Nte Ekemede Ndinyene Emem Kpa ye Ekọn̄ ye En̄wan
Gary emi ekesidide owo-ekọn̄ ọdọhọ ete: “Mbemiso n̄kekpepde Bible, n̄kọdiọn̄ọke ntak emi ukwan̄ikpe, utụk ye ufịk ye mme mfịna eken okponde ntem ke ererimbot. Edi mmenyene emem idaha-emi, esịt onyụn̄ ana mi sụn̄. Mmọdiọn̄ọ ke Jehovah Abasi ọmọn̄ anam emem ye ifụre odu ke ererimbot.”
Idịghe Gary kpọt ke etie ntre ke idem. Ẹyak ise nte Bible an̄wamde mbon en̄wen n̄ko.
BIBLE ỌDỌHỌ ETE: “Koro afo ọfọnde, O Jehovah, onyụn̄ enyịmede ndifen nnọ.”—Psalm 86:5.
NTE ITIE BIBLE EMI EKEMEDE NDIN̄WAM: “Itie Bible emi anam nnen̄ede nnịm ke Jehovah edi Abasi mbọm. Mmọdiọn̄ọ ke enye enyịme ndifen nnọ mi ke kpukpru se n̄kesinamde ini n̄kedide owo-ekọn̄.”—Wilmar, Colombia.
BIBLE ỌDỌHỌ ETE: “Ami mmọn̄ mbot mbufa enyọn̄ ye obufa isọn̄; ndien owo iditịghi aba mme akpa n̄kpọ, mmọ idinyụn̄ idụkke owo esịt.”—Isaiah 65:17.
NTE ITIE BIBLE EMI EKEMEDE NDIN̄WAM: “Ofụri se n̄kesinamde nnyụn̄ n̄kụtde ini n̄kesin̄wanade ekọn̄ isiyakke nde idap okoneyo, anam nnyene mfịna ibuot ye ọkpọsọn̄ editịmede esịt. Itie Bible emi eti mi ke ibịghike Jehovah ọmọn̄ etre kpukpru esịt oro esitịmerede mi do onyụn̄ anam n̄kûti aba kpukpru se ikesitịbede oro. Mme n̄kpọ oro ididụkke mi esịt aba. Ata eti n̄kpọ ke Abasi edinam inọ mi oro!”—Zafirah, United States.
BIBLE ỌDỌHỌ ETE: “Edinen owo ayafiari ke eyo esie, ndien ediwak emem oyodu tutu ọfiọn̄ idụhe aba.”—Psalm 72:7.
NTE ITIE BIBLE EMI EKEMEDE NDIN̄WAM: “Mmesiwak ndikere ikọ itie N̄wed Abasi emi. Ibịghike, ekọn̄ ye kpukpru se ekọn̄ amande ẹyebe ẹfep, esịt idinyụn̄ itịmekede nnyịn m̀mê n̄kpọ ayakam anam mbon nnyịn.”—Oleksandra, Ukraine.
BIBLE ỌDỌHỌ ETE: “Mme akpan̄kpa fo ẹyedu uwem. . . . Mbufo emi ẹdụn̄de ke ntan, ẹdemede ẹnyụn̄ ẹsio n̄kpo idara!”—Isaiah 26:19.
NTE ITIE BIBLE EMI EKEMEDE NDIN̄WAM: “Ẹma ẹwot ata ediwak mbonubon mi ini mbon Hutu ẹkeyomde ndiwot kpukpru mbon Tutsi nsio. Edi itie Bible emi enen̄ede anam ndiọn̄ọ ke nyafiak n̄kụt mmọ. Ntetie mbet ndifiak n̄kop ndinem uyo mmọ ini emi Abasi edinamde mmọ ẹset!”—Marie, Rwanda.
BIBLE ỌDỌHỌ ETE: “Ayak esisịt, idiọkowo ididụhe aba . . . Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”—Psalm 37:10, 11.
NTE ITIE BIBLE EMI EKEMEDE NDIN̄WAM: “Kpa ye oro ekọn̄ oro ama eketre, utụk, ufịk ye mme idiọkowo ẹsụk ẹdodu. Itie Bible emi esinen̄ede ọsọn̄ọ mi idem. Jehovah okụt kpukpru n̄kpọ, se iwọrọde mi onyụn̄ enen̄ede an̄wan̄a enye. Enye ọn̄wọn̄ọ ke ibịghike, kpukpru ufen oro ibọde mi ẹyetre, owo idinyụn̄ itịghi mmọ aba.”—Daler, Tajikistan.
Mbon oro ẹtịn̄de ẹban̄a ke magazine emi ẹsịne ke otu ediwak miliọn Mme Ntiense Jehovah emi Bible an̄wamde mmọ ẹnyene emem. Se mmọ ẹkpepde ke Bible anam mmọ ẹtre ndisua owo, inamke n̄kpọ m̀mê owo oro edi afia m̀mê obubịt, m̀mê oto ewe idụt m̀mê onyụn̄ oto ewe obio. (Ephesus 4:31, 32) Mme Ntiense Jehovah isisịnke idem ke pọlitiks isinyụn̄ itieneke in̄wana ekọn̄.—John 18:36.
Mme Ntiense Jehovah ke ofụri ererimbot ẹsinyụn̄ ẹma ẹnyụn̄ ẹn̄wam kiet eken nte ata nditọ-eka. (John 13:35) Ke uwụtn̄kpọ, Oleksandra, emi iketịn̄de iban̄a ke ntọn̄ọ, ama etiene akamba eyeneka esie an̄wan efehe aka idụt en̄wen ke ntak ekọn̄. Enye ọdọhọ ete: “Itibebe adan̄a idụt nnyịn̄ idụk idụt en̄wen, ima ikụt Mme Ntiense Jehovah ẹdade-da ẹbet ndidara nnyịn. Nte mmọ ẹken̄wamde nnyịn ama anam afiak emem nnyịn utom ndidu ke idụt oro nte mbon itọkekọn̄.”
Nnyịn Mme Ntiense Jehovah ikpama fi esitiene odụk mme mbonoesop nnyịn man ekpep nte Ikọ Abasi ekemede ndinam odu ke emem idaha-emi ye ke ini iso. Edieke oyomde ndidiọn̄ọ ebiet emi nnyịn Mme Ntiense Jehovah isinịmde mme mbonoesop nnyịn ke edem mbufo, mîdịghe edieke oyomde owo nnyịn ada n̄wed nnyịn emi Du Ata Uwem ke Nsinsi! esidineme Ikọ Abasi ye afo ke mfọn, ka ikpehe Intanet nnyịn jw.org.