ọde ndinam. Se enye ọn̄wọn̄ọde emi ayanam ikop inemesịt ke ini iso. M̀mọ̀n̄ ke ikeme ndikụt se enye ọn̄wọn̄ọde ndinam?

Ikọ Abasi odu ke Edisana N̄wed Abasi. (2 Timothy 3:16) Didie ke Abasi akanam mme prọfet ẹwet ikọ esie? Abasi eketeme mmọ se ẹkpewetde. (2 Peter 1:21) Se mbon mbubehe ẹsinyụn̄ ẹnamde edi oro mfịn. Edieke enyene-mbubehe ọdọhọde owo utom esie ewet etop ọnọ owo, owo oro edida ke etop oro oto enyene-mbubehe, itoho owo oro ekewetde. Ntre ke onyụn̄ edi ye Bible. Kpa ye oro edide mme owo ẹkewet Bible, sia edide Abasi eketeme mmọ se ẹkpewetde, Abasi enyene Bible.

IKỌ ABASI EKEM OWO UBỌK

Abasi enyene ata akpan etop ọnọ nnyịn, ntak edi oro enye oyomde kpukpru owo ẹkot Ikọ esie. Mfịn, ke ẹkwọrọ “nsinsi eti mbụk” ke “kpukpru mme idụt ye esien ye usem.” (Ediyarade 14:6) Abasi anam Bible odu ebe usem 3,000, edide ofụri Bible m̀mê ndusụk ikpehe. Idụhe n̄wed en̄wen emi ẹmịn̄de ke ediwak usem ntem.