Ukpepn̄kpọ Idemowo—N̄kpọ Anade Ẹkere Ẹban̄a
1 Nso mme n̄kpọ ẹsinam nnyịn ikere n̄kpọ ntotụn̄ọ ntotụn̄ọ? Nnyịn ikpenyene ndikere ọkpọsọn̄ mban̄a edinyene ye edisọn̄ọ mmụm n̄kpet n̄kpet itie ebuana ye Jehovah n̄kama. Ukpep n̄kpọ idemowo enyene akpan udeme ke ndikọri utọ n̄kpet n̄kpet itie ebuana oro. Mfịn, ibat ibat ke otu nnyịn ẹnyene mme idaha oro ẹyakde ẹbiat anyanini ke nditie n̄kere n̄kpọ ye ukpepn̄kpọ idemowo. Edi, edieke nnyịn mîkotke Ikọ Abasi ofụri ini, idem ekeme ndimem nnyịn n̄kosịm udomo oro nnyịn mînyeneke ukeme ndin̄wana ye edu ererimbot ye mme udọn̄ obụkidem esie.
2 Kọri Udọn̄ nọ Ikọ Oro: Ke ini nnyịn ke akpa ikekpepde iban̄a mme uduak Abasi, anaedi nnyịn ima inyene udọn̄ ndikọ ifiọk efen efen. Nte ededi, nte ini akade, ekeme ndidi udọn̄ nnyịn kaban̄a udia eke spirit ama osụhọde. Ekeme ndidi oyom nnyịn ‘ikọri udọn̄’ inọ udia eke spirit. (1 Pet. 2:2, NW) Didie ke nnyịn ikeme ndikọri utọ udọn̄ oro?
3 Ufuọn̄ udia oro ẹmade eyenam udọn̄ edidia udia edemede ke ntak inem inem editi mban̄a ini edem. N̄kpri ini ukpepn̄kpọ idemowo ẹkeme nditụk nnyịn ke ukem usụn̄ oro ke n̄kan̄ eke spirit. Ndidia esisịt inem inem udia eke spirit ekeme ndidemede udọn̄ nnyịn nnọ ntotụn̄ọ akpanikọ. Uyụhọ oro otode edikpep n̄kpọ ekeme ndisịn udọn̄ nnọ nnyịn ndidụn̄ọde Ikọ Jehovah ntotụn̄ọ ntotụn̄ọ.
4 Nyene Ndutịm Oro Otịmde Ọfọn ye Afo: Ndusụk owo ẹsisio ofụri mbubịteyo kiet ẹnịm ẹnọ ukpepn̄kpọ idemowo, ke adan̄aemi mmọ en̄wen ẹmade mbio mbio ini ukpepn̄kpọ oro ẹnamde ndien ndien. Edieke afo okụtde ete ke imọ imekeme ndinọ ntịn̄enyịn n̄kan ke tụhi tụhi usenubọk, afo emekeme ndimek ndikpep n̄kpọ mbemiso adiade udia usenubọk. Edieke afo esidude ke edidemede akan ke mbubịteyo, afo emekeme ndimek ndikpep n̄kpọ mbemiso odụkde idap ke okoneyo. Se ededi oro idaha fo edide, akpan n̄kpọ edi ndinam enye ofụri ini nnyụn̄ nsọn̄ọ mmụm ndutịm oro otịmde odot ye mme udọn̄ fo n̄kama.
5 Ke ini ẹsịnde udọn̄ ẹnọ nnyịn ndinam ukpepn̄kpọ idemowo efen efen, nnyịn imekeme ndisọsọp ntịn̄ nte ke nnyịn imenyenyene ndutịm oro ọyọhọde ye edinam. Nte ededi, oyom kpukpru nnyịn inam akpanikọ ke ndidụn̄ọde nte nnyịn idade ini nnyịn inam n̄kpọ. Nte isibiat ediwak hour kpukpru usen ndise mme edinam television? Nte nnyịn imeben̄e idem ndiyak ndusụk ọkpọkpọ udọn ẹtak? Ekeme ndidi edinen̄ede ndụn̄ọde nte nnyịn idade ini nnyịn inam n̄kpọ eyeyarade mme ini oro ẹdude ke usen ke usen ẹmi ẹkemede ndida nnịm ukpepn̄kpọ idemowo oro otịmde ọnọ ufọn.—Eph. 5:15, 16.
6 Odot nnyịn inọ edikpep Ikọ Abasi ọyọhọ ntịn̄enyịn. Ndidomo ndinam n̄kpọ efen ke ukem ini oro anam enye enyene esisịt ufọn. Edieke nnyịn inyenede ntụhọ edidia udia, edikpan̄ utọn̄ nnọ radio, m̀mê edise television ke ini ikpepde n̄kpọ, ekeme ndidi se nnyịn idomode ndikpep ididụkke nnyịn esịt. (1 Tim. 4:15) Ntre oyom ẹfep mme n̄kpọ oro ẹtịmerede owo.—Se Ñwed-item Ufök-ñwed, page 32-33.
7 Edikpep item Bible ke usen ke usen nyụn̄ nda nsịn ke edinam ẹdi akpan n̄kpọ koro oro edi usụn̄ emi nnyịn ibọde ndausụn̄ ito Jehovah. Nam edi uduak fo ndisio akpanikọ oro ẹmịn̄de ke mme n̄wed nsịn ke esịt fo. Da kpukpru ifet oro ẹdude, inamke n̄kpọ m̀mê ekpri didie, ndikot n̄wed, ndinam ndụn̄ọde, m̀mê nditie n̄kere mme n̄kpọ eke spirit.—Deut. 6:6-8; Col. 1:9, 10.