Nte Ẹkpenịmde Mbono An̄wautom Man Nditọete Ẹnen̄ede Ẹdia Ufọn

Mbono an̄wautom onyụn̄ etie nte mbono esop eken. Enye edi kiet ke otu n̄kpọ emi Jehovah ọnọde nnyịn man idemede kiet eken inọ ima ye nti utom. (Heb 10:24, 25) Akpana mbono an̄wautom edi minit ition esịm minit itiaba, ndien emi esịne ini emi ẹdade ẹdian owo, ẹnọ mme owo efakutom, ẹnyụn̄ ẹbọn̄ akam. (Edi akpana omụhọ akan oro edieke ẹnịmde enye ke mbono esop ama akasuana.) Eyenete emi enịmde mbono an̄wautom ekpenyene nditịn̄ n̄kpọ emi edin̄wamde mbon emi ẹdide ukwọrọikọ usen oro. Ke uwụtn̄kpọ, ke ini ẹnịmde mbono an̄wautom ke Saturday, ẹkeme ndineme nte ẹkpekwọrọde ikọ sia akpatre ini emi ediwak owo do ẹkekwọrọde ikọ ekedi ke utịturua oro ekebede. Nso en̄wen ke ẹkeme ndineme ke mbono an̄wautom?

• Ẹkeme ndineme se idude ke “Se Ekemede Nditịn̄” ke N̄wed Mbono Esop Uwem ye Utom Nnyịn Mme Christian

• Ẹneme nte ẹkpedade se itịbede ke obio m̀mê mbụk n̄kpọntịbe ẹtọn̄ọ nneme

• Ẹneme nte ẹkpebọrọde owo emi etịn̄de se ẹsitịn̄de ke edem nnyịn edieke owo mîyomke ndikop ukwọrọikọ

• Ẹneme nte ẹkpebọrọde owo emi ọdọhọde ke Abasi idụhe, owo emi enịmde ke n̄kpọ okofoforo, owo emi esemde usem en̄wen, m̀mê owo emi akade ufọkabasi emi owo mînen̄ekede idiọn̄ọ ke edem nnyịn

• Ẹneme nte nsio nsio n̄kpọ oro ẹdude ke jw.org, JW Library^®, m̀mê Bible ẹkemede ndin̄wam nnyịn ikwọrọ ikọ ọfọn

• Ẹneme nte ikpadade kiet ke otu n̄kpọ emi ẹdude ke Mme Akpan N̄kpọ Isidade Ikpep Owo Bible ineme ikọ Abasi ye owo

• Ẹneme nte ikemede ndida fon n̄kwọrọ ikọ, ndiwet leta, ndikwọrọ ikọ ke ebiet emi mme owo ẹwakde, ndifiak n̄kokụt owo emi ikọkwọrọde ikọ inọ, m̀mê ndikpep owo Bible

• Ẹti nditọete se ẹkpenamde ye se owo mîkpanamke ke ini ẹkwọrọde ikọ, se owo akpanamde man edidụk mfịna, ye mme n̄kpọ ntre

• Ẹneme ukpepn̄kpọ m̀mê vidio kiet ke ediye ekpri n̄wed oro Sịn Idem Kpep Ndikot N̄wed Nnọ Owo Nnyụn̄ N̄kpep Owo N̄kpọ

• Ẹneme nte owo akpan̄wamde owo emi enye asan̄ade kiet ke an̄wautom

• Ẹneme itie N̄wed Abasi emi aban̄ade ukwọrọikọ mîdịghe ẹtịn̄ se iketịbede ke ukwọrọikọ, emi edisọn̄ọde mme owo idem