Ukpepn̄kpọ 1

Nte Afo Ekemede Ndidiọn̄ọ Se Abasi Oyomde

Nso akpan ntọt isịne ke Bible? (1)

Anie edi andiwet Bible? (2)

Ntak emi afo ekpenyenede ndikpep Bible? (3)

1. Bible edi ọsọn̄urua enọ otode Abasi. Enye etie nte leta oro ima ima ete ewetde ọnọ ẹsọk nditọ esie. Enye asian nnyịn akpanikọ aban̄ade Abasi​—⁠enyeemi enye edide ye se mme idaha esie ẹdide. Enye anam an̄wan̄a nte ẹkpeyọde mme mfịna ye nte ẹkpenyenede ata inemesịt. Bible kpọt asian nnyịn se inyenede ndinam man inem Abasi esịt.​—⁠Psalm 1:​1-3; Isaiah 48:​17, 18.

2. Nsio nsio irenowo 40 ẹkewet Bible ke se ibede ufan̄ isua 1,600, ọtọn̄ọde ke 1513 M.E.N. Enye ọdọn̄ọ n̄kpri n̄wed 66. Mbon oro ẹkewetde Bible ẹkeda odudu spirit Abasi ẹwet. Mmọ ẹkewet mme ekikere esie, idịghe eke idemmọ. Ntre Abasi ke heaven, idịghe owo ndomokiet ke isọn̄, edi Andiwet Bible.​—⁠2 Timothy 3:​16, 17; 2 Peter 1:​20, 21.

3. Abasi ama okụt ete ke ẹsion̄o Bible nnennen nnennen ẹnyụn̄ ẹtịm ẹnịm. Ẹmịn̄ ediwak Bible efen efen ẹkan n̄wed efen ekededi. Idịghe kpukpru owo ẹdinem esịt ndikụt nte afo ekpepde Bible, edi kûyak oro akpan fi. Nsinsi ini iso fo ọkọn̄ọ ke afo ndidiọn̄ọ Abasi nnyụn̄ nnam uduak esie kpa ye ubiọn̄ọ ekededi.​—⁠Matthew 5:​10-12; John 17:⁠3.