Mme Enyene-Ndịk N̄kpọ Oro Ekọn̄ Esimande
Iwakke n̄kpọ emi esitọde uwem owo etịmede nte ekọn̄ ye en̄wan. Ke ofụri ererimbot, mbonekọn̄ ye mbon emi mîdịghe mbonekọn̄, emi ẹkụtde ekọn̄ an̄wanade ẹnen̄ede ẹdiọn̄ọ se ekọn̄ esimande.
MBONEKỌN̄
“Ke ini ekọn̄, esidi ete iwọwọn̄ọde idem afo okụt okpo owo m̀mê mbon emi ẹbiomode ndo idiọk idiọk. Kpukpru ini, osụk etie fi ke idem nte n̄kpọ ọmọn̄ etịbe ọnọ fi.”—Gary, Britain.
“N̄kpasi ikan̄ ama ọmụm mi ke edem ye ke iso. Mma n̄kụt ẹwotde ediwak owo, esịnede nditọwọn̄ ye ikpọ owo. Ekọn̄ esinanam owo ọsọn̄ esịt.”—Wilmar, Colombia.
“Okpokụt nte ẹtopde owo, udûsọpke ufre nte owo oro akatuade onyụn̄ omụmde mmụm. Se okokụtde oro idiwọrọke fi ke ibuot tutu amama.”—Zafirah, United States.
MBON EMI MÎDỊGHE MBONEKỌN̄
“N̄kekere ke ndikopke aba inemesịt tutu amama. Kpukpru ini, idem enyenyek fi m̀mê ẹmọn̄ ẹkam ẹwot fi, mbonubon fo m̀mê mme ufan fo.”—Oleksandra, Ukraine.
“Ndịk ama esinam nnyịn ndida ke line ubọ udia tọn̄ọ ke n̄kanika 2 ufọt okoneyo tutu esịm n̄kanika 11 okoneyo usen en̄wen sia udiọn̄ọke ebiet emi n̄kpasi ikan̄ editode imụm fi.”—Daler, Tajikistan.
“Ẹma ẹwot ete ye eka mi ke ekọn̄. Ekọn̄ anam ndidi eyenakpa, nnyeneke eke ọdọn̄de mi esịt m̀mê ekerede aban̄a mi.”—Marie, Rwanda.
Kpa ye ofụri se ekọn̄ amande emi, kpukpru mbon oro ẹtịn̄de ikọ mi ẹnyene emem idaha-emi. N̄kpọ en̄wen edi, ke mmọ ẹnen̄ede ẹnịm ke kpukpru ekọn̄ ye en̄wan oro akade iso mfịn ọmọn̄ etetre. Enyọn̄-Ukpeme emi ayada Bible etịn̄ nte oro edisan̄ade itịbe.