Ẹkeda Ẹbọp Mme Ufọk Esop Abasi Mbemiso COVID-19 Ọtọn̄ọ

Ata ediwak owo ke ẹna baptism kpukpru isua ẹnyụn̄ ẹkabade ẹdi Mme Ntiense Jehovah, ntre imoyom ediwak ufọk ndida n̄kpono Jehovah. Oro akanam Itieutom Emi Ẹsede Ẹban̄a Ubọpn̄kpọ ke nsio nsio idụt ẹbiere ndibọp m̀mê ndidiọn̄ se ibede ufọk esop Abasi 2,700 ke isua utom 2020.a

Edi COVID-19 ikayakke inam kpukpru se ikaduakde. Otu Emi Ẹsede Ẹban̄a Utom Nnyịn ẹma ẹdọhọ ẹtre ndibọp ediwak utom oro ikakamade ke ubọk ke ofụri ererimbot man n̄kpọ idinam nditọete nnyịn. Ndidọhọ ẹtre utom emi ama onyụn̄ owụt ke imosụk ibuot inọ ukara. Kpa ye kpukpru emi, ima isụk ibọp inyụn̄ idiọn̄ se ibede ufọk esop Abasi 1,700 ke isua utom 2020 mbemiso COVID-19 ọtọn̄ọde. Ima inyụn̄ ikụre se ibede ikpọ utom 100 ke mme ọfis nnyịn ke nsio nsio idụt. Se nte nditọete nnyịn ẹdiade ufọn ẹto iba ke otu mme ọfis emi ikọbọpde ikụre mi.

Ọfis nnyịn ke Cameroon. Akani ọfis nnyịn ke Douala ama ekpri akaha, onyụn̄ oyom ẹnam akamba utom ke esịt. Otu Emi Ẹsede Ẹban̄a Utom Nnyịn ẹma ẹkere ndidiọn̄ ọfis nnyịn oro, edi mmọ ẹma ẹdikụt ke edieke ẹkpedọhọde ẹnyanyam ọfis oro, ke idisọn̄ke urua nte okụk emi ẹdidade idiọn̄ enye. Mmọ ẹma ẹkere n̄ko ndidedep isọn̄ mbọp ọfis en̄wen mîdịghe ẹdep ufọk ẹdiọn̄, edi ibuot ikosụk inaha.

Nte ẹkesụk ẹkerede n̄kpọ emi, nditọete nnyịn ẹma ẹkop ke ukara ẹduak ndisiak usụn̄ n̄kpere Itie Mbono emi odude ke enyọn̄ enyọn̄ Douala. Ukara ẹkpesiak usụn̄ emi, ọwọrọ owo idibọhọ-bọ ufen ndiwat n̄kesịm Itie Mbono emi, n̄ko ndisiak usụn̄ emi ayanam ikan̄, mmọn̄, ye n̄kpọ ntre ẹdu ke mbọhọ oro. Edieke ọfis nnyịn okpodude ke utọ itie emi, ekpenen̄ede ọfọn ye nnyịn. Ntre Otu Emi Ẹsede Ẹban̄a Utom Nnyịn ẹma ẹdọhọ yak ẹda n̄kan̄ kiet ke isọn̄ Itie Mbono oro ẹbọp obufa ọfis nnyịn.

Nditọete nnyịn ye mbon oro ikekpede-kpe ẹma ẹdọn̄ ubọk ẹnam utom oro, ndien emi ama anam ẹsọp ẹkụre utom oro, owo ikonyụn̄ ibiatke okụk ikaha. Okụk oro okosụhọde ke otu okụk oro ẹkeduakde ndida mbọp ọfis nnyịn oro ama ebe ₦760,000,000.00! Mbon Bethel ẹma ẹwọrọ ẹka obufa ọfis nnyịn emi esisịt ini mbemiso COVID-19 ọtọn̄ọde.

Enen̄ede enem mbon Bethel Cameroon ndinyene obufa ọfis emi, mmọ ẹnyụn̄ ẹda enye nte enọ emi otode Jehovah. Ebe ye n̄wan kiet ẹdọhọ ẹte: “Imenen̄ede isịn idem inam utom man iwụt ke imama enọ emi.”

