NTE CHRISTIAN OKPODUDE UWEM

Obufa N̄kpọ Oro Idinamde ke Mbono Esop Uwem ye Utom Nnyịn

Ọtọn̄ọde ke January 2018, N̄wed Mbono Esop nnyịn eyesidọn̄ọ mbufa n̄kpọ emi ẹdade ẹto Edisana N̄wed Abasi—Edikabade Eke Obufa Ererimbot eke ukpepn̄kpọ (nwtsty) emi odude ke Intanet, ekpededi Bible emi idụhe kan̄a ke usem mbufo. Mbufa n̄kpọ emi ẹsịne se ẹwetde ẹban̄a nsio nsio n̄kpọ ke ufan̄ikọ Bible, mme ndise, ye mme vidio emi ẹkụtde ndise kpọt. Imenịm ke obufa n̄kpọ emi eyenen̄ede an̄wam fi esitịm idem ọnọ mbono esop. Se ifọnde ikan edi ke enye ayanam fi enen̄ede ekpere edima Ete nnyịn ke heaven, kpa Jehovah!

SE ẸWETDE ẸBAN̄A NSIO NSIO N̄KPỌ KE UFAN̄IKỌ BIBLE

Enye emi etịn̄ n̄kpọ aban̄a nsio nsio itie ye mme obio ke Bible, nte ẹkesinamde n̄kpọ ini oro, ye usem mmọ kiet kiet.

Matthew 12:20

Ọfọn̄ utuenikan̄ eke osiode nsụn̄ikan̄: Ẹkesida mbateso ẹnam utuenikan̄ emi, ẹda mfịbe flax ẹnam ọfọn̄ utuenikan̄ esie, ẹnyun̄ ẹsịn aran olive man ikan̄ oro asak. Ikọ Greek oro ẹkabarede “ọfọn̄ utuenikan̄ eke osiode nsụn̄ikan̄” ekeme ndida mban̄a ọfọn̄ utuenikan̄ oro ikan̄ oyomde ndinịme m̀mê oro ikan̄ enịmede ata idahaoro, edi ke osụk ososion̄o nsụn̄ikan̄. Isaiah 42:3 ama owụt nte Jesus edituade owo mbọm; Jesus ayan̄wam mbon nsụhọdeidem ye mbon oro ẹfịkde, oro ẹsụk ẹnyenede ekpri idotenyịn nte ọfọn̄ utuenikan̄ oro mînịmeke ima.

Matthew 26:13

Ke akpanikọ: Ikọ Greek emi, a·menʹ, ọwọrọ “yak edi ntre” m̀mê “ke akpanikọ.” Ẹda enye ẹto ikọ Hebrew emi, ʼa·menʹ. Jesus ama esiwak ndida ikọ emi ntọn̄ọ se enye etịn̄de, se enye ọn̄wọn̄ọde, m̀mê prọfesi esie man owụt ke edi akpanikọ, ke idinyụn̄ itreke-tre nditịbe. Ẹdọhọ ke Jesus ekesiwak ndida ikọ oro “ke akpanikọ,” m̀mê amen ntịn̄ ikọ n̄kan ke N̄wed Abasi. Ke ini ẹwetde ikọ emi ikaba ntem, a·menʹ a·menʹ, nte ikụtde ke mme itie emi Jesus etịn̄de ikọ ke Gospel John, ẹkabarede enye ntem: “Ke ata akpanikọ.”—Joh 1:51.

MME NDISE YE VIDIO

Ẹdọn̄ mme ndise ye mme vidio oro ẹkụtde ndise kpọt, man ẹnam mme mbụk kiet kiet oro ẹwetde ke Bible an̄wan̄a.

Bethphage, Obot Olive, ye Jerusalem

Vidio emi owụt nte ẹtode Bethphage—emi ẹkotde et-Tur mfịn—ẹdụk Jerusalem ke n̄kan̄ edem usiahautịn, ẹnyụn̄ ẹsan̄a ẹkedọk kiet ke otu ikpehe Obot Olive emi enen̄erede okon̄. Bethany odu ke edem usiahautịn Bethphage, ke n̄kan̄ usụhọde edem usiahautịn Obot Olive. Ke ini Jesus ye mme mbet esie ẹkedude ke Jerusalem, mmọ ẹma ẹsiwak ndika Bethany n̄kede ke okoneyo. Mfịn, ẹdiọn̄ọ Bethany nte el-ʽAzariyeh (El ʽEizariya). Enyịn̄ Arabic emi ọwọrọ “Obio Emi Lazarus Okotode.” Jesus ama esidu ye Martha, Mary, ye Lazarus. (Mt 21:17; Mr 11:11; Lu 21:37; Joh 11:1) Ke ini Jesus okoyomde ndito ufọk mmọ n̄ka Jerusalem, etie nte enye ekesisan̄a usụn̄ emi ẹwụtde ke vidio emi. Ke Nisan 9, 33 C.E., ke ini Jesus akawatde abak ass oto Obot Olive aka Jerusalem, etie nte enye okoto Bethphage awat ekesịm Jerusalem.

Usụn̄ ẹsan̄ade ẹto Bethany ẹka Bethphage
Bethphage
Obot Olive
Itịghede Kidron
Itie Emi Temple Okodude

Okpukwak Emi Ẹkọn̄de Ẹsịn ke Nditịn̄ikpat Owo

Ndise emi owụt nditịn̄ikpat owo emi ẹkekọn̄de okpukwak emi ọniọn̄de ke inch inan̄ ye ubak ẹsịn. Ẹkekụt ọkpọ emi ke ini ẹsụk ẹdọkde isọn̄ ke enyọn̄ enyọn̄ Jerusalem ke 1968, ndien etie nte ẹkekọn̄ owo emi ke ini ukara Rome. Emi anam inịm ke ẹma ẹsida okpukwak ẹkọn̄ mme abiatibet ẹdian ke eto ke ini ukara Rome. Etie nte ukem okpukwak emi ke mbonekọn̄ Rome ẹkeda ẹkọn̄ Jesus Christ ẹdian ke eto. Ẹkekụt ọkpọ owo emi ke ekebe oro ẹdade itiat ẹnam. Ndien ẹkesidọn̄ nsat ọkpọ mme owo emi ẹkekpan̄ade, emi obụkidem ama akadiahade ke ekebe emi. Emi owụt ke ndusụk ini ẹma ẹsibụk owo emi ẹkekọn̄de-kọn̄ ẹwot ke eto.—Mt 27:35.