NTE CHRISTIAN OKPODUDE UWEM
Mmanie Ẹdi Ufan Fo ke Intanet?
Mme owo ẹsima ndinam ufan ye owo emi mmọ ẹmade m̀mê ẹkponode. Ke uwụtn̄kpọ, Jonathan ye David ẹma ẹkabade ẹdi ata nti ufan ke David ama okowot Goliath. (1Sa 18:1) Nti edu mmọ akanam mmọ ẹma kiet eken. Emi owụt ke se idiọn̄ọde iban̄a owo esinam idi ufan esie. Esida ini mbemiso inen̄erede idiọn̄ọ owo. Edi esidi ndusụk owo ẹma ẹkokụt owo ke Intanet, mmọ ẹdọhọ enye edi ufan mmimọ. Sia edide ndusụk owo ẹsidedịp n̄kem ke Intanet ẹnyụn̄ ẹtie ẹkere se ẹditịn̄de, esisọsọn̄ ndidiọn̄ọ utọ owo emi mmọ ẹdide. Ntre, ọfọn isasat mbon emi inamde ufan ke Intanet. Kûyak ndịk anam fi ekere ke edieke mûnyịmeke ndidi ufan ye owo emi mûdiọn̄ọke ke Intanet, ke enye ọyọtọhọ. Ke ntak mfịna emi Intanet ekemede ndisịn owo, ndusụk owo isimaha ndika Intanet n̄keneme nneme ye mme owo. Edi edieke afo emekde ndisineme nneme ye mme owo ke Intanet, nso ke akpana ọdiọn̄ọ?
ẸSE VIDIO ORO KPEME SE ANAMDE KE INTANET, EKEM ẸBỌRỌ MME MBỤME EMI:
Nso ke ana eti mbemiso esịnde ndise m̀mê ewetde n̄kpọ esịn ke Intanet?
Ntak emi akpasatde-sat mbon emi anamde ufan ke Intanet?
Ntak emi ikpenịmde ini emi ikpesitrede ndineme nneme ye mme owo ke Intanet?—Eph 5:15, 16