Itie Ukabade N̄wed Tojolabal ke Mexico. Ke ediwak isua emi ebede, nditọete nnyịn emi ẹsikabarede n̄wed ẹsịn ke usem Tojolabal ẹkesinam utom ke ọfis nnyịn ke Central America; ọfis emi odu ekpere Mexico City. Edi ẹnen̄ede ẹsem usem Tojolabal ke Altamirano ye Las Margaritas, emi oyomde usụn̄ n̄kpọ nte itiat 1,000 ọkpọn̄ ebiet emi mmọ ẹdude! Emi ama anam ọsọn̄ ndikabade n̄wed nte mbon Tojolabal ẹsitịn̄de ikọ kpukpru usen. Ama esinyụn̄ ọsọn̄ ndinyene nditọete iren ye iban emi ẹdin̄wamde ikabade n̄wed isịn ke usem Tojolabal inyụn̄ i-rekọd n̄kpọ ke usem oro.

Emi ama anam Otu Emi Ẹsede Ẹban̄a Utom Nnyịn ẹbiere ndisio mme akabade n̄wed oro n̄ka ebiet emi ẹnen̄erede ẹsem usem Tojolabal. Ntre ọfis nnyịn ẹma ẹdep ufọk ẹnyụn̄ ẹdiọn̄ ẹnọ mmọ. Emi ama emem urua akan ndikpọbọp obufa ufọk m̀mê ndibọbọ ke ukpe-okụk.

Akabade n̄wed kiet etịn̄ ufọn emi imọ idiade. Enye ọdọhọ ete: “Isua duop edi emi n̄kanam utom nte akabade n̄wed ke ọfis nnyịn, edi akananam n̄kwe ubon ndomokiet emi ẹsemde usem nnyịn ke mbọhọ oro. Idahaemi ọfis nnyịn odude ke itie emi ata ediwak owo ẹsemde usem Tojolabal, mmesineme nneme ye mmọ kpukpru usen. Emi anam nnen̄ede ndiọn̄ọ usem nnyịn, onyụn̄ anam ndiọn̄ọ ndikabade n̄wed ọfọn.”

Se Iduakde Ndinam ke Isua Utom 2021

Edieke kpukpru n̄kpọ asan̄ade ọfọn ke isua utom 2021, iyọbọp inyụn̄ idiọn̄ mme ufọkn̄wed esop Abasi ye itie ukabade n̄wed 75. Iyaka iso ke ikpọ utom oro ikamade ke nsio nsio ọfis nnyịn itiaita, esịnede enye oro iduakde ndibọp ke Ramapo ke New York ndian ibuot itieutom nnyịn. Imaduak n̄ko ndisio ọfis nnyịn ke Argentina ye Italy n̄ka ebiet en̄wen. Adianade do, imoyom se ibede mbufa Ufọkmbono Obio Ubọn̄ 1,000, ndien se ibede itie 6,000 emi nditọete nnyịn ẹsisopde idem ẹkpono Abasi ataha ama, ndien ana ẹbọp obufa. Itetịn̄ mi, oyom ẹfiak ẹdiọn̄ Ufọkmbono Obio Ubọn̄ 4,000.

Isida m̀mọ̀n̄ okụk ibọp inyụn̄ idiọn̄ kpukpru n̄kpọ emi? Brọda Lázaro González, emi edide owo Kọmiti Ọfis Nnyịn ke Central America, ama ọbọrọ mbụme emi ini enye osụk etịn̄de n̄kpọ aban̄a nte ẹkebọpde itie ukabade n̄wed Tojolabal. Enye ọkọdọhọ ete: “Nnyịn inen̄ekede inyene okụk ke mme idụt emi ọfis nnyịn ẹsede enyịn. Mîkpedịghe nditọete nnyịn ke nsio nsio itie ke ererimbot ẹsitịpde okụk ẹnọ nnyịn, nnyịn ikpekemeke ndibọp mme itie ukabade n̄wed nnọ nsio nsio usem ke idụt nnyịn. Okụk emi nditọete nnyịn ẹsitịpde mi anam ikeme ndibọp nsio nsio itie nnọ mme akabade n̄wed man mmọ ẹdu ke obio emi ẹsemde usem mmọ ẹkabade n̄wed. Imenen̄ede ikọm nditọete nnyịn ke ofụri ererimbot ke okụk oro mmọ ẹsitịpde.” Omokụt do ke okụk emi mbufo ẹsitịpde man ẹda ẹnam utom Abasi ke ofụri ererimbot ke isida ibọp inyụn̄ idiọn̄ mme n̄kpọ emi. Ediwak mbufo ẹsika donate.jw.org ẹkenam emi.